သျှမ်းပြည် လွိုင်လင်ခရိုင်အတွင်း အာဏာသိမ်း စစ်ကောင်စီ တပ်ဖွဲ့ နှင့် ရှမ်းပြည်တိုးတက်ရေးပါတီ (SSPP/SSA) တို့ အပြန်အလှန် စစ်အင်အား ဖြည့်တင်းမှုများ ရှိနေကြောင်း စုံစမ်းသိရသည်။

ယခုရက်ပိုင်းအတွင်း စစ်ရေးတင်းမာမှုများကြောင့် စစ်အင်အားဖြည့်တင်းမှုအပြင် စစ်ကောင်စီမှ လက်နက်ကြီး ပြင်ဆင်မှုများလည်း ရှိနေကြောင်း SSPP/SSA ၏ သတင်းစာမျက်နှာ ဖြစ်သည့် SSPP Info ကလည်း ထုတ်ပြန်ထားသည်။
 
ယင်းကဲ့သို့ နှစ်ဖက် တပ်ဖွဲ့ စစ်ရေးတင်းမာမှုများသည် စစ်ကောင်စီ၏ အရှေ့အလယ်ပိုင်းတိုင်း စစ်ဌာနချုပ်  အနီးသို့ SSPP/SSA တပ်သားရောက်ရှိနေထိုင်ခြင်းကြောင့် ဖြစ်သည်ဟု ဒေသအတွင်း SSPP/SSA အရာရှိ တစ်ဦးက ပြောဆိုထားသည်။
 
“အခု တောင်ပိုင်းဘက်ကို ကျနော်တို့ အင်အားတွေ ရောက်ရှိနေခြင်းက သူတို့ တိုင်းစစ်ဌာနချုပ် နဲ့ နီးလာတော့ လုံခြုံရေးအရ စိုးရိမ်တာလည်း ဖြစ်နိုင်ပါတယ်၊ ဒီမတိုင်ခင်မှာလည်း ဒီတောင်ပိုင်းကနေ ဆုတ်ခွာဖို့ ကျနော်တို့ကို အကြိမ်ကြိမ် ဖိအားပေးခဲ့ပါတယ်၊ ဒါပေမဲ့ ကျနော်တို့က မဆုတ်ခဲ့ဖူးသလို ခုလည်းဆုတ်မှာ မဟုတ်ဘူး၊ စစ်ရေးကို စစ်ရေးနဲ့ဘဲ တုန့်ပြန်ဖို့ရှိပါတယ်” ဟု ဒေသအတွင်း အမည်မဖော်လိုသူ SSPP အရာရှိ တစ်ဦးက သျှမ်းသံတော်ဆင့်ကို ပြောသည်။
 
ယနေ့ (ဇွန်လ ၁၇ ) ရက် မွန်းလွဲပိုင်းတွင် စစ်ကောင်စီဘက်မှ စစ်ကား အစီးရေ ၁၀ နီးပါးရှိသည့် ယာဥ်တန်းကို မိုင်းနောင် – ခိုလမ် လမ်းကြား၌ တွေ့မြင်ရကြောင်းလည်း ဒေသခံများထံမှ သိရသည်။
 
အဆိုပါ စစ်ရေး တင်းမာမှုသည် ပင်လုံ၊ လဲချား၊ မိုင်းနောင်တို့ရှိ SSPP/SSA စစ်ကြောင်းများ ဆုတ်ခွာရန် စစ်ကောင်စီဘက်မှ တောင်းဆိုမှုကို SSPP/SSA ဘက်မှ လက်မခံသည့်အတွက် ဖြစ်နိုင်သည်ဟု ဒေသခံများပြောဆိုချက် အရသိရသည်။

 လက်ရှိတွင် စစ်ကောင်စီဘက်မှ လဲချားမြို့တောင်ဘက်ရှိ လွိုင်နမ့်တွန်တောင် အနီး နှင့် ပင်လုံ – လဲချား အကြားရှိ လွိုင်ခေတောင်ခြေတွင် 81mm လက်နက်ကြီးတပ်ဆင်ထားကြောင်းလည်း SSPP Info က ထုတ်ပြန်ထားသည်။
 
ယင်းကဲ့သို့ စစ်ရေးတင်းမာမှုများ နှင့် ပတ်သက်ပြီး ဖြစ်စဥ် အသေးစိတ်ကို မေးမြန်းသိရှိနိုင်ရန် အတွက် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၏ ပြောရေးဆိုခွင့်ထံသို့ အကြိမ်ကြိမ် ဆက်သွယ်ခဲ့သော်လည်း ဖုန်းလက်ခံ ဖြေကြားခြင်းမရှိပေ။

SSPP တပ်ဖွဲ့သည် စစ်ကောင်စီ တပ်ဖွဲ့ နှင့် အပစ်ရပ် NCA လက်မှတ်ရေးထိုးထားခြင်း မရှိသော်လည်း စစ်ကောင်စီ လက်အောက်ခံ ငြိမ်းချမ်းရေးဖော်ဆောင်မှု ညှိနှိုင်းရေး ကော်မတီ NSPNC နှင့် တွေ့ဆုံဆွေးနွေးမှု အကြိမ်ကြိမ် ရှိခဲ့သည့် တပ်ဖွဲ့ဖြစ်သည်။

ပြီးခဲ့သည့် ဇန်နဝါရီလအတွင်းတွင်လည်း စစ်ကောင်စီဘက်မှ SSPP/SSA ဌာနချုပ်ရှိရာနေရာကို ဦးတည်ပြီး ရဟတ်ယာဥ်ဖြင့် လာရောက် ပျံဝဲခြိမ်းခြောက်မှု ပြုခဲ့သည်။