သျှမ်းပြည်မြောက်ပိုင်း မူဆယ်မြို့နယ် မိုင်းယု (၁၀၅) မိုင် ကုန်သွယ်ရေးဇုန်တွင် ညလူနေတိတ်ချိန်၌ ပစ်ခတ်သံများ ထွက်ပေါ်လာကြောင်း ဒေသခံများထံမှ စုံစမ်းသိရသည်။
ယမန်နေ့ (ဇွန် ၂၈ ရက်) ည ၁၀ နာရီဝန်းကျင်တွင် မူဆယ်မြို့နယ် (၁၀၅) မိုင် မိုင်းယုဘက်မှ သေနတ်သံများ ထွက်ပေါ်လာ ခြင်းဖြစ်ပြီး တစ်ဖက်ပစ်ခတ်သံဖြစ်ကြောင်း အဆိုပါ ဒေသအတွင်းမှ ၁၂ ဘီး ယာဥ်မောင်းသူ တစ်ဦးက သျှမ်းသံတော်ဆင့်ကို ပြောသည်။
“မူဆယ်ကနေလာရင် (၁၀၅) မိုင် အောက်မောင်းတံ အဝင်ဂိတ် ပစ်ခတ်သံ လေးငါးချက်ကြားရတယ်၊ ဘယ်အဖွဲ့က ဘာကြောင့် ပစ်မှန်းတော့ မသိရဘူး၊ ခြောက်လှန့်အောင်ပစ်တာ ထင်တယ်” ဟု အထက်ပါ ကားသမားက ပြောသည်။
ထို့အပြင် ယခုရက်ပိုင်းအတွင်းတွင် ကချင်တပ်မတော် KIA နှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့မှ မိုင်းယုဒေသအတွင်းသို့ စစ်အင်အားဖြည့်တင်းမှုများ ရှိနေကြောင်းလည်း ဒေသခံများက ပြောသည်။
“နမ့်တောင်းဘက်မှာ တိုက်ပွဲဖြစ်ပွားပြီးတဲ့နောက် ပြန်ကြားရတဲ့ ပစ်ခတ်သံပေါ့နော်၊ ဒါပေမယ့် မကြာပါဘူး၊ အခုရက်ပိုင်း အဲ့နားတစ်ဝိုက်မှာ KIA နဲ့ TNLA က စစ်အင်အား ဖြည့်တင်းမှုတွေရှိနေတယ်” ဟု ၁၀၅ မိုင် မှ ဒေသခံ အမျိုးသားတစ်ဦးက ပြောသည်။
ယင်းဒေသအတွင်း တိုင်းရင်းသား လက်နက်ကိုင် တပ်ဖွဲ့များ၊ စစ်ကောင်စီများ နှင့် စစ်ကောင်စီ လက်အောက်ခံ ပြည်သူ့စစ်တပ်ဖွဲ့ များ သွားလာလှုပ်ရှားနေသည့် ဒေသဖြစ်သည်။
သျှမ်းပြည်မြောက်ပိုင်း နယ်စပ်ကုန်သွယ်ရေးဇုန် မူဆယ်မြို့နယ်အတွင်းတွင် အချိန်မရွေး အကြောင်းရင်းမသိ ကြားရသည့် သေနတ်နှင့် လက်နက်ကြီး ပစ်ခတ်သံများ မကြာခဏ ဖြစ်ပွားလေ့ရှိသည့်အတွက် ဒေသခံပြည်သူများမှ စိုးရိမ်ထိတ်လန့် လုံခြုံမှုမရှိကြောင်း သတင်းရရှိသည်။
Leave a Comments