မြန်မာ – တရုတ်နယ်စပ်ဒေသ မူဆယ်မြို့ရှိ ဂိတ်များတွင် ယနေ့ စက်တင်ဘာလ ၅ ရက်၌ နှစ်နိုင်ငံဝင်ထွက်ခွင့် တစ်ခါသုံးကတ် TBP ပြုလုပ်သူ များပြားနေကြောင်း စုံစမ်းသိရသည်။
.
ယနေ့ (စက်တင်ဘာလ ၅ ) ရက် နံနက်အစောပိုင်း အချိန်မှစပြီး မူဆယ်မြို့နယ် ဆင်ဖြူဂိတ် နှင့် နန်းတော်ဂိတ်တွင် နှစ်နိုင်ငံဝင်ထွက်ခွင့် တစ်ခါသုံးကတ် TBP (အပြာရောင်စာအုပ်) ကိုသွားရောက်လုပ်ကိုင်သူ များပြားနေကြောင်း သွားရောက်လုပ်ကိုင်သူ ဒေသခံတစ်ဦးက ပြောသည်။
“ဒီနေ့ကတ်သွားလုပ်တဲ့သူတွေက ရာနဲ့ ချီရှိတယ်။ လူတွေကတော့ ကြိတ်ကြိတ်တိုးနေတာပဲ။ တန်းစီပြီးနေရတာ အခုမရသေးတဲ့လူတွေလည်း စောင့်နေရတယ် “ ဟု ၎င်း ဒေသခံတစ်ဦးက ပြောသည်။
လက်ရှိ လုပ်ဆောင်ပေးနေသည့် နှစ်နိုင်ငံဝင်ထွက်ခွင့် တစ်ခါသုံးကတ် TBP သည် ရွှေလီမြို့ထိသာ သွားရောက်လည်ပတ်နိုင်ပြီး အလုပ်လုပ်ကိုင်ခွင့် မပေးထားကြောင်းလည်း သိရသည်။
အဆိုပါ တစ်ခါသုံးကတ် TBP (အပြာရောင်စာအုပ်) ကို လည်ပတ်ရန်သာ သတ်မှတ်ထားသောကြောင့် တရုတ်ပြည်တွင်း သွားရောက်အလုပ်လုပ်ပါက ဖမ်းဆီးခံရပြီး မြန်မာပြည် ပြန်ပို့ခံရနိုင်ကြောင်းလည်း မူဆယ်မြို့ ဒေသခံ အမျိုးသားတစ်ဦးက ပြောသည်။
“အရင်ကတည်းက တစ်ခါသုံးကတ် နဲ့ တရုတ်ပြည်သွားကြတယ်။ အဲ့ဖက်ဝင်လို့ ရသွားပြီဆိုရင်တော့ အလုပ်လုပ်ဖို့ ခေါ်မယ့်သူရှိရင် သွားလုပ်ကြတယ်။ စစ်ဆေးမေးမြန်းခံလာရရင်တော့ ဖမ်းခံရတာပေါ့။ ပြီးရင်တော့ မြန်မာပြည်ကို ပြန်ပို့တယ် “ ဟု ၎င်းအမျိုးသားတစ်ဦးက ပြောသည်။
ထို့အပြင် တရုတ်နယ်စပ်ဒေသရှိ ဂိတ်များကို စစ်တပ်က အာဏာသိမ်းချိန် ၂၀၂၁ ဧပြီလပိုင်းမှစ၍ ပိတ်ထားခဲ့ရာ ၃ နှစ်ကျော်ကာလအတွင်း ယခုလို နှစ်နိုင်ငံဝင်ထွက်ခွင့် ကတ်ကို ပြုလုပ်ပေးပြီး တရုတ်ပြည်ဝင်ခွင့်ပေးနေ ကြောင်း သိရသည်။
