သျှမ်းပြည် မူဆယ်ခရိုင် မူဆယ်မြို့ရှိ မြန်မာ – တရုတ် နယ်စပ်ဂိတ် ပြန်လည်ဖွင့်လှစ်ပြီးနောက် ရန်ကုန်၊ မန္တလေး ဘက်မှ ကုန်တင်ကားများ မူဆယ်မြို့ရှိ နယ်စပ် ဂိတ်ပေါက် ဆီသို့ အများအပြား ရောက်ရှိလာကြောင်း သတင်း သိရသည်။

လက်ရှိတွင် ရန်ကုန်၊ မန္တလေး နှင့် အောက်မြန်မာဘက်မှ တက်လာသည့် သခွားမွှေး၊ ပြောင်းဖူး၊ ဆန်၊ စပါး နှင့် ရော်ဘာ ကုန်တင်ကားများသည် လက်ရှိတွင် မူဆယ် – တရုတ်နယ်စပ်ဂိတ်ပေါက်မှာ စုပြုံရောက်ရှိ နေကြကြောင်း ဒေသခံများက သျှမ်းသံတော်ဆင့်ကို ပြောသည်။

“အခု အချိန်မှာ တချို့ကုန်ကားတွေက နယ်စပ်ဂိတ်ကနေ အဝင်အထွက် လုပ်နိုင်ပေမယ့် ယာဉ်မောင်း တစ်ဦးတည်း နဲ့ပဲ ဝင်သွားလို့ရတယ်၊ ကျင်ဆန်းကျော့ဂိတ် နဲ့ မန့်ဝိန်းဂိတ်ကနေပဲ ဝင်ခွင့်ပြုနေတယ်၊ ပြီးတော့ ၁၂ ဘီး/ ၂၂ ဘီးကား တွေကျတော့ ဝင်လို့ မရသေးဘူး၊ လက်ရှိမှာတော့ အောက်မြန်မာပြည်ကနေ တက်လာတဲ့ ကုန်ကားတွေလည်း အရမ်းများနေတယ်၊ ဂိတ်ဖြတ်ဖို့ စောင့်နေကြတာပေါ့” ဟု မူဆယ်မြို့နေ အမျိုးသား တစ်ဉီးက သျှမ်းသံတော်ဆင့် ကို ပြောသည်။

လက်ရှိတွင် မူဆယ်မြို့ ကျင်ဆန်းကျော့ဂိတ်နှင့် မန့်ဝိန်းဂိတ်တို့မှ ၆ ဘီး ကုန်တင်ကားများသာ ဝင်ထွက် သွားလာနိုင်သည့်အတွက် ကုန်တင်ကားကြီးများက ရပ်စောင့်နေရခြင်း ဖြစ်ကြောင်း အထက်ပါ ပုဂ္ဂိုလ်က ဆက်ပြောသည်။

တရုတ်ဘက်မှ မြန်မာဘက်သို့ တင်သွင်းသော ကုန်စည်များမှာ ဆိုင်ကယ်၊ စက်ပစ္စည်းများ၊ လျှပ်စစ် နှင့် ပတ်သက်သော ပစ္စည်းများ၊ ဘီယာ နှင့် စားသောက်ကုန် ပစ္စည်းများဖြစ်ကြောင်းလည်း သိရသည်။

တရုတ်ဘက်မှ နယ်စပ်ဂိတ် ပြန်လည် ဖွင့်လှစ်ခဲ့ပြီးသည့်နောက် တရုတ်ဘက်မှ မြန်မာရွှေ့ပြောင်း လုပ်သား အများအပြားလည်း နေရပ်ပြန်ပို့ခြင်း ခံရသည့်အပြင် အောက်မြန်မာပြည်ဘက်မှ အလုပ်သမားသစ်များလည်း အလုပ်အကိုင် ရှာဖွေရေးအတွက် မူဆယ်နှင့် နယ်စပ်ဒေသသို့ အများအပြား ရောက်လာကြောင်းလည်း အထက်ပါ ဒေသခံအမျိုးသားက ဆက်ပြောသည်။

“ရွှေနန်းတော် ဂိတ်ပေါက်ကနေ တရုတ်ပြည်ထဲ ရောက်နေတဲ့ မြန်မာရွှေ့ပြောင်းလုပ်သား ၃၀၀ လောက်က နေရပ်ပြန်ပို့ခံရတယ်၊ တရုတ်ဘက် အလုပ်လုပ်ဖို့ မူဆယ်မှာ လာစောင့်နေတဲ့ မြန်မာဘက်က လုပ်သားအသစ် တွေကိုတော့ တစ်ယောက်မှ ဝင်ခွင့် မပြုသေးဘူး၊ အခုလို လာစောင့်နေတဲ့ သူတွေလည်းအရမ်းများနေတော့ ပြဿနာတွေ တိုးလာမှာလည်းစိုးရိမ်ရတယ်၊ ခိုးဆိုးလုယက်မှုတွေလည်း ဖြစ်လာနိုင်တယ်လေ” ဟု ၎င်းက ပြောသည်။

မန့်ဝိန်း – ကျယ်ဂေါင် နယ်စပ်ဂိတ်ပေါက်ကို ပြီးခဲ့သည့် ဇန်နဝါရီလ ၁၄ ရက်တွင် ပြန်လည်ဖွင့်လှစ်ခဲ့ခြင်း ဖြစ်သော်လည်း ၄၈ နာရီအတွင်း စစ်ဆေးထားသည့် ကိုဗစ် ဆေးစစ်ချက်ပါသည့် ကုန်တင်ကား ၆ ဘီးကား တစ်မျိုးတည်းသာ ဝင်ထွက်ခွင့် ပြုနိုင်ပြီး လူအဝင်အထွက်ခွင့် မပြုသေးကြောင်း လည်း သိရသည်။

ကိုဗစ် – ၁၉ ကူးစက်ပျံ့နှံ့မှု မဖြစ်ခင် နယ်စပ်ကုန်သွယ်ရေးဂိတ် မဖြစ်ခင်တွင် မူဆယ် – တရုတ် နယ်စပ်ဂိတ်ပေါက်များမှ ကုန်တင်ကားများ၏ အတက်အဆင်းပြုလုပ်မှု တစ်နေ့တာအတွက် ကားအစီးရေ ၃,၀၀၀ ထက် မနည်း ရှိခဲ့ဖူးသော်လည်း ကိုဗစ် နောက်ဆက်တွဲကာလအတွင်း ၁/၄/၂၀၂၀ မှ ၈/၁/၂၀၂၃ ခုနှစ်အထိ တစ်နေ့အတွက် ကားအစီး ၁၀၀ ဝန်းကျင်သာ ရှိနေကြောင်းလည်း သိရသည်။