သျှမ်းပြည် မူဆယ်မြို့နယ် နမ့်အွမ်ကျေးရွာအုပ်စုအတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA က သေနတ်ပစ်ဖောက်ပြီး လူဖမ်းဆီးခေါ်ဆောင်သွားခဲ့ကြောင်း သတင်းရရှိသည်။
ယမန်နေ့ ဇွန် ၅ ရက်နေ့တွင် နမ့်အွမ်ကျေးရွာအုပ်စုအတွင်း SSPP/SSA တပ်ဖွဲ့က သေနတ်ပစ်ဖောက်ပြီး နမ့်အွမ်ကျေးရွာဒေသခံ နှင့် ကောင်းဝိန်းကျေးရွာဒေသခံ (၄) ဦးကို ဖမ်းဆီးသွားခဲ့ကြောင်း သိရသည်။
“ကောင်းဝိန်းဘက် နဲ့ နမ့်အွမ်ဘက်က လူတွေကို ဖမ်းသွားတာ။ မနေ့က လာဖမ်းသွားတာ။ (၄) ယောက်လောက်ဖမ်းသွားတယ်လို့ပြောတယ်။ သေနတ်တွေ ပစ်ဖောက်ပြီးတော့ ဖမ်းသွားတာ။ ဒီနေ့ ထပ်လာသေးတယ်။ ဒီနေ့လည်း သေနတ်ပစ်ဖောက်ပြီးတော့ ရွာတွေထဲ ဝင်လာတာ” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
ယနေ့ ဇွန်လ ၆ ရက်နေ့တွင်လည်း တိန်းလုံကျေးရွာထဲကို သေနတ်ပစ်ဖောက်ပြီး ဝင်ရောက်လာခဲ့ကြောင်း သိရသည်။ သို့သော် ယနေ့အတွက် တပ်သားမည်မျှ ရရှိသွားသည်ကို မသိရှိရသေးပေ။
ထိုအပြင် SSPP/SSA တပ်ဖွဲ့မှ မူဆယ်မြို့နယ် ၊ နမ့်ခမ်းမြို့နယ်တွင်းရှိ ကျေးရွာများထဲတွင် ၁၀ အိမ်ကို တပ်သား ၂ ယောက်ပေးဆောင်ရမည်ဟု ညွှန်ကြားထားကြောင်း ဒေသခံများ ပြောပြချက်အရ သိရသည်။
“ သူတို့လာကောက်မယ်ဆိုပြီးတော့ ကျနော်တို့ ကျေးရွာဘက်တွေမှာတော့ လာပြောသွားတာတော့ ရှိတယ်။ ဒီနေ့မှ လာပြောသွားတာ။ သူတို့ (၅) ရက် အချိန်ပေးမယ်တဲ့။ သူတို့တပ်သားတောင်းတာက ဥပမာ ၁၀ အိမ်ဆိုရင် ၂ ယောက်ပေးရမယ်တဲ့။ ရွာတစ်ရွာမှာ အိမ်ခြေ ၁၀၀ ရှိရင် လူ ၂၀ ပေးရမှာပေါ့။ ပြီးတော့ သူတို့နား စစ်သင်တန်း ၁ လ သွားသင်ပြီးရင် ၁ လ အိမ်မှာ ပြန်လာနေလို့ရတယ်တဲ့။ ဒါမဲ့ စစ်ထဲတော့ ရာသက်ပန်နေရမယ်တဲ့” ဟု မူဆယ်မြို့ ဒေသခံ တစ်ဦးက ပြောသည်။
ထိုသို့ SSPP/SSA တပ်ဖွဲ့မှ တပ်သားတွေကို လိုက်လံစုဆောင်းနေသည့်အတွက်ကြောင့် မူဆယ်မြို့နယ် ၊ နမ့်ခမ်းမြို့နယ်ရှိ ကျေးရွာဒေသခံများတစ်ချို့က ထွက်ပြေးတိမ်းရှောင်နေကြောင်း သိရသည်။
“ နမ့်အွမ်ကျေးရွာဒေသခံတွေဆိုရင် မူဆယ်မြို့ပေါ်ကို ထွက်လာခဲ့တာတွေရှိတယ်။ သူတို့ တပ်သားလာကောက်မယ်လို့ ပြောတော့ တစ်ချို့တွေက ထွက်ပြေးနေကြပြီ။ သူတို့ပြောတာတော့ မူဆယ်မြို့နယ် ၊ နမ့်ခမ်းမြို့နယ် နဲ့ ပန်ဆိုင်းဘက်ကလူတွေကို တပ်သားလာကောက်မယ်လို့ပြောတယ်။ အခုတော့ မြို့ပေါ်တွေ ၊ တစ်ခြားနေရာတွေကို ပြောင်းရွှေ့နေကြပြီ” ဟု နမ့်အွမ်ကျေးရွာအတွင်း သွားလာခဲ့သည့် အမျိုးသားတစ်ဦးက ပြောသည်။
အလားတူ SSPP/SSA တပ်ဖွဲ့သည် နမ့်လန်မြို့ထဲတွင်လည်း ညအချိန်တွေမှာ တပ်သားလိုက်လံစုဆောင်းနေလျက်ရှိသည်။
ထိုအပြင် နမ့်ခမ်းမြို့ပေါ်တွင်လည်း တအာင်း (ပလောင်) အမျိုးသားလွတ်မြောက်ရေးတပ်မတော် TNLA က တပ်သားလိုက်လံစုဆောင်းနေသည့်အပြင် အခွန်တွေကိုလည်း လိုက်ကောက်နေသည်။
Leave a Comments