သျှမ်းပြည် ကျောက်မဲခရိုင် နမ့်လန်မြို့အတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) မှတပ်သားသစ်ကောက်ယူမှုကြောင့် ဒေသခံများ ညအချိန် အပြင်မထွက်ရဲကြောင်း စုံစမ်းသိရသည်။
ယခုမေလ နောက်ဆုံးပတ်မှစပြီး SSPP/SSA တပ်ဖွဲ့သည် ညအချိန် တပ်သားသစ် ဝင်ရောက်ကောက်နေကြောင်း ဒေသခံများ ပြောပြချက်အရ သိရသည်။
“ညအချိန်ဆို တစ်အိမ်ဝင် တစ်အိမ်ထွက်ပြီး တပ်သားကောက်နေတာ။ သား ၂ ယောက်ရှိတဲ့ အိမ်ဆို တစ်ယောက်သွားရတာပေါ့။ တစ်ပတ်လောက်ရှိနေပြီ ။ ညဆို ဘယ်သူမှ အပြင်မထွက်ရဲဘူး။ ၆ နာရီဆိုတာနဲ့ အပြင်သွားလာတာ မရှိတော့ဘူး။ ရပ်ကွက်ထဲ အပ်ကျရင်တောင် အသံကြားလောက်တယ်” ဟု နမ့်လန်မြို့ ဒေသခံ အမျိုးသားတစ်ဦးက ပြောသည်။
အဆိုပါ SSPP/SSA တပ်သားများသည် နမ့်လန်မြို့အတွင်း (၅) ဦးလောက် ဖမ်းဆီးခေါ်ဆောင်သွားခဲ့ကြောင်း ဒေသခံများပြောပြချက်အရ သိရသည်။
ထိုသို့ လာရောက်ဖမ်းဆီးချိန်တွင်လည်း ကြိုးတုပ်ပြီး ရိုက်နှက်မှုလည်းရှိကြောင်း သိရသည်။
“သူတို့ အိမ်တံခါးခေါက်ပြီးတော့ ဝင်လာတာ။ ဟိုညက စိန်ပန်းရပ်ကွက်ကို ဝင်ခေါ်တာ။ အိမ်နီးချင်းက ပြောပြချက်အရ ဆိုရင် သူတို့က ကြိုးတုပ်တာ၊ ရိုက်တာရှိတယ်တဲ့။ အဲ့ကြောင့် အိမ်ရှင်က ကြိုးမတုပ် နဲ့ မရိုက်နဲ့ဆိုပြီးတော့ ကောင်းကောင်းလေး ထည့်ပေးသွားလိုက်ရတယ်” ဟု အထက်ပါ နမ့်လန်မြို့ ဒေသခံတစ်ဦးက ပြောသည်။
SSPP/SSA တပ်သားများသည် ညအချိန်မှာ တပ်သားသစ်ဝင်ဆွဲနေသည့်အတွက်ကြောင့် ဒေသခံ အမျိုးသားများက ညအချိန်တွင် ထွက်ပြေးတိမ်းရှောင်နေရကြောင်း သိရသည်။
“ကျနော်တို့ ညညဆိုရင် အိမ်မှာ အိပ်လို့ မရဘူး။ ထွက်ပြေးတိမ်းရှောင်နေကြတာ။ အိမ်မှာ ယောက်ျား ၂ ယောက်ရှိတဲ့ အိမ်ဆိုရင် ညဆို အိမ်မှာမနေရဲဘူး။ ကျနော်တို့တော့ SSPP/SSA အကြီးအကဲတွေကို မေးချင်တယ်။ ဘာကြောင့်မလို့ ခေါ်တာလဲ။ ဘယ်လိုလူတွေကိုခေါ်တာလဲ။ တစ်ချို့ပြောတာကျတော့ RCSS နဲ့ အဆက်သွယ်ရှိတဲ့ အိမ်ဆိုဝင်ခေါ်တယ်လို့ပြောတာ” ဟု နမ့်လန်မြို့ ဒေသခံတစ်ဦးက ပြောသည်။
အဆိုပါ နမ့်လန်မြို့တွင် ညအချိန်တွင် တပ်သားသစ်လာကောက်ယူနေသည့်အပေါ်ကို SSPP/SSA ပြောရေးဆိုခွင့်ရှိသူ ဒု – ဗိုလ်မှူးကြီး စိုင်းဆု နှင့် ဗိုလ်မှူး စိုင်းဖုန်းဟန်တို့ကို သျှမ်းသံတော်ဆင့်မှ အကြိမ်ကြိမ် ဖုန်းဆက်သွယ်ခဲ့သော်လည်း စက်ပိတ်ထားသည်။
အလားတူ သျှမ်းပြည် မူဆယ်ခရိုင် နမ့်ခမ်းမြို့နယ်တွင်လည်း တအာင်းအမျိုးသားလွတ်မြောက်ရေးတပ်မတော် TNLA ကလည်း အခွန်ကောက်ယူမှု နှင့် တပ်သားစုဆောင်းမှုတွေကို ပိုပြီးပြုလုပ်လာခဲ့ကြောင်း သိရသည်။
