သျှမ်းပြည် မိုးဗြဲမြို့တွင် စစ်ကြောင်းထိုးလာသော စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ် PDF ပူးပေါင်းမဟာမိတ်တပ်ဖွဲ့တို့အကြား ဇွန် ၅ ရက်နေ့က တိုက်ပွဲဆက်လက် ပြင်းထန်မှု ဖြစ်ပွားခဲ့ကြောင်း စုံစမ်းသိရသည်။
ယမန်နေ့ ဇွန်လ ၅ ရက် နံနက်အစောပိုင်းမှ ညနေပိုင်းအထိ မိုးဗြဲမြို့အတွင်း စစ်ကြောင်းထိုးလာသော စစ်ကောင်စီတပ်ဖွဲ့နှင့် မိုးဗြဲကာကွယ်ရေးတပ် ( MBPDF B-01)၊ ကရင်နီ အမျိုးသားကာကွယ်ရေးတပ် (KNDF B-03) နှင့် မြို့ပြတော်ရေးတပ်ဦး (URF) ပူးပေါင်းတပ်ဖွဲ့တို့အကြား တိုက်ပွဲပြင်းထန်စွာဖြစ်ပွားခဲ့ပြီး စစ်ကောင်စီဘက်မှ (၁၀) ဦးထက်မနည်း သေဆုံးခဲ့ကြောင်း MBPDF မှ ဇွန်လ ၅ ရက်နေ့က သတင်းထုတ်ပြန်ထားသည်။
“ တိုက်ပွဲက တပေါင်းလထဲက စဖြစ်လာတာ အခုရက်ပိုင်းမှာတော့ အကြမ်းဆုံးလို့ ပြောရမှာပေါ့။ အရပ် မျက်နှာအစုံကို ပိတ်ပြီး တစ်ပေါက်၊ နှစ်ပေါက်လောက်ကို ဟန်ပြဖွင့်ပြီး အကုန်ညှပ်တိုက်တဲ့ ပုံစံမျိုး ဖြစ်နေတယ်။ ကယားမှာ လမ်းတွေ အကုန်ပိတ်ထားတယ်။ ဇရပ်ဖြူလမ်းလေးကို ဖွင့်လိုက်၊ ပိတ်လိုက်နဲ့ လုပ်ကြတယ်။ ကျန်တဲ့လမ်းလေးကို စိုးရိမ်စိတ်မရှိ၊ မတားဘဲ သွားကြလာကြတယ်။ နှစ်ဘက်စလုံး case က အဲ့မှာစတာပဲ “ ဟု သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
အဆိုပါ ပြင်းထန်စွာ ဖြစ်ပွားခဲ့သည့် တိုက်ပွဲအတွင်း စစ်ကောင်စီဘက်မှ ၁၀ ဦးထက်မနည်း သေဆုံးပြီး ပြည်သူ့ကာကွယ်ရေး ပူးပေါင်းတပ်ဖွဲ့ဘက်မှ (၂) ဦး ထိခိုက်ဒဏ်ရာရရှိခဲ့သည်။
ဆက်လက်ပြီး ဒေသခံ တစ်ဦးက “ စစ်ကောင်စီဘက်ကလည်း လမ်းဖွင့်အချိန် သူ့လူတွေကို ခရီးရောက်သလောက် အရောက်ပို့တယ်။ PDF တွေဘက်ကလည်း လမ်းဖွင့်ချိန် ပစ္စည်းရိက္ခာသယ်ကြတယ်။ လမ်းက ခဏလေး ဖွင့်တာပဲဆိုတော့ သူအရေး၊ ကိုယ့်အရေး မကြည့်တော့ဘူး။ စစ်ကောင်စီကလည်း ဒီဘက်ကိုမကြည့် ဇွတ်တက်၊ ဒီဘက်ကလည်း ဇွတ်သယ်တော့ နောက်ဆုံးချောင်ပိတ်ပြီး နှစ်ဘက်ထိတွေ့ကြတာ “ ဟု ၎င်းက ထပ်လောင်းပြောသည်။
ထို့အပြင် ယမန်နေ့ တိုက်ပွဲအတွင်း စစ်ကောင်စီဖက်မှ အဝေးပစ် လက်နက်ကြီးဖြင့် ဆက်တိုက် ပစ်ခတ်ခဲ့သောကြောင့် အသက် ၁၀ နှစ်အောက် ကလေးငယ်တစ်ဦး လက်နက်ကျည်ထိမှန်ပြီး သေဆုံးသွားခဲ့ရကာ အရပ်သားနေအိမ် (၂) လုံး မီးလောင်သွားခဲ့ကြောင်း သိရသည်။
အလားတူ မေလ ၄ ရက် ညပိုင်းတွင်လည်း စစ်ကောင်စီတပ်ဖွဲ့မှ မိုးဗြဲမြို့ပေါ်ကို အဝေးပစ် လက်နက်ကြီးဖြင့် ပစ်ခတ်ခဲ့သဖြင့် အရပ်သား ပြည်သူ (၂) ဦး ထိခိုက်ဒဏ်ရာ ရရှိခဲ့သည်။
မိုးဗြဲမြို့တွင် ဇွန်လ ၅ ရက်အထိ တိုက်ပွဲပြင်းထန်နေသေးသောကြောင့် မိဘပြည်သူများ အနေဖြင့် တိုက်ပွဲများ ဖြစ်ပွားနေရာများရှိ အနီးတဝိုက်တွင် အသွားအလာ မပြုလုပ်ကြရန် ၎င်းပြည်သူ့ကာကွယ်ရေးတပ်ဖွဲ့မှ အသိပေးထားသည်။
