ထိုင်းနိုင်ငံ ချင်းမိုင်ခရိုင် သရဖီ (Saraphi) မြို့နယ် နောင်ဖင်ကျေးရွာအုပ်စုရှိ ကညင်ဖြူပင် ကျိုးကျပြီး မြန်မာရွှေ့ပြောင်းအလုပ်သမား အမျိုးသား (၁) ဦးပေါ် ပြုတ်ကျကာ သေဆုံးခဲ့ကြောင်း စုံစမ်းသိရှိရသည်။
ပြီးခဲ့သည့် မေ (၃၁) ရက် ညနေပိုင်း (၅) နာရီတွင် ဆိုင်ကယ်စီးလာသည့် အသက် (၃၇) နှစ်အရွယ် အမျိုးသားပေါ် ကညင်ဖြူ သစ်ကိုင်းခြောက် ကျိုးကျသဖြင့် သေဆုံးသွားခဲ့ကြောင်း သိရသည်။
အဆိုပါ သေဆုံးသူသည် နမ့်ဖိန်အိမ်ယာတွင်နေထိုင်သည့် သူဖြစ်ပြီး ညနေပိုင်းအချိန် ဆိုင်ကယ်စီးပြီး စားသောက်စရာထွက်ဝယ်စဥ် သစ်ကိုင်းခြောက်ပြုတ်ကျ သဖြင့် သေဆုံးသွားသည်။
“သူက ဆိုင်ကယ်စီးပြီး စားစရာထွက်ဝယ်ချိန်မှာဖြစ်တာ။ အဲ့သစ်ပင်အောက်ရောက်တော့ သစ်ပင်က ပြုတ်ကျသွားတာ။ ဆိုင်ကယ်တခြား လူတခြား ရောက်သွားပြီးတော့ သစ်ပင်က လူပေါ်ပိပြီး သွေးထွက်သံယိုဖြစ်ခဲ့တယ်။ ဒါပေမယ့် အဲ့ချိန်မှာ သူ့ကို လာကူတဲ့သူတွေကို စကားပြောနိုင်သေးတယ်” လို့ Chiang Mai News က ရေးသားထားသည်။
သက်ဆိုင်ရာ လူမှုကယ်ဆယ်ရေးအဖွဲ့က လာရောက်ကူညီပြီး ဆေးရုံသို့ ပို့ဆောင်စဥ် သေဆုံးသွားခဲ့ကြောင်း သိရသည်။
သေဆုံးသူ အမျိုးသား စိုင်းတား သည် အမျိုးသမီး နှင့် ကလေးငယ် ကျန်ရှိခဲ့ပြီး၊ ဆိုင်ကယ် အာမခံ ကုမ္ပဏီမှ ကျန်ရှိသူ ဇနီး နှင့် ကလေးငယ် ကို ကူညီသွားဖို့ ဆောင်ရွက်နေကြောင်း သိရှိရသည်။
ချင်းမိုင်မြို့နယ် Saraphi မြို့နယ်ရှိ ကညင်ဖြူပင်၏ သက်တမ်းသည် (၁၀၀) နီးပါး ရှိပြီဖြစ်ပြီး နှစ်စဥ်နှစ်တိုင်း သစ်ကိုင်းခြောက်များ ကျိုးကျခဲ့သည်။ ထို့အတွက်ကြောင့် မိုးရာသီ မဝင်ခင်ကာလကတည်း သက်ဆိုင်ရာ မြို့နယ် စည်ပင်သာယာရေး မှ သစ်ပင် သစ်ကိုင်းများကို ရှင်းလင်းထားကြောင်းလည်း သိရသည်။
ပြီးခဲ့သည့် ၂၀၂၂ ခုနှစ်ကုန်ပိုင်း ကလည်း ကျောင်းသား မိဘ မှ ကလေးကို ကျောင်းကြိုချိန် ပြန်လာစဥ် ကညင်ဖြူ သစ်ကိုင်းခြောက် ကျိုးကျပြီး ကလေး တစ်ဦး ထိခိုဒဏ်ရာ ရရှိခဲ့သော်လည်း သေဆုံးခြင်းတော့ မရှိခဲ့ပေ။
Leave a Comments