Sunday, May 26, 2024

လွိုင်လင်လေး နေအိမ်တစ်လုံး ခြံဝင်းအတွင်း လက်နက်ကြီးကျပေါက်ကွဲ၊ ကလေး ၂ ဦး ထိခိုက်ဒဏ်ရာရ

Must read

ကရင်နီ (ကယား) ပြည် လွိုင်လင်လေးမြို့ ကုန်းမှီကိုရွာတွင် တိုက်ပွဲဖြစ်ပွားခြင်းမရှိဘဲ နေအိမ် ခြံဝင်းအတွင်း လက်နက်ကြီးတစ်လုံး ကျပေါက်ကွဲမှုကြောင့် ကလေးငယ် ၂ ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။

ပုံ – လူမှုကူညီရေးအသင်း

ယမန်နေ့ (မေလ ၂၈) ရက် ည ၈ နာရီတွင် နေအိမ်ခြံဝင်းအတွင်း လက်နက်ကြီးတစ်လုံး ကျပေါက်ကွဲခဲ့ပြီး အသက် ၉ နှစ်အရွယ် မောင်ထွန်းလင်းသည် ဦးခေါင်း နှင့် ရင်ဘတ်၌ ယမ်းစထိမှန်သွားခဲ့သလို အသက် ၇ နှစ် အရွယ် မောင်ဟန်ထွန်းသည်လည်း ညာဖက် လက်ကောက်ဝတ်၌ ယမ်းစထိမှန် ထိခိုက်ဒဏ်ရာ ရရှိခဲ့ကြောင်း ၎င်းကိုသွားရောက်ကူညီခဲ့သည့် ရွှေလွိုင်ကော် ပရဟိတအသင်းမှ သိရသည်။

“ တိုက်ပွဲကတော့ မဖြစ်ဘူးဗျ။ အဲ့ဖက်မှာက ဝေးဝေးတခါတော့ လက်နက်ကြီးကျတယ်။ သူတို့ မိသားစု ၄ ဦးထဲမှာ ကလေး ၂ ယောက် ထိတယ်။ လက်နက်ကြီးတစ်လုံးက သူတို့ နေအိမ်တည့်တည့်ကို ကျတာတော့ မဟုတ်ဘူး။ ခြံဝင်းထဲကို ကျတာ။ ကလေးတစ်ယောက်က ဦးခေါင်း နဲ့ ရင်ဘတ် ယမ်းစထိတယ်။ နောက်တစ်ယောက်က ညာလက်ကောက်ဝတ်မှာ ယမ်းစထိတယ်။ မစိုးရိမ်ရဘူး“ ဟု ပရဟိတ အသင်းမှ တာဝန်ခံတစ်ဦးက ပြောသည်။

အဆိုပါ ထိခိုက်ဒဏ်ရာရသူ ၂ ဦးကို ၎င်းတို့မှ သွားရောက်ကူညီခဲ့ပြီး လွိုင်ကော်ဆေးရုံသို့ ကူညီပို့ဆောင်ပေးခဲ့ကြောင်း သိရသည်။

ယင်းကဲ့သို့ ပြည်သူနေအိမ် ခြံဝင်းအတွင်း ကျရောက်ပေါက်ကွဲခဲ့သည့် လက်နက်ကြီးတစ်လုံးသည် မည်သည့် အဖွဲ့အစည်းမှ ပစ်ခတ်ခဲ့သော လက်နက်ကြီးဖြစ်ကြောင်း အသေးစိတ်ကိုတော့ သီခြားအတည်မပြုနိုင်သေးပေ။

အလားတူ လွိုင်လင်လေးမြို့တွင် အခြေစိုက်ထားသည့် စစ်ကောင်စီ၏ ခလရ (၅၃၀) တပ်ရင်း တစ်ခုရှိထားကြောင်း သိရသည်။

ထို့အပြင် လွိုင်လင်လေးမြို့ရှိ ကျေးရွာအနီးတဝိုက်တွင် ယခင်က စစ်ကောင်စီ နှင့် ကရင်နီတပ်မတော် (KA) တို့ အကြား တိုက်ပွဲဖြစ်ပွားခဲ့သည့် ဒေသတစ်ခုဖြစ်သလို လက်ရှိအချိန်ထိ စစ်ဆေးတင်းမာနေသည့် ဒေသတစ်ခုလည်း ဖြစ်သည်။

Leave a Comments

- Advertisement -spot_img

Latest article