Thursday, May 30, 2024

မိုင်းကိုင်မြို့နယ် အမျိုးသားတစ်ဦးကို SSPP/SSA တပ်ဖွဲ့က ပစ်သတ်ခဲ့ပြီး လျော်ကြေးငွေပေး

Must read

သျှမ်းပြည် လွိုင်လင်ခရိုင် မိုင်းကိုင်မြို့နယ် လွယ်ယန်းကျေးရွာ ဒေသခံအမျိုးသားတစ်ဦးကို SSPP/SSA က သတ်ဖြတ်ခဲ့ပြီး လျော်ကြေးငွေ ပေးဆောင်ခဲ့ကြောင်း စုံစမ်းသိရှိရသည်။

သတ်ဖြတ်ခံထားရသည့် ရုပ်အလောင်း

ပြီးခဲ့သည့် မေလ ၁၉ ရက်နေ့တွင် လွယ်ယန်းကျေးရွာ နေထိုင်သည့် အသက် (၅၀) အရွယ် ဦးပေါ်ထွေး တောထဲ ကျွဲသွားကျောင်းစဥ် SSPP/SSA တပ်သားများ နှင့် တွေ့ဆုံခဲ့ပြီး ထွက်ပြေးသွားသည့်အတွက်ကြောင့် သေနတ်ဖြင့် ပစ်ခတ်ခဲ့ပြီး ကျည်ထိမှန် သေဆုံးသွားခဲ့ကြောင်း ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် SSPP/SSA ပြောရေးဆိုခွင့်ရှိသူ ဗိုလ်ကြီး သီဟရာဇာက သျှမ်းသံတော်ဆင့်ကို ပြောသည်။

“ဖြစ်စဉ်က သူသွားလာနေတဲ့ နေရာမှာ ဗုံးပေါက်ကွဲတယ်။ ဗုံးပေါက်ကွဲတော့ ကျနော်တို့ လူတွေလည်း စစ်ဆေးရေးလုပ်တယ်။ ဖြစ်ချင်တော့ သူ့ကို သွားတွေ့တယ်။ သူက သေနတ်ပါတယ်။ ရပ်ခိုင်းတာမရပ်ဘဲ ထွက်ပြေးသွားတော့ ကျနော်တို့လည်း RCSS ကလူတွေ ဗုံးလာထောင်တာဆိုပြီး ပစ်လိုက်တာ။ အဲ့နားမှာပဲ သေသွားတာပါ” ဟု ဗိုလ်ကြီး သီဟရာဇာက ပြောသည်။

အဆိုပါ ပစ်သတ်ခဲ့ပြီးနောက် ကျေးရွာတွင်း မိဘ ပြည်သူများ နှင့် တွေ့ဆုံပြီး လျော်ကြေးငွေ ပြန်ပေးခဲ့ကြောင်း သိရသည်။

“ကျနော်တို့လည်း မိဘ ပြည်သူတွေနဲ့ ပြန်တွေ့ဆုံတယ်။ ပြီးတော့ လျော်ကြေးငွေတွေ ဘာတွေ ညာတွေ ပြန်ပေးလိုက်တယ်။ ဘယ်လောက်ပေးတယ်။ ဘာတွေ လုပ်လဲတော့ ကျနော်လည်း အတိကျ မသိဘူး။ ကျနော်လည်း အထက်ကို ပြန်မေးမှရမယ်။ မိဘပြည်သူတွေနဲ့ တွေ့ဆုံတဲ့အချိန် ကျနော်က မရှိနေဘူး” ဟု ဗိုလ်ကြီး သီဟရာဇာက ဆိုသည်။

သို့သော် ‌ရွှေဖီမြေသတင်းဌာနတွင် SSPP/SSA တပ်ဖွဲ့က ပစ်သတ်ခံခဲ့ရသည့် မိသားစုဝင်ကို ငွေ ၅ သိန်းဖြင့် ကျေအေးပေးခဲ့ကြောင်း ရေးသားထားသည်။

မိုင်းကိုင်မြို့နယ်အတွင်း တစ်ချို့ ကျေးရွာဒေသများမှာ SSPP/SSA တပ်ဖွဲ့ဝင်များကို မာရှယ်လောစနစ်ဖြင့် ထိန်းချုပ်ထားကြောင်း သိရသည်။

“ကျနော်တို့လည်း မိဘပြည်သူတွေကို မှာကြားထားတာတွေရှိပါတယ်။ လယ်ယာတွေ သွားရင် အစုလိုက်သွားဖို့၊ ကျနော်တို့ စစ်ဆေးရင်လည်း အစစ်ဆေးခံဖို့ ၊ တစ်ယောက်ထဲ မသွားဖို့ ၊ ဘယ်အချိန်တွေမှာ မသွားလာဖို့ဆိုတာ မှာကြားထားပါတယ်။  ကျနော်တို့ကို တွေ့ရင်မထွက်ပြေးဖို့ ပြောထားတယ်။ တကယ်လို့ ထွက်ပြေးတာတွေရှိရင် ပစ်သင့်ရင် ပစ်ရမှာပဲ။ မာရှယ်လောစနစ်လိုပါပဲ။ မိုင်းကိုင်မြို့နယ် တစ်ခုလုံးတော့ မဟုတ်ဘူး။ တစ်ချို့ဒေသတွေပဲ” ဟု ဗိုလ်ကြီး သီဟရာဇာက ဆက်ပြောသည်။

အလားတူ ပြီးခဲ့သည့် မေလ ၉ ရက်နေ့တွင်လည်း SSPP/SSA တပ်သားများက လဲချားမြို့နယ်တွင်း ဒေသခံတစ်ဦးကို သစ်ပင်ပေါ်ကြိုးတုတ်ပြီး မီးမြိုက်ကာ အမှုစစ်ဆေးခဲ့သည်။

Leave a Comments

- Advertisement -spot_img

Latest article