သျှမ်းပြည် အောင်ပန်းမြို့ လှည်းရိုးရပ်ကွက်အတွင်း နေထိုင်သည့် အသက်မပြည့်သေးသည့် လူငယ်တစ်ဦးသည် အွန်လိုင်းအသိမိတ်ဆွေမှတစ်ဆင့် ခေါ်ဆောင်သွားခြင်းခံရပြီး ၃ ရက်ကြာ ဖုန်းအဆက်သွယ်မရဘဲ ပျောက်ဆုံးနေကြောင်း စုံစမ်းသိရသည်။
ဖြစ်စဉ်မှာ မေလ ၂၇ ရက် နံနက်ပိုင်း ၁၀ နာရီခန့်တွင် အသက် ၁၆ နှစ်အရွယ်ရှိ မောင်ဉက္ကာကို ဆိုသူသည် ၎င်း၏ မိသားစုဝင်ထံ တစ်စုံတစ်ရာ စကားမှာကြားခြင်းမရှိဘဲ နေအိမ်မှတစ်ဆင့် ထွက်သွားခဲ့ပြီး ယနေ့ (မေလ ၂၉) ရက်ထိ ၃ ရက်ကြာ ဖုန်းအဆက်အသွယ် မရဘဲ ပျောက်ဆုံးနေကြောင်း ၎င်း၏ ဦးလေးဖြစ်သူက သျှမ်းသံတော်ဆင့်ကို ပြောသည်။
“ သူက ခပ်အေးအေး နေတတ်တယ်။ ဒီကလေး အသက်လည်း မပြည့်သေးဘူး။ ဘယ်မှလည်း မသွားတတ်၊ မလာတတ်ဘူး။ သူက အပေါင်းအသင်းလည်း သိပ်မရှိဘူး။ သူ့ရဲ့ အကောင့်ထဲကိုဝင်ပြီး ကြည့်တော့ မိုးကုတ်ကဆိုတဲ့ အဲ့ဒီလူကိုတွေ့တယ်။ အောင်ပန်းရဲစခန်းမှာ ခရီးသွားထောက်ခံစာ ပုံရယ်၊ အောင်ပန်းနဲ့မန္တလေး ကားလက်မှတ်ပုံရယ် သူက ဓာတ်ပုံရိုက်ပြီး ဟိုဖက်လူကို ပို့ထားတယ်။ အဲ့ဒီဟာကိုဘဲ ကျနော်တို့တွေ့ပြီးတော့ အဲ့ကလူလာခေါ်သွားတယ်လို့ ကျနော်တို့ ကောက်ချက်ချရတာပေါ့ “ ဟု ၎င်းဦးလေးက ပြောသည်။
မောင်ဉက္ကာကို သည် နေအိမ်မှထွက်သွားသည့်နေ့မှစ၍ ၎င်း၏ မိသားစုဝင်များက အကြိမ်ကြိမ်အခါခါ ကြိုးစားပြီး ဖုန်းဖြင့် ဆက်သွယ်ခဲ့သော်လည်း ဖုန်းလိုင်းဆက်ပိတ်ထားခြင်းကြောင့် ဆက်သွယ်၍ မရခဲ့ပေ။
ထို့အပြင် ခေတ်ကာလ မကောင်းသည့်အချိန်၌ မောင်ဉက္ကာကို သည် ဖုန်းအဆက်အသွယ် မရဘဲ ပျောက်ဆုံးနေသဖြင့် မိသားစုဝင်များက စိုးရိမ်နေကြောင်း သိရသည်။
“ အခု သူ့အမေကတော့ စားမဝင်၊ အိပ်မပျော် တငိုငိုတရယ်ရယ် ဝမ်းနည်းနေတာပေါ့။ ပြီးတော့ သူက ညီကိုမောင်နှမ ၄ ယောက်ထဲမှာ ယောင်္ကျာလေးတစ်ယောက်ထဲ ပါတယ်။ သူပြောဖူးတာတော့ သူထွက်သွားရင် လိုက်ရှာမလားလို့ မေးဖူးတယ်။ ပြီးတော့ မပျောက်ခင် ၂ ရက်လောက် အလိုမှာ တောင်းပန်ပါတယ်လို့ ပြောသေးတယ်။ ဘာလို့လဲမေးတော့ နောက်မှ သိလာမယ်ဘဲ ပြောတယ်။ စတယ်ပဲထင်နေတာ “ ဟု ၎င်း၏ အစ်မဖြစ်သူက ထပ်လောင်းပြောသည်။
အဆိုပါ ပျောက်ဆုံးသွားသူ မောင်ဉက္ကာကို သည် အောင်းပန်းမြို့မှ တစ်ဆင့် မန္တလေးသို့ သွားရောက်ပြီး အလုပ်လုပ်ကိုင်နေကြောင်း မိသားစုဝင်များက ယူဆထားသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင် လူပျောက်ဆုံးမှု မကြာခဏ ဖြစ်ပွားနေပြီး ပျောက်ဆုံးမှု နောက်ကွယ်တွင် သတ်ဖြတ်ခံရခြင်း၊ အိမ်ထောင်ပြုခြင်း နှင့် နယ်စပ်ဒေသ၌ တရားမဝင် အလုပ်အကိုင် သွားရောက်လုပ်ကိုင်ခြင်း ရှိခဲ့သည်။
Leave a Comments