သျှမ်းပြည် တောင်ကြီးခရိုင် မိုးဗြဲမြို့အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲ ဆက်လက်ပြင်းထန်နေသည့်အတွက်ကြောင့် ပြည်သူများ ထပ်မံ ထွက်ပြေးတိမ်းရှောင်နေရကြောင်း သတင်းရရှိသည်။

ပြီးခဲ့သည့် ဇွန်လ (၅) ရက်မှ စပြီး စစ်ကောင်စီသည် မိုးဗြဲမြို့အတွင်း စစ်ကြောင်းထိုးဝင်လာပြီး တိုက်ပွဲဖြစ်ပွားခဲ့သည့်အတွက်ကြောင့် မြို့တွင်းရှိ ပြည်သူများတစ်ချို့ တောထဲထွက်ပြေးတိမ်းရှောင်သွားကြောင်း သိရသည်။

ထိုအပြင် စစ်ကောင်စီသည် မိုးဗြဲမြို့အတွင်း Drone ဖြင့် ပျံသန်းသွားနေကြောင်း ဒေသခံများ ပြောပြချက်အရ သိရသည်။

“မြို့ပေါ်မှာ drone နဲ့ ပျံနေတာ။ ၄ ခုလောက်ရှိတယ်။ တိုက်ပွဲကြောင့် ရှောင်နေတဲ့သူတွေကလည်း ရှောင်နေကြပါတယ်။ မရှောင်တဲ့သူတွေလည်းရှိတယ်။ တောထဲပဲ ရှောင်သွားကြတာတွေလည်းရှိပါတယ်။ တချို့က ငွေကြေးအခက်ခဲရှိလို့ မရှောင်နိုင်တဲ့သူတွေလည်းရှိတယ်” ဟု မိုးဗြဲမြို့ ဒေသခံအမျိုးသားတစ်ဦးက ပြောသည်။

ထိုအပြင် စစ်ကောင်စီတပ်ဖွဲ့သည် မိုးဗြဲမြို့အတွင်း စစ်ကောင်စီက အသွားလာ ကန့်သတ်ထားပြီး ပြည်သူများကိုလည်း ပတ်သက်မှုရှိနေကြောင်း ဒေသခံပြောပြချက်အရ သိရသည်။

“ထိခိုက်မှုတွေ ဘယ်လောက်ရှိလဲတော့ လောဆယ် မသိသေးဘူး။ မြို့ထဲမှာက စစ်ရေးတင်းမာနေလို့ သွားလာခွင့်မပြုဘူး။ စစ်တပ်တွေကတော့ အကုန်ပစ်တယ်။ ပြည်သူဖြစ်ဖြစ်၊ ဘာဖြစ်ဖြစ် အကုန်ပစ်တယ်။ ပြည်သူတွေသေတာလည်း ၃ ယောက်လောက်ရှိနေပြီ။ လက်နက်ကြီးတွေနဲ့ကော လက်နက်ငယ်တွေနဲ့ ကောပစ်တယ်” ဟု ၎င်းကပြောသည်။

စစ်ကောင်စီတပ်ဖွဲ့သည် လွိုင်ကော်ဘက်မှ တစ်ဆင့် မိုးဗြဲမြို့ထဲတွင် စစ်ကြောင်းထိုးဝင် လာခဲ့သည့် အတွက်ကြောင့် တိုက်ပွဲပြင်းထန်လာခဲ့ပြီး ၊ ယနေ့အထိ စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ စစ်ရေးတင်းမာနေလျက်ရှိကြောင်း သိရသည်။

“ စစ်ရေးတော့ တင်းမာနေပါသေးတယ်။ စစ်ကောင်စီက လွိုင်ကော်ဘက်ကနေ စစ်ကြောင်းထိုးလာလို့ တိုက်ပွဲဖြစ်ပွားခဲ့တာ” ဟု မိုးဗြဲမြို့ ပြည်သူ့ကာကွယ်ရေးတပ်ဖွဲ့ PDF တပ်ဖွဲ့ဝင်တစ်ဦးက ပြောသည်။

ပြီးခဲ့သည့် ဇွန်လ (၅) ရက်နေ့တွင် မိုးဗြဲမြို့ ပြည်သူ့ကာကွယ်ရေးတပ် Bo 1 ၊ ကရင်နီ အမျိုးသားများ ကာကွယ်ရေးတပ် KNDF နှင့် မြို့ပြတော်လှန်ရေးတပ်ဦး URF ပူးပေါင်းတပ်တို့ နှင့် စစ်ကောင်စီတို့က တိုက်ပွဲဖြစ်ပွားခဲ့ကြောင်း သိရသည်။

အဆိုပါ တိုက်ပွဲအတွင်း စစ်ကောင်စီဘက်က ၁၀ ဦး သေဆုံးခဲ့ပြီး ပြည်သူဘက်မှ ကလေးငယ်တစ်ဦး သေဆုံးခဲ့ပြီး နေအိမ် ၂ လုံးပျက်စီးသွားခဲ့ကြောင်း သိရသည်။