သျှမ်းပြည် လားရှိုးခရိုင်၊ ကွမ်းလုံမြို့ (ဝဵင်းၵုၼ်လူင်) နှင့် မြန်မာ – တရုတ် နယ်စပ်ဂိတ် ချင်းရွှေဟော်တို့ သွားသည့် လမ်းကြောင်း ၌ ကုန်တင်ကားသမားများ ပျောက်ဆုံးနေကြောင်း စုံစမ်းသိရသည်။

ပြီးခဲ့သည့် ဇွန်လ ၁၆ နှင့် ၁၇ ရက်တို့တွင် ကွမ်းလုံမြို့နယ်၊ ဟိုလီကျေးရွာအုပ်စု ဖာဆန်ကျေးရွာ အနီးပတ်ဝန်းကျင်၌ ၁၂ ဘီးကုန်တင်ကား ၂ စီး မောင်းသူ နှစ်ဦး ယာဥ်နောက်လိုက် ၃ ဦးတို့သည် အဆက်အသွယ်မရ ပျောက်ဆုံးသွားကြောင်း စုံစမ်း သိရသည်။

“၁၆ ရက်နေ့မှာ နမ့်စလပ်ကနေ ချင်းရွှေဟော်ဘက်ကို ကုန်တင်သွားဖို့ တခြားကားတွေနဲ့ ရှေ့ဆင့်နောက်ဆင့် အတူတူ ထွက်သွားကြတာ၊ ဖာဆန်ကျေးရွာ အနီးမှာ လက်နက်ကိုင် တပ်ဖွဲ့ တစ်ခုက ကားရှေ့က လာတားပြီး ဖမ်းခေါ်သွားကြတဲ့ သတင်းတွေ ကြားရတယ်၊ ဒါက အဲ့ဘက်လမ်းကြောင်း သွားလာတဲ့ ကားသမားတွေ ပြောတာပါ” ဟု ပျောက်ဆုံးသူ နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။

ထို့အပြင် ဇွန်လ ၁၇ ရက်တွင်လည်း ချင်းရွှေဟော်ဘက်မှ တစ်ဆင့် ဘိလပ်မြေများ တင်ဆောင်လာသည့် ကားတစ်စီး နှင့် ၁၂ ဘီးကုန်တင်ကား တစ်စီးတို့သည်လည်း အဆိုပါ အနီးပတ်ဝန်းကျင်တွင် ပျောက်ဆုံးသွားကြောင်း ဒေသခံများ၏ ပြောပြချက်အရ သိရသည်။

အဆိုပါ လမ်းကြောင်း တစ်လျောက်တွင် အာဏာသိမ်း စစ်ကောင်စီတပ်ဖွဲ့ နှင့် တိုင်းရင်းသား လက်နက်ကိုင် တပ်ဖွဲ့များ ဖြစ်ကြသည့် ကချင်လွတ်လပ်ရေး တပ်မတော် (KIA) နှင့် ကိုးကန့်တပ်ဖွဲ့ (MNDAA ) တို့က သွားလာလှုပ်ရှား နေကြောင်း သိရသည်။

“လက်နက်ကိုင်တပ်ဖွဲ့တွေပဲ ဖမ်းသွားမလားပေါ့၊ အခုက ကားတွေရော၊ လူတွေရော ပျောက်သွားတာ၊ တချို့က ကိုယ်ပိုင်ကားမဟုတ်တဲ့ အငှားနဲ့ မောင်းတာလည်း ရှိတယ်၊ သူတို့ မိသားစုဝင်တွေကလည်း တအားစိတ်ပူနေကြ တယ်။ တချို့က လူပျောက်တိုင်ချက်ဖွင့်တယ်၊ တချို့ကလည်း လိုက်ရှာနေတာ ရှိတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။

ပြီးခဲ့သည့် မေလ ၂၆ ရက်တွင်လည်း သိန္နီမြို့ နှင့် ကွမ်းလုံမြို့ သွားသည့် ကားလမ်း၌ ဘိလပ်မြေတင်လာသည့် ၁၂ ဘီးကား တစ်စီးသည် မီးရှို့ဖျက်ဆီးခံထားရပြီး၊ ကားသမားပါ ပျောက်နေသည်မှာ ယနေ့အထိ ဖြစ်ကြောင်း ဒေသတွင်း ကားသမားများထံမှ သိရသည်။

သျှမ်းပြည် မြောက်ပိုင်းတစ်လျောက်တွင် အခွန်ကောက် ဆက်ကြေးတောင်းသည့် လက်နက်ကိုင် အဖွဲ့အစည်းများ စုံလင်ပေါများလှသော်လည်း ကုန်တင်ကားများ ပစ်ခတ်ခံရခြင်း၊ မီးရှို့ဖျက်ဆီးခံရခြင်းတို့က မကြာခဏ ဖြစ်လေ့ရှိကြောင်းလည်း သိရသည်။

ပြီးခဲ့သည့် မတ်လ ဆန်းပိုင်းတွင်လည်း အဆိုပါလမ်းတွင် ၁၂ ဘီး ကုန်တင်ကား ၂ စီး မီးရှို့ ဖျက်ဆီးခံခဲ့ရပြီး ယနေ့အထိ မည်သည့် တပ်ဖွဲ့က လုပ်ဆောင်ခဲ့သည်ကို မသိရသေးပေ။

အဆိုပါ လမ်းပိုင်း တစ်လျှောက်တွင် တအာင်း အမျိုးသား လွတ်မြောက်ရေး တပ်မတော် (TNLA)၊ ကချင် လွတ်လပ်ရေး တပ်မတော် (KIA)၊ မြန်မာအမျိုးသား ဒီမိုကရက်တစ် မဟာမိတ် တပ်မတော် (MNDAA) တို့အပြင် စစ်ကောင်စီတပ်တွေနဲ့ သိန္နီ PDF တို့လည်း စစ်ရေးလှုပ်ရှားလျက်ရှိပြီး အခွန်များ ကောက်ခံနေကြောင်း သိရသည်။