သျှမ်း – ကရင်နီ (ကယား) နယ်စပ်ဒေသရှိ မိုးဗြဲမြို့တွင် (၄) ရက်ဆက် တိုက်ပွဲပြင်းထန်စွာဖြစ်ပွားခဲ့ပြီး ကလေးအပါအဝင် အရပ်သား (၄) ဦး သေဆုံးပြီး အရပ်သား ၁၁ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ပြီးခဲ့သည့် မေလ ၂၇ ရက်မှ မေလ ၃၀ ရက်အထိ မိုးဗြဲမြို့တွင် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့ အကြား တိုက်ပွဲပြင်းထန်စွာ ဖြစ်ပွားခဲ့ပြီး စစ်ကောင်စီဘက်မှ တိုက်လေယာဉ်ကို အသုံးပြုပြီး ဗုံးကြဲချခြင်း၊ တာဝေးပစ် လက်နက်ကြီးဖြင့် ပစ်ခတ်တိုက်ခိုက်ခြင်းများ ပြုလုပ်ခဲ့သည်။
“မိုးဗြဲ အရှေ့ဖက်ခြမ်းက တောင်ပေါ် ရွာတွေ၊ တောင်ခြေအောက်က ရွာတွေကော ဗုံးကြဲခံရတယ်။ ကျနော်တို့ မိဘပြည်သူတွေတော့ စိုးရိမ်ရတာပေါ့။ သူတို့က အနီးကပ်ဝင်ပြီး ကြဲတာလေ။ လုံခြုံရေးအတွက် အားလုံးကတော့ ကြောက်ပြီး စိုးရိမ်နေရတာပေါ့။ ပြောပြရရင် စိတ်မကောင်းစရာတွေကြီးပဲ “ ဟု မိုးဗြဲ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ကောင်စီမှ တိုက်လေယာဉ်ဖြင့် ဗုံးကြဲတိုက်ခိုက်ခဲ့ခြင်းကြောင့် မေလ ၂၇ ရက်တွင် အသက် ၃ နှစ်ခွဲအရွယ် ကလေးငယ် ၁ ဦး သေဆုံးခဲ့ရပြီး ပြည်သူ ၄ ဦး ထိခိုက်ဒဏ်ရာ ရရှိခဲ့သည့်အပြင် တောင်ယာသို့ သွားနေစဉ် ပြည်သူတစ်ဦးကိုပါ စစ်ကောင်စီမှ ပစ်ခတ်ခဲ့သဖြင့် တစ်ရက်ထဲ၌ ပြည်သူ ၃ ဦး သေဆုံးခဲ့ရကြောင်း MBPDF မှ မေလ ၂၉ ရက်တွင် ထုတ်ပြန်ထားသည်။
အလားတူ မေလ ၂၈ ရက် နံနက် ၄ နာရီခွဲတွင် မိုးဗြဲအနောက်ဖက်ခြမ်းရှိ စစ်ဘေးရှောင်စခန်းတစ်ခုကို စစ်ကောင်စီမှ တိုက်လေယာဉ်ဖြင့် ၂ ကြိမ်တိုင် လာရောက် ဗုံးကြဲချခဲ့သောကြောင့် ပြည်သူ ၄ ဦး ထိခိုက်ဒဏ်ရာ ရပြီး နေအိမ် (၃) လုံး ပျက်စီးခဲ့ကြောင်း ထုတ်ပြန်ချက်၌ ရေးသားဖော်ပြထားသည်။
ယင်းကဲ့သို့ တိုက်ပွဲဖြစ်ပွားပြီးနောက် မေလ ၂၉ ရက် ည ၁၀ နာရီ ဝန်းကျင်တွင် မိုးဗြဲအခြေစိုက် ခမရ (၄၂၂) တပ်ရင်းမှ မိုးဗြဲမြို့ပေါ်သို့ တာဝေးပစ် လက်နက်ကြီးဖြင့် (၂၀) ထက်မနည်း တစ်ဖက်သတ် ပစ်ခတ်ခဲ့သောကြောင့် မြို့ပေါ်ရှိ အသက် ၁၁ နှစ်အရွယ် အမျိုးသမီးငယ်တစ်ဦး သေဆုံးပြီး ယမ်းစကြောင့် ပြည်သူ (၃) ဦး ထိခိုက်ဒဏ်ရာ ရရှိခဲ့သည်။
စစ်ကောင်စီသည် သျှမ်း – ကရင်နီ (ကယား) နယ်စပ်ဒေသတလျောက်ရှိ တိုက်ပွဲဖြစ်ပွားခဲ့ရာ ဒေသအသီးသီး၌ အရပ်သားနေအိမ်၊ စစ်ဘေးရှောင်စခန်း နှင့် ဘုန်းကြီးကျောင်းဆောင်နေရာများကို PDF တပ်ဖွဲ့များ နေရာယူထားသည် ဟုဆိုသည့် ထင်မြင်ချက်ဖြင့် နေ့စဉ်နီးပါး တိုက်လေယာဉ်ဖြင့် ပျံဝဲကာ ဗုံးကြဲချနေလျက်ရှိကြောင်း သိရသည်။
ထို့အပြင် နယ်စပ်ဒေသတလျောက်ရှိ ကျေးရွာများကို PDF တပ်ဖွဲ့များ စိုးမိုးထားသည့် နယ်မြေများဆိုပြီး စွပ်စွဲချက်ဖြင့် စစ်ကောင်စီဘက်မှ တိုက်လေယာဥ်ဖြင့် ဗုံးကြဲခြင်း၊ လက်နက်ကြီးဖြင့် ပစ်ခတ်နေခြင်း ဖြစ်သည်။
SHRF ထုတ်ပြန်ကြေညာချက်အရ ဖေဖော်ဝါရီ နောက်ဆုံးပတ်မှစ၍ မေလ ဒုတိယပတ်ထိ ဖယ်ခုံ၊ ပင်လောင်း၊ မိုးဗြဲမြို့တွင် အမျိုးသမီး ၂ ဦး၊ ကလေး ၁ ဦး သေဆုံးပြီး သံဃာတော် အပါအဝင် သူနာပြု နှင့် အရပ်သား စုစုပေါင်း ၁၈ ဦး ထိခိုက်ဒဏ်ရာ ရကြောင်း သိရသည်။
Leave a Comments