သျှမ်းပြည် လားရှိုးမြို့နယ် ဟန်နားရွာတွင် မိုးသည်းထန်စွာ ရွာသွန်းမှုကြောင့် ရေကြီးရေလျှံမှု ဖြစ်ပြီး နေအိမ် နှင့် စာသင်ကျောင်းအချို့ အုတ်တံတိုင်း ပြိုကျပျက်စီးမှုရှိခဲ့ကြောင်း စုံစမ်းသိရသည်။

ယမန်နေ့ (ဇွန်လ ၆) ရက် ညနေပိုင်း ၄ နာရီ အချိန်မှစပြီး လားရှိုးမြို့နယ် ဟန်နားရွာတွင် မိုးသည်းထန်စွာ ရွာသွန်းခဲ့ပြီး တောင်ကျချောင်းရေများ စီးဆင်းမှုကြောင့် နေအိမ် နှင့် စာသင်ကျောင်းအချို့ရှိ အုတ်တံတိုင်းပြိုကျခြင်း ရွှံ့၊ နှုံးများ ကျန်ရစ်ခြင်း နှင့် အိမ်တွင်းပစ္စည်း ပျက်စီးမှု ရှိခဲ့ကြောင်း ဟန်နားကျေးရွာ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“မနေ့ ညနေပိုင်းလောက်က မိုးစရွာတာ။ မိုးကတော့ ကြီးတယ်။ ဒါပေမယ့် ရွာတာတော့ ၁၅ မိနစ်လောက်ပဲ သိပ်မကြာလိုက်ဘူး။ နေအိမ်အထိ ရေတွေဝင်တယ်။ စာသင်ကျောင်း ရဲ့ အုတ်တံတိုင်းတွေလည်း ပြန်ဆောက်တာ မကြာသေးဘူး၊ အုတ်တံတိုင်း ပြန်ပြိုတာ။ တချို့အိမ်တွေလည်း အုတ်တံတိုင်း ပြိုတယ်။ အိမ်ထဲပစ္စည်းတွေ မျောကုန်တယ် “ ဟု ၎င်းအမျိုးသမီး တစ်ဦးက ပြောသည်။

အဆိုပါ မိုးသည်းထန်စွာ ရွာသွန်းမှုကြောင့် ဟန်နားရွာရှိ စာသင်ကျောင်း အပါအဝင် နေအိမ် အိမ်ခြေအားလုံး နီးပါးခန့် တောင်ကျချောင်းရေများ စီးဝင်ခဲ့ပြီး ရွှံ့၊ နှုံးများ ကျန်ရစ်ခဲ့သဖြင့် ပြည်သူများက ဝိုင်းဝန်းကူညီ ရှင်းလင်းနေကြကြောင်း သိရသည်။

“ မနှစ်ကလည်း ရေကြီးရေလျှံ ဖြစ်ဖူးတယ်။ ဒီနှစ်က ပိုဆိုးတာပေါ့။ ကျွန်မတို့ ရွာပတ်ပတ်လည်က တောင်တွေဆိုတော့ မိုးရွာရင် တောင်ကျချောင်းရေ စီးတာ။ ဒီနှစ် ရေကြီးရေလျှံတာ အိမ်တိုင်းလိုလို ကြုံနေရတယ်။ မနှစ်က ရေလွှဲမြောင်းလုပ်ပေးဖို့ တောင်းဆိုတယ်။ ရေလွှဲမြောင်းလုပ်ဖို့အတွက် ကုန်ကျစရိတ်ကများတော့ ရွာကလူတွေဘဲဆို မတတ်နိုင်ဘူး။ အစိုးရကလည်း လာမလုပ်ပေးဘူး “ ဟု အထက်ပါ အမျိုးသမီးက ထပ်လောင်းပြောသည်။

ယင်းကဲ့သို့ မိုးသည်းထန်စွာ ရွာသွန်းမှုကြောင့် နှစ်စဉ်နှစ်တိုင်း ရေကြီးရေလျှံဖြစ်ပွားမှု နှင့် ကြုံတွေ့နေရသည့် ဟန်နားရွာရှိ ပြည်သူများသည် ထပ်မံပြီး နှစ်ကြီးရေလျှံကြောင့် နေအိမ်များ ပျက်စီးမှု မရှိစေရေးအတွက် ရေလွှဲမြောင်း ဖော်ဆောင်ပေးရန် တောင်းဆိုနေကြကြောင်း သိရသည်။