တရုတ်နိုင်ငံအစိုးရ၏ဖိအားကြောင့် ညီနောင်မဟာမိတ် သုံးဖွဲ့ ဖြစ်ကြသည့် ကိုးကန့်တပ်ဖွဲ့ (MNDAA) ၊ တအာင်း (ပလောင်) တပ်ဖွဲ့ TNLA ၊ ရခိုင့် တပ်တော် AA တို့နှင့် စစ်ကောင်စီ တို့ ပထမဆုံး အကြိမ် အနေဖြင့် မိုင်းလားမြို့တွင် တွေ့ဆုံရန် စီစဥ်ထားကြောင်းသိရသည်။

အဆိုပါ တွေ့ဆုံဆွေးနွေးမှုသည် စစ်အာဏာသိမ်းပြီးနောက် ပထမဆုံးအကြိမ် တွေ့ဆုံမှုဖြစ်ပြီး၊ တွေ့ဆုံမှုကို မနက်ဖြန် ဇွန်လ ၁ ရက်တွင် မိုင်းလားမြို့၌ စတင်ကျင်းပမည်။

ထိုတွေ့ဆုံမှုသည် တရုတ်ပြည် ၊ ယူနန်ပြည်နယ်၏ နိုင်ငံခြားရေးရာ အထူးသံတမန် မစ္စတာ ကောပေါင်၏ ကြားဝင် ပေးမှုကြောင့် ညီနောင် သုံးဖော် တပ်ဖွဲ့ နှင့် စစ်ကောင်စီ လက်အောက်ခံ အမျိုးသားစည်းလုံးညီညွှတ်ရေး နှင့် ဆွေးနွေးမှု ညှိနှိုင်းရေးမှူး ကော်မတီ (NSPNC) တို့ တွေ့ဆုံရခြင်း ဖြစ်သည် ။

တွေ့ဆုံမှုနှင့် ပတ်သက်ပြီး သျှမ်းပြည်နိုင်ငံရေး လေ့လာသုံးသပ်သူ ဦးရဲထွန်း (သီပေါ) က “ဒီသုံးဖွဲ့က တရုတ် ဘက် ဖိအားပေး တိုက်တွန်းလို့ သူတို့ကြေညာချက်တွေမှာ ကြိုဆိုတယ် ဘာညာ ပြောဆိုနေကြပေမယ့်လို့ သူတို့ ဒီနောက်ပိုင်း ပြုလုပ်တဲ့ အင်တာဗျူး တချို့ကို နားထောင်ကြည့်လိုက်တော့ လိုလိုလားလားရှိပုံတော့ မရဘူး။ တရုတ်က ဖိအားပေးလို့သာ လိုက်လျောပေးရတာလို့ အဲ့လိုမျိုး နားလည်လိုက်တယ်။” ဟု သျှမ်းသံတော်ဆင့်ကို ပြောဆို သုံးသပ်ထားသည်။

အဆိုပါ တွေ့ဆုံမှုတွင် ညီနောင်သုံးဖော် အဖွဲ့ နှင့် NSPNC ကိုယ်စားလှယ် အဖွဲ့များ အပြင် တရုတ်နိုင်ငံ ယူနန်ပြည်နယ် ၏ နိုင်ငံခြားရေးရာ အထူးသံတမန် မစ္စတာ ကောပေါင်လည်း တရုတ်နိုင်ငံ ကိုယ်စားလှယ်အဖြစ် ပါဝင်သွားမည်ဟု သိရသည်။

တိုင်းရင်းသားလက်နက်ကိုင် တပ်ဖွဲ့များ အနေဖြင့် တရုတ်၏ ကူညီထောက်ပံ့မှုများကို လက်ခံထားသည့် အတွက် တရုတ်၏ ပြောဆိုတိုက်တွန်းမှုကို ပြောင်မငြင်းကြောင်း ဦးရဲထွန်း (သီပေါ) က ဆက်လက်ပြောဆိုထားသည်။

“လက်နက်ကိုင် တပ်ဖွဲ့တွေက တရုတ်တွေနဲ့ ပတ်သက်ရင် ကလန်ကဆန်တော့ မလုပ်ရဲ ဘူး။ တရုတ်က သူတို့ကို အများကြီး ဒုက္ခပေးနိုင်တယ်။ ဒါကြောင့်မို့ သူတို့က တရုတ်ရဲ့ တိုက်တွန်းချက်ကို ပြောင်မငြင်းဆန်ရဲဘူး။ လိုက်လိုက်လျောလျောနဲ့ပဲ ဆွေးနွေးတာကို လက်ခံတယ် ။ ဆွေးနွေးပွဲလို့ ခေါ်တဲ့ အခါမှာ အပြန်အလှန် ပြောဆိုတာ ဆွေးနွေးတာ တောင်းဆိုတာတွေလည်း ရှိတော့ အဲ့ဒီမှာလည်း ပျက်သွားနိုင်တာပေါ့နော်။ ဆိုလိုတာက တရုတ်ပြောတာကို မငြင်းဆန်နိုင်ဘဲနဲ့ ဆွေးနွေးပွဲရောက်မှ ပျက်အောင် လုပ်တားမျိုးပေါ့။ “ ဟု ဦးရဲထွန်း (သီပေါ) က ပြောဆို သုံးသပ်ထားသည်။

ညီနောင်သုံးဖော် အဖွဲ့ နှင့် NSPNC ကိုယ်စားလှယ် အဖွဲ့များ၏ တွေ့ဆုံဆွေးနွေးမှုသည် ဇွန်လ ၁ ရက်မှ ၃ ရက်နေ့ အထိ ၃ ရက်ကြာအောင် တွေ့ဆုံဆွေးနွေးမည်ဖြစ်ပြီး လက်ရှိမှာ မိုင်းလားမြို့သို့ရောက်ရှိနေကြောင်းသိရသည်။

ညီနောင်သုံးဖွဲ့သည် စစ်အာဏာရှင်စနစ်တိုက်ထုတ်ရန်အတွက် အာဏာသိမ်း စစ်ကောင်စီကို တော်လှန်တိုက်ခိုက် နေကြသည့် အဖွဲ့များနှင့် ပူးပေါင်းသွားမည် ဖြစ်ကြောင်း ဇန်နဝါရီ ၁ ရက်တွင် ထုတ်ပြန်ကြေညာထားသည်။

ထို့အပြင် စစ်တပ်ဖွဲ့ကို လက်နက်ကိုင်တော်လှန်နေသည့် ပြည်သူ့ကာကွယ်ရေးတပ်ဖွဲ့ဝင်များကို စစ်သင်တန်း ပေးနေကြပြီး စစ်လက်နက်ပစ္စည်း ကူညီထောက်ပံ့ပေးနေသည့် အဖွဲ့လည်း ဖြစ်ကြသည်။