သျှမ်း – ကရင်နီ (ကယား) ပြည် နယ်စပ်ဒေသရှိ လွိုင်လင်လေးမြို့ ထီးစဲ့ခါး ကျေးရွာအတွင်းကို စစ်ကောင်စီမှ လက်နက်ဖြင့် ရမ်းသမ်းပစ်ခတ်ခဲ့ကာ နေအိမ်တစ်လုံးပေါ် ကျပြီး ပေါက်ကွဲသောကြောင့် လူထိခိုက်ဒဏ်ရာ ရရှိခဲ့ကြောင်း စုံစမ်း သိရသည်။
ပြီးခဲ့သည့် ဇွန်လ ၈ ရက် ညပိုင်းအချိန်တွင် စစ်ကောင်စီ၏ ခမရ (၅၃၀) တပ်ရင်းမှတပ်ဖွဲ့က ထီးစဲ့ခါးကျေးရွာ အတွင်းကို လက်နက်ကြီးဖြင့် ၅ လုံးထက်မနည်း ရမ်းသမ်းပစ်ခတ်ခဲ့သောကြောင့် နေအိမ်တစ်လုံးထဲ ကျရောက်ပေါက်ကွဲပြီး လူထိခိုက် ဒဏ်ရာရရှိခဲ့သလို ရာနှင့်ချီ (ကျပ်ငွေ)များနှင့်အတူ နေအိမ်လည်း မီးလောင်ပျက်စီးသွားခဲ့ကြောင်း အမည်မဖော်လိုသူ ဒေသခံတစ်ဦးကို သျှမ်းသံတော်ဆင့်ကို ပြောသည်။
“အဲ့နေ့တုန်းက တိုက်ပွဲဖြစ်နေတာတွေ မရှိဘူး။ စစ်ကောင်စီက တမင်သက်သက် နဲ့ ရည်ရွယ်ချက်ရှိရှိ ရွာထဲကို လက်နက်ကြီးနဲ့ ပစ်ထည့်လိုက်တာ။ ည ၇ နာရီကျော် အချိန်ကစပြီး ဆက်တိုက်ပစ်နေတာ။ စစ်ကောင်စီ ခမရ ၅၃၀ က ပစ်တာပါ။ စိုင်းဟုန်း တို့အိမ်ကို ထိသွားပြီး မီးလောင်တာ၊ ပါသွားတာ ကုန်တောင်ကုန်တော့မယ်။ သူ့တူလေးလည်း လက်နက်ကြီးကျည်စ မှန်ပြီး တစ်ကိုယ်လုံး ထိခိုက်ဒဏ်ရာရသွားတယ် “ ဟု ၎င်း ဒေသခံတစ်ဦး ကပြောသည်။
အဆိုပါ စစ်ကောင်စီ၏ ခမရ (၃၅၀) တပ်ရင်းမှ ပစ်ခတ်လိုက်သော လက်နက်ကြီးကြောင့် နေအိမ်တစ်လုံးထဲ ကျရောက်ပေါက်ကွဲပြီး နေအိမ်အတွင်းရှိ ကလေးတစ်ဦး ထိခိုက်ဒဏ်ရာ ရသည့်အပြင် တန်ဖိုးရှိသော ကျပ်သိန်း ၁၃၀ ၊နေအိမ် နှင့် ဈေးဆိုင်များလည်း မီးလောင်ပျက်စီးသွားပြီး ဆုံးရှုံးခဲ့ရကြောင်း သိရသည်။
အလားတူ စစ်ကောင်စီမှ လက်နက်ကြီးဖြင့် ရမ်းသမ်းပစ်ခတ်မှုကြောင့် ထီးစဲ့ခါးကျေးရွာအပြင် အနီးတဝိုက်ရှိ လိန်ဖုံရွာ (ဝၢၼ်ႈလိၼ်ၽုင်ႇ) မှ နေအိမ်တချို့လည်း ထိခိုက်မှုရှိခဲ့ကြောင်း သိရသည်။
“ လိန်ဖုံရွာက ရှမ်းရွာတွေပါ။ အိမ်ခြေ ၁၀၀ ကျော်တယ်။ လက်နက်ကြီး ကျပေါက်ကွဲတာကြောင့် နေအိမ် ၁၅ လုံးလောက် ပျက်စီးသွားတယ်။ ရွာက ဒေသခံတွေ ထွက်ပြေးပြီး ထီးစဲ့ခါးက ကမ္မဌာန်းကျောင်းမှာ လာခိုလှုံနေရတယ်။ စားရေးသောက်ရေးတချို့တော့ UN က လာကူညီထားတယ်။ လူတွေတော့ စိတ်ပိုင်းဆိုင်ရာ ထိခိုက်တာပေါ့ဗျာ။ နေအိမ်ကို ပြန်မသွားချင်၊ ပြန်မသွားရဲကြတော့ဘူး “ ဟု အထက်ပါ ပုဂ္ဂိုလ်က ထပ်လောင်း ပြောသည်။
စစ်တပ်က အာဏာသိမ်းပြီးနောက် မြန်မာပြည်တဝှမ်းအတွင်း အရပ်သား နေအိမ်အဆောက်အဦး ၆ သောင်းကျော် မီးလောင်ပျက်စီးခဲ့ပြီး အရပ်သား ၁ ဒသမ ၈ သန်း အိုးအိမ်စွန့်ပြီး ထွက်ပြေးတိမ်းရှောင်နေရကြောင်း ကုလသမဂ္ဂ လူသားချင်းစာနာမှု ဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA) ၏ စာရင်းအရ သိရသည်။
