သျှမ်း – ကရင်နီ နယ်စပ် ဖယ်ခုံမြို့နယ်တွင် တိုက်ပွဲပြင်းထန်မှုကြောင့် ဆေးဝါး နှင့် စားနပ်ရိက္ခာ သယ်ယူရန်ခက်ခဲလာရာ စစ်ရှောင်များ ဆေးဝါး နှင့် စားနပ်ရိက္ခာများ ပိုကြပ်တည်းလာကြောင်း စုံစမ်းသိရသည်။
ပြီးခဲ့သည့် ဖေဖော်ဝါရီ နောက်ဆုံးပတ်မှစပြီး ပင်လောင်း၊ ဖယ်ခုံ နှင့် မိုးဗြဲ မြို့နယ်တွင် စစ်ကောင်စီ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့ အကြား တိုက်ပွဲဖြစ်ပွားလာခဲ့ရာ လက်ရှိအချိန်ထိ ၃ လကျော်ကြာ တိုက်ပွဲသည် ဆက်လက် ပြင်းထန်နေဆဲဖြစ်သည်။
အဆိုပါ တိုက်ပွဲပြင်းထန်နေသည့် ဒေသတွင် စစ်ကောင်စီမှ စစ်ကြောင်းထိုးပြီး လမ်းပိတ်ဆို့ စစ်ဆေးရေး တင်းကြပ်ထားခြင်း၊ နေ့စဉ်နီးပါးလိုပင် တိုက်ပွဲဖြစ်နေခြင်းကြောင့် ဆေးဝါး နှင့် စားနပ်ရိက္ခာ သယ်ယူရန်အတွက် ပိုခက်ခဲလာကြောင်း ဖယ်ခုံမြို့ဒေသခံ စစ်ရှောင်ကော်မတီ ခွန်ထွန်း (အမည်လွှဲ) က ပြောသည်။
“တချို့တွေက သွားနေကျ မဟုတ်တော့ လမ်းကြောင်းတွေ မဖြတ်ရဲဘူး။ အလှူရှင်ရှိတောင်မှ လမ်းကြောင်းမှာ တိုက်ပွဲဖြစ်တာ၊ သူတို့လမ်းကြောင်း ပိတ်ထားတာတို့ အဲ့လိုမျိုးကျ ကားသမားတွေ သယ်ယူပို့ဆောင်ဖို့ မသွားရဲ၊ မလာရဲတော့ဘူး။ ဆန်ကို အကန့်အသတ်နဲ့ ဝေပေးရတယ်။ မလုံမလောက် ဖြစ်နေတယ် “ ဟု ၎င်းက ပြောသည်။
ဆေးဝါး နှင့် စားနပ်ရိက္ခာ သယ်ယူဖို့အတွက် ခက်ခဲလာသောကြောင့် စစ်ရှောင်များသည် ဆန်ကို အကန့်အသတ်ဖြင့် ဝေခွဲစားသောက်နေရခြင်းမှ စားနပ်ရိက္ခာ မဖူလုံသည့် အခက်ခဲ နှင့် ကြုံတွေ့နေရကြောင်း သိရသည်။
လက်ရှိမှာ တိုက်ပွဲကြောင့် နေရပ်စွန့်ပြီး ထွက်ပြေးတိမ်းရှောင်နေရသည့် ဖယ်ခုံမြို့နယ်ရှိ စစ်ရှောင်များသည် စုစုပေါင်း ကျေးရွာ (၈) ရွာခန့်မှ လူဦးရေ ၇ ထောင်ကျော် ရှိကြောင်း သိရသည်။
“ကျနော်တို့ ဖယ်ခုံ အနောက်ဖက်ခြမ်းကဆိုရင် လောလောဆယ် စစ်ရှောင်ဦးရေ ၇ ထောင်လောက်ရှိတယ်။ ရွာကတော့ ၈ ရွာလောက်ရှိတယ်။ ရွာကြီးတွေပေါ့။ အခုထိ နေရပ်ပြန်လို့ မရသေးဘူး။ မိုးဗြဲ နဲ့ ဖယ်ခုံအရှေ့ဖက်လိုက်ရှောင်တဲ့ စစ်ရှောင်တွေလည်း အဖွဲ့ရှိတယ်။ အဲ့မှာလည်း လူအင်အားလည်း များတယ် “ ဟု ခွန်ထွန်းက ထပ်လောင်းပြောသည်။
ထို့အပြင် တိုက်ပွဲပြင်းထန်စွာ ဖြစ်ပွားနေသည့် ပင်လောင်း၊ ဖယ်ခုံ နှင့် မိုးဗြဲ မြို့နယ်တွင် စစ်ကောင်စီမှ လေကြောင်း အသုံးပြုပြီး အရပ်သားနေအိမ်၊ စစ်ဘေးရှောင်စခန်း နှင့် ဘုန်းကြီးကျောင်းဆောင်များကို ပစ်မှတ် တိုက်ခိုက်နေလျက်ရှိကြောင်း သိရသည်။
