သျှမ်းပြည် တောင်ကြီးခရိုင် မိုးဗြဲမြို့ စည်ကား (၂) ရပ်ကွက်ထဲတွင် နေထိုင်သည့် မိသားစု (၃) ဦး ကို စစ်ကောင်စီက သတ်ဖြတ်ခဲ့ကြောင်း စုံစမ်းသိရှိရသည်။
ပြီးခဲ့သည့် ဇွန် ၈ ရက်နေ့တွင် နေရပ်ပြန်သွားသည့် မိသားစု ၃ ဦး ကို စစ်ကောင်စီက သေနတ်ပစ် သတ်ဖြတ်လိုက်ကြောင်း မိုးဗြဲ ဒေသခံ တစ်ဦးက သျှမ်းသံတော်ဆင့် ကိုပြောသည်။
“သတ်ခံရတာတော့ ဟုတ်ပါတယ်။ ကျနော်လည်း အသေးစိတ်တော့ သေချာမသိဘူး။ ဖြစ်စဉ်က တိုက်ပွဲငြိမ်နေတော့ သူတို့အိမ်ပြန်သွားတယ်။ မြို့ထဲရောက်တော့ စစ်ကောင်စီ ကရှိနေတာ။ အဲ့တာ သမီးဖြစ်သူ နဲ့ အမေဖြစ်သူကို မုဒိမ်းကျင့်ပြီး သတ်လိုက်တယ်လို့ ကြားတယ်။ သေချာမသိရသေးဘူး။ အဖေကိုတော့ သေနတ်နဲ့ ပစ်သတ်တာတဲ့။ မိုးဗြဲမြို့ စည်ကား ရပ်ကွက် ၂ မှာဖြစ်တာပါ” ဟု မိုးဗြဲမြို့ ဒေသခံတစ်ဦးက ပြောသည်။
လက်ရှိ ထိုမိသားစု၏ ရုပ်အလောင်းကို စစ်ကောင်စီက ပြန်မပေးသေးကြောင်း သိရသည်။
ထို့အပြင် စည်ကားရပ်ကွက်ထဲရှိ လူငယ် ၂ ဦးကိုလည်း စစ်ကောင်စီက သေနတ်ဖြင့် ပစ်သတ်ခဲ့ကြောင်း သိရသည်။
“အဲ့နေ့မှာပဲ သူတို့ လူငယ် ၂ ဦးကို ထပ်ပစ်သတ်လိုက်တယ်။ ဦးခေါင်းကို ပစ်လိုက်တာ။ အခုက သူတို့ ပြည်သူတွေကို ဦးတည်ပြီးတော့ ပြန်သတ်နေတာ။ ကျား ၊ မ မရွေးသတ်နေတာပဲ။ သူတို့က မြို့ထဲမှာ တပ်စွဲပြီး နေထိုင်နေတာ” ဟု အထက်ပါသူက ပြောသည်။
အလားတူ မိုးဗြဲမြို့ထဲတွင် ဇွန် ၇ ရက်နေ့မှစပြီး တိုက်ပွဲ ငြိမ်နေသည့်အတွက် ပြည်သူများက နေရပ်ကို ပြန်သွားနေကြောင်း သိရသည်။
တိုက်ပွဲ ငြိမ်နေသော်လည်း စစ်ရေးတင်းမာမှုရှိနေသည့်အတွက်ကြောင့် ပြည်သူများအနေဖြင့် နေရပ်ကို မပြန်သေးရန်အတွက် မိုးဗြဲမြို့ ပြည်သူ့ကာကွယ်ရေးတပ်ဖွဲ့ ကယ်ဆယ်ရေးတပ်ဖွဲ့က တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ကျနော်တို့ ပြောချင်တာတော့ ပြည်သူတွေနေရပ်ကို မပြန်သေးတာကောင်းတယ်။ တိုက်ပွဲကတော့ ငြိမ်နေတာ ဒီနေ့နဲ့ ဆိုရင်တော့ ၃ ရက်လောက်ရှိပါတယ်။ ဒါမဲ့ စစ်ရေးတော့ တင်းမာနေတာရှိတယ်။ ပြီးခဲ့တဲ့ တိုက်ပွဲက စစ်ကောင်စီက အထိနာတယ်လေ။ အဲ့ကြောင့် အခုသူတို့ ပြည်သူတွေအပေါ် ပိုလုပ်တာလည်း ဖြစ်နိုင်တယ်” ဟု ၎င်းကပြောသည်။
ပြီးခဲ့သည့် ဇွန်လ ၅ ရက် မိုးဗြဲမြို့ တိုက်ပွဲထဲတွင်လည်း အသက် ၁၀ အောက်ကလေးငယ် တစ်ဦး လက်နက်ကြီးကြောင့် သေဆုံးသွားခဲ့ကြောင်း သိရသည်။
