သျှမ်းပြည် မိုးဗြဲမြို့တွင် တိုက်ပွဲဖြစ်ပွားခြင်း မရှိသည့် စစ်ဘေးရှောင် စခန်းနေရာကို စစ်ကောင်စီမှ လက်နက်ကြီးဖြင့် တစ်ဖက်သတ် ပစ်ခတ်ခဲ့သောကြောင့် ပြည်သူအချို့ ထိခိုက်ဒဏ်ရာရပြီး နေအိမ် အဆောက်အဦးများ ပျက်စီးသွားကြောင်း စုံစမ်းသိရသည်။
ယမန်နေ့ ဇွန်လ ၁၄ ရက် ည ၉ နာရီကျော် အချိန်တွင် မိုးဗြဲမြို့ စစ်ရှောင်စခန်းတစ်နေရာကို စစ်ကောင်စီမှ လက်နက်ဖြင့် အကြိမ် (၁၅) ကြိမ် ထက်မနည်း တစ်ဖက်သတ် ပစ်ခတ်ခဲ့သောကြောင့် စစ်ဘေးရှောင်စခန်းရှိ ပြည်သူတချို့ ထိခိုက်ဒဏ်ရာ ရရှိခဲ့သလို နေအိမ်အဆောက်အဦးများလည်း ပျက်စီးသွားခဲ့ကြောင်း မိုးဗြဲမြို့ သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။
“ မနေ့ ည ၂ ဆင့်ကွဲတွေပါ ပစ်တယ်။ စစ်ရှောင်စခန်းဖက်ကို ပစ်တာ။ အဲ့မှာ ထိခိုက်ဒဏ်ရာ ရတဲ့သူ တချို့ရှိတယ်။ သေဆုံးမှုတော့ မရှိဘူး။ နေအိမ် အဆောက်အဦးတွေတော့ ပျက်စီးသွားတယ် “ ဟု ၎င်း သတင်းရင်းမြစ်တစ်ဦးက ပြောသည်။
အဆိုပါ စစ်ကောင်စီမှ လက်နက်ကြီးဖြင့် ပစ်ခတ်တိုက်ခိုက်ခဲ့သောကြောင့် ပြည်သူအချို့ ထိခိုက်ဒဏ်ရာရရှိကြောင်း သိရသော်လည်း ဘယ်နှစ်ဦး ထိခိုက်ဒဏ်ရာရကြောင်း အသေးစိတ်ကိုတော့ မသိရှိရသေးပေ။
ထို့အပြင် စစ်ကောင်စီသည် ယနေ့ ဇွန်လ ၁၅ ရက် နံနက်အစောပိုင်း ၂ နာရီဝန်းကျင်က မိုးဗြဲမြို့ကို တိုက်လေယာဉ်ဖြင့် လာရောက်ပျံဝဲပြီး အဆိုပါ စစ်ရှောင်စခန်းကို ဗုံးကြဲချခဲ့ကြောင်း MBPDF ရွှေလင်းယုန်တပ်ခွဲမှ ထုတ်ပြန်ထားသည်။
လက်ရှိမှာ မိုးဗြဲမြို့ဒေသတွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖို့အကြား တိုက်ပွဲပြင်းထန်နေလျက်ရှိပြီး စစ်ကောင်စီမှ နေရာအနှံ့ယူ၍ တပ်ဆွဲထားသောကြောင့် မိဘပြည်သူများအနေဖြင့် မိုးဗြဲ – ပီကင်း လမ်းကို အသုံးပြုဖို့ ပြည်သူ့ကာကွယ်ရေး PDF မှ သတိပေးထားသည်။
