တရုတ်ပြည်တင်ပို့မည့် ဖရဲသီးသည် လမ်းတွင် ကြန့်ကြာနေသဖြင့် အရည်အသွေးညံ့နေသဖြင့် ရောင်းဝယ်ရန် ခက်ခဲနေကြောင်း မူဆယ်မြို့ ကုန်စည်ဒိုင်များ ထံ စုံစမ်းသိရသည်။
မြန်မာ – တရုတ် နယ်စပ်ဖြစ်သည့် မူဆယ် (၁၀၅) မိုင် ကုန်သွယ်ရေးဇုန်မှ တရုတ်ပြည်သို့ တင်ပို့ရောင်းချမည့် ဖရဲသီးများသည် လမ်းပေါ်တွင် ကြန့်ကြာမှုရှိကာ အရည်အသွေးညံ့မှုကြောင့် ဖရဲသီး ကို ဈေးပေါပေါဖြင့် မြန်မာပြည်တွင် ပြန်လည်ရောင်းချနေရသည်။
“ ကျနော်တို့ ကားတွေ တရုတ်ပြည်ထဲတောင် မရောင်းရသေးဘူး။ ပြန်ဆင်းလာရတယ်။ ဖရဲသီးကို ပြည်တွင်းမှာပဲ ဈေးပေါပေါနဲ့ရောင်းတယ်။ အလကားလည်း ဝေပေးလိုက်တယ်” ဟု ဖရဲသီးတင်သည့် ကားသမား တဦး က သျှမ်းသံတော်ဆင့်ကို ပြောသည်။
တရုတ်ပြည်ဘက်သို့ ကုန်ကားများ ဝင်ရန် ခက်ခဲခြင်း၊ ကိုဗစ်-၁၉ ရောဂါ ဟု ဆိုပြီး စစ်ဆေးမှု ပိုတင်းကြပ်လာသဖြင့် မူဆယ်နယ်စပ် ကုန်သွယ်ရေးဇုန် တွင် ကားများပိတ်ဆို့နေပြီး ဖရဲသီးများ အလိုအလျောက် အရည်အသွေး ကျဆင်းလာကြောင်း ၎င်း ယာဉ်မောင်းက ထပ်လောင်းပြောသည်။
“ကျနော်တို့ သိန်နီဈေးထဲမှာ ဈေးပေါပေါ နဲ့ ပြန်ရောင်းပေးနေရတယ်”ဟု ပြောသည်။
လက်ရှိမှာ မူဆယ် (၁၀၅)မိုင် နယ်စပ် ကုန်သွယ်ရေးဇုန်တွင် ဖရဲသီးကား အစီး (၁၀၀၀) ကျော် တရုတ်ပြည်သို့ ဝင်ရန် စောင့်ဆိုင်းနေကြောင်း၊ တရုတ်ပြည်အတွင်း သို့ တရက်လျှင် ဖရဲသီးကား အစီး(၁၀၀)ကျော်သာ ဝင်ခွင့်ရကြောင်း မူဆယ်သစ်သီဝလံ ကုန်စည်ဒိုင်မှ စုံစမ်းသိရသည်။
“ တရုတ်ဘက်ကို တရက်ကို အစီး (၁၀၀)ကျော် ပဲဝင်ခွင့်ရတယ်။ အရမ်းစစ်ဆေးတယ်။ မြန်မာပြည်ဘက်က တက်လာတဲ့ကားက တရက်ကို အစီး (၄၀၀)စီးတော့ ကားတွေက ပိတ်ဆို့မှုတွေဖြစ်ကုန်တာ။ အဲ့ဒါနဲ့ ဖရဲသီး အရည်အသွေးတွေ ကျကုန်တာ” ဟု သစ်သီးဝလံ ပွဲရုံမှ စိုင်းခင်မောင်က ပြောသည်။
ယမန်နေ့ ဧပြီ (၁၉) ရက်က တရုတ်ပြည်သူ့ သမ္မတနိုင်ငံ ယူနန်ပြည်နယ် ကိုဗစ်-၁၉ ကာကွယ်ထိန်းချုပ်ရေးအဖွဲ့၏ ညွှန်ကြားချက်အရ တရုတ်ပြည်သူ သမ္မတနိုင်ငံသို့ မြန်မာနိုင်ငံမှ တင်ပို့သော မည်သည့် ကုန်ပစည်းမဆို ပို့ကုန်ကား နှင့် ကုန်တစ်စီးလျှင် ကိုဗစ်-၁၉ စစ်ဆေးရန်အတွက် နမူနာ (၃၀) စစ်ဆေးရန် လိုအပ်ကြောင်း ထုတ်ပြန်ထားသည်။
Leave a Comments