သျှမ်းပြည် မုံးကိုးခရိုင် MNDAA ကိုးကန့်တပ်ဖွဲ့ ထိန်းချုပ်နယ်မြေ အတွင်း ပြည်သူ (၄) ဦးကို ပြန်ပေးဆွဲမှု နှင့် ရာဇဝတ်မှုကျူးလွန်သဖြင့် တရားဥပဒေ အရ တရားစီရင် ထောင်ဒဏ်ချမှတ်ခဲ့ကြောင်း သိရှိရသည်။
ပြီးခဲ့သည့် ဇွန် (၅) ရက်တွင် မုံးကိုးခရိုင် ပန်ဆိုင်းဒေသအတွင်း လက်နက်ကိုင် ပြန်ပေးဆွဲခြင်း နှင့် လူသတ် ရာဇဝတ်မှု ဂိုဏ်းကို ဖမ်းဆီးပြီး အထူးဒေသ (၁) အုပ်ချုပ်ရေးအဖွဲ့ ယာယီတရားခုံရုံး၌ သက်ဆိုင်ရာ ပြစ်မှု အသီးသီးဖြင့် တရားစီရင်ခဲ့ကြောင်း The Kokang က ထုတ်ပြန်ထားသည်။
အဆိုပါ (၄) ဦးသည် လီအင်ဖူ၊ ဟုတ်ချင်ပန်း၊ ရန်မင်ဟွေ နှင့် အိုက်မောင် တို့ဖြစ်ပြီး လီအင်ဖူ ဆိုသူသည် ဦးဆောင်ပြီး ပြန်ပေးဆွဲခြင်း၊ လူရောင်းဝယ်ခြင်း နှင့် လူသတ်ခြင်းတို့ ကျူးလွန်ခဲ့ကြောင်းလည်း သိရသည်။
လီအင်ဖူ နှင့် ဟုတ်ချင်ပန်း တို့သည် စစ်ကောင်စီလက်အောက်ခံ မုံးကိုးပြည်သူ့စစ် တပ်ဖွဲ့ဝင်များလည်း ဖြစ်သည်ဟု ဖော်ပြထားသည်။ ထို အမျိုးသား (၄) ဦးသည် မှုခင်း (၁၃) မှု ကျူးလွန်ခဲ့ပြီး တရုတ် လူမျိုး (၁၄) ဦးကို ပြန်ပေးဆွဲပြီး မူဆယ်လိမ်လည် ကုမ္ပဏီ သို့ ရောင်းချပေးခဲ့ကြောင်း ထုတ်ပြန်ထားသည်။
ထိုအမှု နှင့် ပတ်သက်သော ငွေကြေး တရုတ်ငွေ ၄ သိန်း ၈ သောင်း မြန်မာငွေ ကျပ် သိန်း (၃၈၀) ရရှိပြီး မျှဝေသုံးစွဲကြောင်း ထုတ်ပြန်ထားသည်။
ခေါင်းဆောင်ဖြစ်သူ လီအင်ဖူ ကို ပြန်ပေးဆွဲမှု နှင့် လူရောင်းချမှု ကြောင့် ထောင်ဒဏ် (၁၀) နှစ် ချမှတ်ခြင်း၊ ဟုတ်ချင်ပန် နှင့် ရန်မင်ဟွေ ဆိုသူကို ပြန်ပေးဆွဲမှု ၊ လူရောင်းချမှုကြောင့် ထောင်ဒဏ် (၈) နှစ်ချမှတ်ပြီး အိုက်မောင်ဆိုသူကို အဖွဲ့ဝင်အတွက် အဓိက အချက်လက် ပေးခြင်း နှင့် ကြံရာပါ ခြင်းဖြစ်သည့်အတွက် ထောင်ဒဏ် (၃) နှစ် ချမှတ်ခဲ့ကြောင်း The Kokang က ထုတ်ပြန်ထားသည်။
