သျှမ်းပြည် ဆီဆိုင်မြို့နယ် နောင်ကျောကျေးရွာအုပ်စု ကယန်းလေးရွာရှိ မူလတန်းကျောင်းတွင် စစ်ရှောင် ကလေးများလာသည့်အတွက် စာသင်ကျောင်းဆောင် မလုံလောက်မှု ဖြစ်နေကြောင်း စုံစမ်းသိရသည်။
အဆိုပါ ကယန်းလေးရွာရှိ အစိုးရ မူလတန်းကျောင်းတွင် ကျောင်းခန်း (၅) ခန်း သာရှိပြီး လူဦးရေ ၁၇၀ ဝန်းကျင်သာဆံ့သည်။
“ ရွာခံကော၊ စစ်ရှောင်ကော လူဦးရေများလာတာ။ ကျနော်တို့ စစ်ရှောင်ကလေးဆိုရင် ၁၀၀ တိတိရှိတယ်။ စစ်ရှောင်ကလေးကော၊ ဘေးရွာက ကလေးကော၊ ရွာခံက ကလေးကော အကုန်လုံး အယောက် (၂၅၀) လောက်ရှိတယ်။ ကျောင်းဆောင်က လူဦးရေ ၁၇၀ ဝန်းကျင်လောက်ပဲ ဆံ့တယ်။ အခုက ကျောင်းဆောင် မလုံလောက်ဘူး ဖြစ်နေတယ် “ ဟု ၎င်း ဒေသခံတစ်ဦးက ပြောသည်။
အဆိုပါ မူလတန်းကျောင်း ကလေးငယ် ဦးရေများလာသည်နှင့်အမျှ ကျောင်းဆောင်မလုံလောက်မှု ဖြစ်သည့်အပြင် ဆရာ၊ ဆရာမ မလုံလောက်မှုနဲ့လည်း ကြုံတွေ့နေရကြောင်း သိရသည်။
ထို့အပြင် ကလေးငယ်များအတွက် အဆင်ပြေပြေ စာသင်ကြားနိုင်ရန်အတွက် ဆရာ၊ ဆရာမ အသစ်ကို ထပ်မံခန့်ထားရန် လိုအပ်နေပြီး၊ စစ်ဘေးရှောင်များအတွက် ကိုယ်ထူကိုယ်ထ ကျောင်းဖွင့်လှစ်ပေးရန်အတွက်လည်း ငွေရေးကြေးရေး အကူညီ လိုအပ်နေကြောင်း အထက်ပါ ဒေသခံတစ်ဦးက ဆက်ပြောသည်။
“နဂိုက အစိုးရ ဆရာမ နှစ်ယောက်ပဲရှိတာ။ အခုက ဆရာမ မလုံလောက်တာရယ်၊ ကျောင်းဆောင် မလုံလောက်တာရယ်ကြောင့် ကလေးတွေက စာသင်ဖို့ အဆင်မပြေတော့ဘူး။ ဖြစ်နိုင်ရင်တော့ စစ်ရှောင်ကလေးတွေ အတွက် သပ်သပ် ကိုယ်ထူကိုယ်ထ ကျောင်းလေး ဆောက်ပေးနိုင်ရင် ကောင်းမယ် “ ဟု ၎င်းက ထပ်လောင်းပြောသည်။
တိုက်ပွဲကြောင့် ဆီဆိုင်မြို့နယ်အတွင်းသို့ ထွက်ပြေးတိမ်းရှောင်လာရသူ ဦးရေ စုစုပေါင်း (၈) ထောင်လေးရာကျော် ရှိနေပြီး လက်ရှိ စစ်ရှောင်များသည် စားနပ်ရိက္ခာ စတင်ပြတ်လပ်မှု နှင့် ရင်ဆိုင်နေရကြောင်း သိရသည်။
ထို့အပြင် မြန်မာနိုင်ငံတစ်ဝှမ်းလုံး စားနပ်ရိက္ခာ အရေးပေါ် လိုအပ်နေသည့် လူဦးရေ ၂.၁ သန်းအတွက် နှစ်ကုန်အထိ အမေရိကန် ဒေါ်လာသန်း ၆၀ လှူရန် WFP ကမေတ္တာရပ်ခံထားသည်။
အဆိုပါ ရန်ပုံငွေများ မရရှိပါက WFP ၏ အစီအစဉ်များသည် ယခုနှစ် သြဂုတ်လတွင် ရပ်တန့်ရမည်ဖြစ်ကြောင်း သိရသည်။
Leave a Comments