သျှမ်းပြည် လားရှိုးခရိုင် သိန္နီမြို့နယ် ဒေသခံ လူငယ် ၂ ဦး လားရှိုးမြို့သို့ ပိုက်ဆံသွားကောက်မည်ဟုဆိုပြီး ၁၀ ရက်ကျော်ကြာ ပျောက်ဆုံးနေကြောင်း စုံစမ်းသိရှိရသည်။
ပြီးခဲ့သည့် မေလ ၂၁ ရက်နေ့တွင် သိန္နီမြို့မှ လားရှိုးမြို့သို့ Wish ကားတစ်စီးဖြင့် သွားခဲ့ပြီး ယနေ့ထိ ဖုန်းအဆက်သွယ် မရရှိတော့ကြောင်း သိရသည်။
“ဒီနေ့ထိ ဖုန်းအဆက်သွယ် မရတော့ဘူး။ အဲ့နေ့က လားရှိုးသွားပြီး ပိုက်ဆံသွားယူမယ်ဆိုပြီး ကျနော်နား ကားလာငှားသွားတာ။ အဲ့ညထိ ဖုန်းဆက်လို့ရသေးတယ်။ နောက်နေ့ရောက်တော့ ဖုန်းဆက်လို့ မရတော့ဘူး။ ပျောက်သွားတဲ့ ၂ ယောက်လုံးက ကျနော်အသိတွေပဲ။ တစ်ယောက်က ကျနော့်တူလေး တစ်ယောက်က ကျနော်သူငယ်ချင်းဖြစ်တယ်” ဟု အဆိုပါ ပျောက်ဆုံးသွားသူနဲ့ ရင်းနှီးသူက ပြောသည်။
အဆိုပါ ပျောက်ဆုံးသွားသူသည် အသက် (၂၁) နှစ်အရွယ် စိုင်းဟန်ဖ နှင့် အသက် (၁၉) နှစ်အရွယ် စိုင်းဟန်လင်း တို့ဖြစ်ပြီး ၊ ၎င်း ၂ ဦးသည် လားရှိုးမြို့ ရောက်ရှိသွားချိန်တွင် ရပ်ကွက် ၅ အတွင်းရှိ စားသောက်ဆိုင်ထဲဝင်စားပြီးနောက် သိန္နီမြို့သို့ ပြန်လာချိန်တွင် ပျောက်ဆုံးသွားကြောင်း သိရသည်။
“ သူတို့ လားရှိုးရောက်သွားတော့ သူတို့ သူငယ်ချင်းတစ်ယောက်ကို ခေါ်လိုက်တယ်တဲ့။ ပြီးတော့ ရပ်ကွက် (၅) မှာရှိတဲ့ စားသောက်ဆိုင်မှာ ဝင်စားသွားတယ်တဲ့။ ဆိုင်ကနေ ပြန်ထွက်လာပြီးကတည်းက ပျောက်သွားတာ။ လုံးဝ အဆက်သွယ် မရတော့ဘူး” ဟု အထက်ပါသူက ပြောသည်။
ထိုသို့ပျောက်ဆုံးသွားသည့်အတွက်ကြောင့် လက်နက်ကိုင်တပ်ဖွဲ့များက ဖမ်းဆီးသွားမှာကို စိုးရိမ်နေကြသည်။
“အဲ့ဘက်မှာကလည်း လက်နက်ကိုင်တွေလည်း များတယ်လေ။ ကျနော်တို့ တိုင်းရင်းသားလက်နက်ကိုင်ထဲတော့ မေးမြန်းထားတာရှိပါတယ်။ ကျနော်နဲ့တော့ ပြဿနာဖြစ်တာမျိုးတော့ မရှိဘူး။ လက်နက်ကိုင်တွေ ဖမ်းသွားမှာကို စိုးရိမ်တာပေါ့” ဟု ပျောက်ဆုံးသွားသူ နှင့် ရင်းနှီးသူက ပြောသည်။
အလားတူ ပြီးခဲ့သည့် မေလ ဒုတိယပတ်အတွင်းတွင် တအာင်း (ပလောင်) အမျိုးသားလွတ်မြောက်ရေးတပ်မတော် TNLA က လားရှိုးမြို့အတွင်း တပ်သားစုဆောင်းရန်အတွက် လူငယ်များကို လာရောက်ဖမ်းဆီးသွားခဲ့သည်။
Leave a Comments