သျှမ်းပြည် မူဆယ်ခရိုင်၊ မူဆယ်မြို့နယ်အတွင်းရှိ အငှားအိမ်ခန်း နှင့် ဆိုင်ခန်းများကို တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) က အခွန် (ဆက်ကြေး) လာရောက်ကောက်ခံနေကြောင်း ဒေသခံများထံမှ သိရသည်။

ပြီးခဲ့သည့် ဇွန် ၁၀ ရက်တွင် မူဆယ်မြို့ရှိ ကောင်းမူးတုံရပ်ကွက်၊ ဟိုနားရပ်ကွက် နှင့် တောင်ရပ်ကွက် စသည့် ရပ်ကွက်အတွင်းသို့ TNLA စစ်သားများ ဝင်ရောက်လာပြီး လိပ်စာကဒ်များ ပေးဝေကာ ပြည်သူများ အခွန်ပေးဆောင်ရန် ညွှန်ကြား ပြောဆိုခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။

“အိမ်ငှားတိုက်ခန်းတွေ၊ ပြီးတော့ ဆိုင်ခန်းတွေကိုလည်း ဆက်ကြေးပေးဖို့ လိပ်စာကဒ်ဝေသွားတယ်။ ဆောက် လက်စ တစ်ထပ်အိမ်ဆိုရင် ၅ သိန်းကျပ်၊ နှစ်ထပ် ဆိုရင် ၁၀ သိန်းကျပ် အဲ့လို ဆက်ကြေး ကောက်တာ။ အခုက အိမ်ငှားတွေကိုပါ တောင်းတယ်ဆိုတော့ တော်တော်ကိုလွန်လာပြီ” ဟု မူဆယ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်သည် စစ်အာဏာသိမ်းမှု နောက်ဆက်တွဲ နိုင်ငံရေး ရှုပ်ထွေးမှုကြောင့် ပြည်သူလူထုများ စားဝတ် နေရေးအတွက် အခက်အခဲရှိနေစဥ် TNLA တပ်ဖွဲ့မှ ယခုလို ဆက်ကြေးထပ်မံ ကောက်ယူသည့် အတွက် ပြည်သူများကို ဝန်ထုပ်ဝန်ပိုး ဖြစ်စေသည့်အကြောင်း ဒေသခံများက ပြောသည်။

ထို့အပြင် လက်ရှိ ဆက်ကြေးတောင်း ကောက်ယူသည့် အိမ်ငှား၊ အခန်းငှား၊ ဆိုင်ခန်းငှားများသည် ပထမဆုံး ဖြစ်နေကြောင်းလည်း အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။

“အရင်တုန်းကတော့ ဈေးဆိုင်တွေ၊ စီးပွားရေးသမားတွေကို ဆက်ကြေးပေးခိုင်းတာတော့ ရှိပါတယ်။ အခုလိုမျိုး အိမ်ငှား၊ အခန်းငှားတွေကို ကောက်တာ မရှိဖူးဘူး။ ဒါက ပထမဆုံး အကြိမ် ဖြစ်တယ်။ ဘယ်လိုပဲ ဖြစ်ဖြစ် အခြေခံ လူတန်းစားတွေအတွက်တော့ ခံရတာများပါတယ်” ဟု အထက်ပါ ဒေသခံ အမျိုးသားက သျှမ်းသံတော်ဆင့်ကို ပြောသည်။

ဆက်ကြေးပေးဆောင်ရန် TNLA တပ်ဖွဲ့မှ ဆက်ကြေးပေးရန် လာရောက်ပေးဝေသည့် လိပ်စာကဒ်တွင် TNLA တံဆိပ် နှင့် အတူ တအာင်းစာများ၊ Revenue Department ဆိုသည့် အင်္ဂလိပ်စာတန်း နှင့် ဖုန်းနံပါတ်များလည်း ပါရှိနေသည်။

ယင်းကဲ့သို့ အခွန်ကောက် ဆက်ကြေးတောင်းခြင်း ကိစ္စ နှင့် ပတ်သက်ပြီး လိပ်စာကဒ်ပါ ဖုန်းနံပါတ်ကို သျှမ်းသံတော်ဆင့်မှ ဆက်သွယ်ရာ အခွန် ဆက်ကြေး ပေးဆောင်ရန်အတွက် လိပ်စာကဒ်ပေးဝေခြင်း ဟုတ်မှန်ကြောင်း ဆိုသည်။

“ဟုတ်ပါတယ်။ ကျနော်တို့ တပ်ဖွဲ့က ပေးဝေတာ ဖြစ်ပါတယ်။ ဒီလိုလိပ်စာပေးဝေပြီး အခွန်ဆောင်ဖို့က ကြာခဲ့ပါပြီလေ” ဟု သျှမ်းသံတော်ဆင့်ကို ပြောသည်။

စစ်ကောင်စီမှ နိုင်ငံတော် အာဏာသိမ်းယူပြီးနောက်ပိုင်းတွင် TNLA တပ်ဖွဲ့သည် သျှမ်းပြည် မြောက်ပိုင်း တစ်လျှောက် လှုပ်ရှားမှုများ ပိုမိုများပြားလာပြီး အခွန်တိုးကောက်မှုတွေလည်း ယခင်နှစ်တွေထက် ပိုမိုများပြားလာကြောင်း ဒေသခံများကပြောသည်။

PSLF/ TNLA သည် မြန်မာစစ်တပ် နှင့် တစ်နိုင်ငံလုံး အပစ်အခတ်ရပ်စဲရေး သဘောတူညီမှုစာချုပ် (NCA) တွင် ပါဝင်လက်မှတ်ရေးထိုးထားခြင်း မရှိသော်လည်း မြောက်ပိုင်းမဟာမိတ်များ နည်းတူ တရုတ်ကိုယ်စားလှယ် နှင့် ယခုနှစ်အတွင်း တွေ့ဆုံဆွေးနွေးမှု ၂ ကြိမ်ထက်မနည်း ရှိခဲ့သည်။

ယင်းကဲ့သို့ တရုတ်အထူးကိုယ်စားလှယ် နှင့် တွေ့ဆုံဆွေးနွေးမှု အပြီး စစ်ကောင်စီ နှင့် TNLA တပ်ဖွဲ့ကြား ထိတွေ့တိုက်ပွဲများလည်း နည်းလာသည်။