သျှမ်းပြည် မူဆယ်မြို့ ဈေးရပ်ကွက်ရှိ ဟိုတယ်တစ်ခုအတွင်း သေဆုံးနေလျက်ရှိသော အမျိုးသားတစ်ဦး၏ အလောင်းကိုတွေ့ရှိခဲ့ကြောင်း စုံစမ်းသိရသည်။

ယမန်နေ့ (ဇွန်လ ၁၅) ရက် ည ၇ နာရီဝန်းကျင်တွင် ဈေးရပ်ကွက်ရှိ ဟိုတယ်တစ်ခု၏ အိပ်ခန်းထဲ၌ အသက် ၂၃ နှစ်ကျော်အရွယ် အမျိုးသားတစ်ဦးသည် ဒဏ်ရာဒဏ်ချက်မရှိဘဲ သေဆုံးနေလျက်ရှိသဖြင့် အလောင်းကို နှလုံးလှလူမှုကူညီရေးအသင်းမှ သွားရောက်ကူညီခဲ့ကြောင်း သိရသည်။

“ အလောင်းကတော့ ထိခိုက်ဒဏ်ရာ ရထားတာ မတွေ့ရဘူး။ အလောင်းကို ကျနော်တို့ ဆေးရုံပို့ထားတော့ ဘာကြောင့်သေတယ်ဆိုတာ ဆေးရုံက ဆုံးဖြတ်မှ သိရမှာ။ ဒီလိုဟိုတယ်တွေမှာ သေဆုံးနေလျက်ရှိတဲ့ အလောင်းတော့ လက်ရှိမှာ တစ်လောင်းပဲ တွေ့သေးတယ်။ အရင်လတွေလည်း မရှိဘူး “ ဟု ၎င်း လူမှုကူညီရေးအသင်းမှ တာဝန်ခံတစ်ဦးက ပြောသည်။

အဆိုပါ သေဆုံးသွားသူသည် အသက် ၂၃ နှစ်အရွယ်ရှိလူငယ် အမျိုးသားတစ်ဦးဖြစ်ပြီး ကွက်ခိုင်မြို့တွင် နေထိုင်သည့် ဒေသခံတစ်ဦးဖြစ်ကြောင်း သိရသည်။

စစ်တပ်က အာဏာသိမ်းပြီးနောက် လားရှိုးမြို့ အပါအဝင် နယ်စပ်ဒေသဖြစ်သည့် မူဆယ်၊ နမ့်ခမ်း၊ တာချီလိတ်မြို့တွင် အိပ်ခန်းငှားရမ်းနေထိုင်သူ၊ ဟိုတယ်အခန်းငှားရမ်းနေထိုင်သူ မူးယစ်ဆေးဝါးသုံးစွဲမှုကြောင့် အိပ်ခန်းအတွင်း ဦးနှောက်သွေးကြောပြတ်ကာ သေဆုံးနေလျက်ရှိကြောင်း သိရသည်။

ပြီးခဲ့သည့် ၂၀၂၂ ဒီဇင်ဘာ ၄ ရက်တွင် တာချီလိတ်မြို့ ဝိန်းကျောက်ရပ်ကွက်အတွင်း အိမ်ခန်းငှားနေထိုင်သည့် အသက် ၁၇ အရွယ် နန်းအွန်ပင်းသည် ဦးနှောက်သွေးကြောပြတ်ကာ သေဆုံးခဲ့ကြောင်း သိရသည်။