သျှမ်းပြည် မူဆယ်ခရိုင်၊ ကွတ်ခိုင်မြို့နယ်အတွင်း၌ တစ်နေ့တည်းအတွင်း ပစ်ခတ်မှု နှစ်ကြိမ် ဖြစ်ပွားခဲ့သည့် အတွက် ဒေသခံများက ကတုတ်ကျင်းထဲ ဝင်ရောက်ခိုရကြောင်း စုံစမ်း သိရှိရသည်။
ယနေ့ ဇွန်လ ၉ ရက်နေ့ မနက်ပိုင်း ၁၀ နာရီ ၁၀ မိနစ်တွင် ကွတ်ခိုင်မြို့နယ်၊ နောင်ဆွေကျေးရွာအနီး၌ လက်နက်ကြီး / လက်နက်ငယ် ပစ်ခတ်သံများ စတင် ထွက်ပေါ်လာခဲ့ကြောင်း နီးစပ်သည့် ဒေသခံများက သျှမ်းသံတော်ဆင့်ကို ပြောသည်။
“လက်နက်ကြီးသံ အရင်ပေါ်လာတယ်၊ ပြီးမှ သေနတ်သံတွေ ထွက်လာတယ်၊ ရွာ နဲ့ အတော်နီးနေတော့ အားလုံးနီးပါးက ကတုတ်ကျင်းထဲ ဝင်ခိုကြရတယ်။ အဲ့ဒီ ပစ်ခတ်မှုက နာရီဝက်ကျော်တော့ ကြာသွားတယ်” ဟု ကွတ်ခိုင်မြို့နယ်မှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပစ်ခတ်မှု ငြိမ်သွားသည့်နောက် ရွာသားများ ကတုတ်ကျင်းထဲမှ ပြန်ထွက်လာပြီး ၁၀ မိနစ်ကျော်ကြာ ဝန်းကျင်တွင် နောက်ထပ် တစ်ဖန် ပစ်ခတ်သံများ ပေါ်ပေါက်လာကြောင်း ဒေသခံများက ထပ်ပြောသည်။
“ဒုတိယ အကြိမ် ပစ်ခတ်မှုက ၁၀ မိနစ်ကျော်တော့ ကြာတယ်။ ဒါလည်းလက်နက်ကြီးတွေပါတယ်။ ကတုတ်ကျင်းထဲ နောက်တစ်ဖန် ပြန်ဝင်ရတာပေါ့။ ဘယ်အဖွဲ့ နဲ့ ဘယ်အဖွဲ့ က ပစ်တာလဲ ဆိုတာတော့ မသိရဘူး” ဟု အထက်ပါ အမျိုးသမီးက သျှမ်းသံတော်ဆင့်ကို ပြောသည်။
ပစ်ခတ်သံများ ထွက်ပေါ်လာရာ နောင်ဆွေကျေးရွာသည် ကွတ်ခိုင် – မူဆယ်သွားသည့် ကားလမ်းမကြီးမှ ကွတ်ခိုင်မြို့နှင့် လေးမိုင်ခန့်သာ ကွာဝေးသည့် ကျေးရွာ တစ်ရွာဖြစ်ကြောင်းလည်း သိရသည်။
အဆိုပါ ပစ်ခတ်မှုသည် ကချင်လွတ်လပ်ရေးတပ်မတော် (KIA) နှင့် စစ်ကောင်စီတို့ ပစ်ခတ်မှု ဖြစ်ပွားခဲ့ကြောင်း ဒေသခံ အမျိုးသမီး တစ်ဦးကပြောသည်။
ကွတ်ခိုင်မြို့နယ် အတွင်းသည် စစ်ကောင်စီ တပ်ဖွဲ့ နှင့် ၎င်းတို့၏ လက်အောက်ခံ ပြည်သူ့စစ်တပ်ဖွဲ့ အပြင်၊ တိုင်းရင်းသား လက်နက်ကိုင် တပ်ဖွဲ့များ ဖြစ်ကြသည့် သျှမ်းပြည်တပ်မတော် SSPP/SSA ၊ ကချင်တပ်မတော် KIA နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တို့က သွားလာလှုပ်ရှားနေသည်။
ပြီးခဲ့သည့် ဇွန်လ ၅ ရက်နေ့မှာလည်း ကွတ်ခိုင်မြို့နယ်မှ အလယ်တန်းကျောင်းတစ်ကျောင်းကို စစ်ကောင်စီ လက်အောက်ခံ ပညာရေး စနစ် လက်မခံနိုင် ဆိုသည့် အကြောင်းပြချက်ဖြင့် ပိတ်သိမ်းရန် KIA တပ်ဖွဲ့က ပြောဆို ညွှန်ကြားမှု ရှိခဲ့သည်။
