သျှမ်းပြည် မိုးဗြဲမြို့တွင် တိုက်ပွဲဆက်လက်ဖြစ်ပွားခဲ့ရာ နှစ်ဖက်တပ်ဖွဲ့ ထိခိုက် သေဆုံးမှုရှိပြီး ပြည်သူပိုင် ဘာသာရေး အဆောက်အအုံ နေအိမ်ပျက်စီးမှုများ ရှိခဲ့ကြောင်း စုံစမ်းသိရသည်။
ယမန်နေ့ (ဇွန်လ ၁၇ ) ရက် နံနက်ပိုင်း အချိန်မှစပြီး မိုးဗြဲမြို့ပေါ်တွင် တပ်စွဲထားသော စစ်ကောင်စီတပ်ဖွဲ့ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့အကြား တိုက်ပွဲဆက်လက် ပြင်းထန်စွာ ဖြစ်ပွားခဲ့၍ စစ်ကောင်စီဘက်မှ (၁၀) ဦး သေဆုံးပြီး ပူးပေါင်းတပ်ဖွဲ့ PDF မှ ရဲဘော် ၃ ဦး ထိခိုက်ဒဏ်ရာ ရရှိခဲ့ကြောင်း MBPDFမှ ထုတ်ပြန်ထားသည်။
ထို တိုက်ပွဲအတွင်း စစ်ကောင်စီ၏ မိုးဗြဲမှ ၄၂၂ တပ်၊ လွိုင်ကော် ခလရ ၅၄ တပ်တို့မှ အဝေးပစ် လက်နက်ကြီးဖြင့် ရမ်းသမ်းပစ်ခတ်ခဲ့သဖြင့် မိုးဗြဲအရှေ့ဖက်ခြမ်းတွင် ကျရောက်ပေါက်ကွဲပြီး အမျိုးသမီး ၁ ဦး သေဆုံးပြီး ၂ ဦး ထိခိုက်ဒဏ်ရာ ရရှိခဲ့ကြောင်း မိုးဗြဲမြို့ဒေသခံ အသက် ၄၀ နှစ် အရွယ်အမျိုးသား တစ်ဦးပြောသည်။
“မနေ့က တိုက်ပွဲဖြစ်တဲ့အချိန် သူတို့ ရမ်းသမ်းပစ်လိုက်တာ မိုးဗြဲအရှေ့ဖက်ခြမ်းမှာ ကျနော့်သမီးပါသွားတယ်။ ကျနော် သမီးသေသွားပြီ။ ထိခိုက်ဒဏ်ရာရတဲ့သူ ၂ နှစ်ယောက်ရှိတယ် “ ဟု ၎င်း အမျိုးသားက ပြောသည်။
အဆိုပါ စစ်ကောင်စီမှ လက်နက်ကြီးဖြင့် ရမ်းသမ်းပစ်ခတ်မှုကြောင့် မိုးဗြဲမြို့ အရှေ့ဖက်ခြမ်းတွင် ကျရောက်ပေါက်ကွဲသွားရာ အမျိုးသမီး ၁ ဦး သေဆုံးပြီး လူ ၂ ဦး ထိခိုက်ဒဏ်ရာရရှိကြောင်း သိရသော်လည်း သီးခြားအတည်မပြုနိုင်သေးပေ။
ထို့အပြင် မိုးဗြဲမြို့တွင် စစ်ကောင်စီတပ်မှ အထူးစစ်ဆင်ရေး ပြုလုပ်နေသောကြောင့် သာယာကုန်း၊ ပင်သာ၊ သစ်ယာကုန်း၊ စျေးကုန်း စသည့် လူနေရပ်ကွက်မှ ပြည်သူများ ထောင်နှင့်ချီ မြို့ကို စွန့်ခွာပြီး ထွက်ပြေးတိမ်းရှောင် နေရကြောင်း သိရသည်။
“မိုးဗြဲမြို့မှာတော့ မကျန်သလောက်ပဲ။ သတ်ဖြတ်ခံရတာလည်း များနေပြီ။ ပြည်သူတွေတော့ ဖယ်ခုံမြို့ကို ရောက်သွားတာလည်း ရှိတယ်။ မိုးဗြဲအရှေ့ဖက်ခြမ်း ရောက်သွားတာရှိတယ်။ ဆွေမျိုးဖက်ကို တိမ်းရှောင်သွားတဲ့သူလည်း ရှိတယ်။ မြို့ပေါ်မှာ ပြည်သူတွေတော့ မရှိသလောက်ပဲ အကုန်လုံးကို ထွက်သွားပေးဖို့ ကြေညာထားတော့ ထွက်သွားကြတာ။ လူဦးရေတော့ ထောင်နှင့်ချီရှိတယ် “ ဟု အထက်ပါ အမျိုးသားက ထပ်လောင်းပြောသည်။
လက်ရှိ မိုးဗြဲမြို့ပေါ်တွင် နှစ်ဖက်တပ်ဖွဲ့ စစ်ရေးတင်းမာနေလျက်ရှိသဖြင့် မိဘပြည်သူများအနေဖြင့် ကျေးရွာဖက်သို့ တိမ်းရှောင်နေထိုင်ဖို့ရန် နှင့် သွားလာဖြတ်သန်းခြင်း မပြုလုပ်ရန် ပြည်သူ့ကာကွယ်ရေး PDF မှ ထပ်မံသတိပေးထားသည်။
ပြီးခဲ့သည့် ဇွန်လ ၆ ရက်မှ ၈ ရက်နေ့ထိ မိုးဗြဲမြို့ အနီးတဝိုက်ရှိ အရပ်သား ၂၆ ဦးကို စစ်ကောင်စီတပ်ဖွဲ့မှ သတ်ဖြတ်ခဲ့တဲ့အပေါ် ပြင်းထန်စွာရှုတ်ချကြောင်း အမျိုးသားညီညွတ်ရေးအစိုးရ NUG က ဇွန်လ ၁၄ ရက်မှာ ကြေညာချက်ထုတ်ပြန်ထားသည်။
Leave a Comments