သျှမ်းပြည် တောင်ကြီးမြို့နယ်၊ ဟိုပုံးမြို့နယ် နှင့် ဆီဆိုင်မြို့နယ် (၃) မြို့နယ် ပါဝင်သည့် ပုံးအင်းဒေသတွင် နယ်လှည့်လည်ပြီး မျှော့ရှာဝယ်သူများက ဈေးကောင်းပေးပြီး ဝယ်ယူနေသဖြင့် တောင်သူများက လယ်၊ မြောင်းထဲရှိ မျှော့ကိုရှာကြပြီး ရောင်းနေကြောင်း စုံစမ်းသိရသည်။
ယခင်က မျှော့အစို တစ်ပိဿကို ကျပ် ၆ သောင်းအထိသာ စျေးကောင်းပေးပြီး ဝယ်ယူခဲ့ရာမှ လက်ရှိမှာ မျှော့အစို တစ်ပိဿကို ကျပ် ၈ သောင်းအထိ ဈေးကောင်းပေးပြီး ဝယ်ယူနေကြောင်း ပုံးအင်းဒေသခံ တောင်သူ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“အရင်လယ်လုပ်တဲ့ အချိန်တုန်းက မျှော့အစို တစ်ပိဿကို ၆ သောင်းကျပ်ပေါ့။ အခုက ဈေးတက်သွားပြီ။ မျှော့လည်း ရှားသွားတယ်။ အရင်က တစ်ယောက်ကို မျှော့အစို တစ်ပိဿ ၊ ၅၀ ကျပ်သား ရကြတယ်။ အခု မျှော့အစို တစ်ပိဿကို ၈ သောင်းကျပ် ပေးပြီးဝယ်နေတော့ မျှော့တောင် ရှားသွားတယ်။ မျှော့လည်း သိပ်မရကြတော့ဘူး “ ဟု ၎င်း အမျိုးသမီးက ပြောသည်။
အဆိုပါ မျှော့များကို ပုံးအင်းဒေသမှ မျှော့ပွဲစား တစ်ဦးထံ ရောင်းချပေးခဲ့ပြီး ထိုမှတစ်ဆင့် နယ်လှည့်လည်ပြီး မျှော့ရှာဝယ်သူ ပွဲစားများထံ ထပ်မံရောင်းချပေးခဲ့ကြောင်း သိရသည်။
“ အခုက မျှော့တွေ ရှားသွားတော့ ရသလောက်ပဲ သွားရောင်းပေးကြတယ်။ ပုံးအင်းမှာက မျှော့တွေကို လိုက်ဝယ်တဲ့သူရှိတယ်။ သူကနေပြီး မျှော့တွေ အများကြီးရပြီဆိုရင် နယ်လှည့်လည်ပြီး မျှော့လိုက်ဝယ်တဲ့ ပွဲစားတွေကို ပြန်ရောင်းပေးတယ် “ ဟု ၎င်း အမျိုးသမီးတစ်ဦးက ထပ်လောင်းပြောသည်။
အလားတူ ပုံးအင်းဒေသမှ မျှော့ရှာပြီး ရောင်းချနေရခြင်းမှာ အင်းလေးဒေသ နှင့် စံကားဒေသတို့တွင်လည်း ရှိကြောင်း သိရသည်။
ထို့အပြင် မျှော့ကို တစ်နည်းအားဖြင့် ဟင်းလျာအဖြစ် စားသုံးကြသလို တရုတ်နိုင်ငံတွင် မျှော့ကို တိုင်းရင်းဆေးဝါးကုသနည်းအဖြစ် သွေးတိုး၊ ဆီးချို ရောဂါသမားများကို သွေးစုပ်ထုတ်လေ့ ရှိကြောင်း သိရသည်။