မြန်မာ – တရုတ် နယ်စပ်ဒေသဖြစ်သည့် ချင်းရွှေဟော်မြို့တွင် နယ်ခံမဟုတ်ပါက နိုင်ငံကူးလက်မှတ် (အနီရောင်စာအုပ်) ကို တစ်ဦးလျှင် တရုတ်ယွမ် ၁၀၀၀ (ဒေသကာလပေါက်စျေး မြန်မာငွေ ကျပ် ၄၅၀,၀၀၀) အထိ ပေးဆောင်ရကြောင်း စုံစမ်းသိရသည်။

ပြီးခဲ့သည့် ဇန်နဝါရီ ၈ ရက်နေ့မှစပြီး မြန်မာ – တရုတ် နယ်စပ်ဒေသရှိ ချင်းရွှေဟော် နယ်စပ်ကုန်သွယ်ရေးဂိတ်ကို တရုတ်ဖက်မှ ပြန်လည်စတင်ဖွင့်လှစ်ပေးခဲ့ပြီး မြန်မာနိုင်ငံ အစိုးရဖက်မှ နိုင်ငံကူးလက်မှတ် (အနီရောင်စာအုပ်) ကို ပြန်လည် ပြုလုပ်ပေးခဲ့ခြင်း ဖြစ်သည်။

အဆိုပါ နိုင်ငံကူးလက်မှတ် (အနီရောင်စာအုပ်) ပြုလုပ်ဖို့ ကုန်ကျငွေစရိတ်ကို တစ်ဦးလျှင် တရုတ်ယွမ် ၄၀ ပေးပြီး ပြုလုပ်ခဲ့ရာမှ လက်ရှိမှာ နယ်ခံမဟုတ်ပါက တစ်ဦးလျှင် တရုတ်ယွမ်ငွေ ၁၀၀၀ အထိပေးပြီး ပြုလုပ်လာရသဖြင့် ဖြတ်သန်းသွားလာသူများ အခက်ခဲ ကြုံတွေ့နေရကြောင်း ဒေသခံတစ်ဦးက ပြောသည်။

“ ဒီက နယ်ခံဖြစ်တဲ့ ချင်းရွှေဟော်၊ လောက်ကိုင်၊ ဟိုပန်၊ ကွမ်းလုံ ကဆိုရင် အနီရောင်စာအုပ်လုပ်ရင် တစ်ယောက်ကို ယွမ် ၄၀ ပဲပေးရတယ်။ ဒီက နယ်ခံမဟုတ်တဲ့ သိန္နီ၊ လားရှိုး ဖက်ကလူတွေဆို သူတို့တောင်းသလောက် တရုတ်ယွမ် ၃၀၀ ကနေစပြီး ၅၀၀၊ ၇၀၀၊ ၈၀၀ အထိ ပေးရတယ်။ တချို့ ကြားခံ ပွဲစားငှားပြီး လုပ်ခိုင်းရင် ၁၀၀၀ အထိ ပေးရတယ် “ ဟု ၎င်းက ပြောသည်။

ယင်းကဲ့သို့ နိုင်ငံကူးလက်မှတ် လုပ်ချင်သူများကို တရားမဝင် ကုန်ကျစရိတ် အများအပြား တောင်းခံနေသောကြောင့် ဖြတ်သန်းသွားလာသူများအနေဖြင့် ငွေရေးကြေးရေး အခက်ခဲ ကြုံတွေ့နေရကြောင်း သိရသည်။

“ သူတို့က နိုင်ငံကူးလက်မှတ်လုပ်ချင်တဲ့သူကို တောင်းချင်သလောက် တောင်းနေတာ။ တရုတ်ဖက်ကတော့ ဘာမှ စကား မများဘူး။ ဒီစာအုပ်တွေ ပြည့်စုံရင် သူတို့ဝင်ခွင့်ပေးတယ်။ ခက်ခဲတာတော့ ဒီဖက်ကလူတွေ စစ်တပ်က အာဏာသိမ်း လာကတည်းက အဓ္ဓမ ငွေတောင်းခံနေတယ် “ ဟု ၎င်းက ထပ်လောင်း ပြောသည်။

အလားတူ မြန်မာ – တရုတ် နယ်စပ်ဒေသ၊ မူဆယ်မြို့ရှိ ရွှေနန်းတော်ဂိတ်တွင် နိုင်ငံကူးလက်မှတ် လုပ်ကိုင်သူများကို မြန်မာနိုင်ငံ အစိုးရဖက်မှ တစ်ဦးလျှင် ကျပ် ၁ သောင်းမှ ၂ သောင်းအထိ တောင်းခံပြီး နှစ်ရက်ကြာ စောင့်ဆိုင်းစေပြီး ကြားခံပွဲစား နှင့် ပြုလုပ်ပါက တစ်ဦးကို ကျပ် ၅ သောင်းပေးရကာ တစ်ရက်အတွင်း နိုင်ငံကူးလက်မှတ် ထုတ်ယူနိုင်ကြောင်း သိရသည်။