သျှမ်း-ကရင်နီ (ကယားပြည်) နယ်စပ် ဖယ်ခုံမြို့နယ်တွင်း ယနေ့ (မေ ၂၇)ရက် နံနက်ပိုင်းမှစပြီး စစ်ကောင်စီနှင့် ပြည်သူ့ကာကွယ်ရေး PDF တို့ တိုက်ပွဲဆက်လက်ဖြစ်ပွားခဲ့ပြီး တိုက်ပွဲကြား PDF မှ ရဲဘော်များ ထိခိုက်ဒဏ်ရာ ကျဆုံးမှုရှိခဲ့ကြောင်း စုံစမ်းသိရသည်။
ယနေ့ မေလ ၂၇ ရက် မနက်ပိုင်း၌ ဖယ်ခုံမြို့နယ်တွင် စစ်ကောင်စီနှင့် ပြည်သူ့ကာကွယ်တပ်ဖွဲ့ PDF တို့တိုက်ပွဲ ဆက်လက် ဖြစ်ပွားခဲ့၍ ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့မှ ရဲဘော် ၃ ဦးကျဆုံးပြီး ၈ ဦးထိခိုက်ဒဏ်ရာရရှိခဲ့ကြောင်း သတင်းရင်းမြစ် ရဲဘော်တစ်ဦးထံမှ သိရသည်။
“ အကျအရှုံးတော့ ရှိတယ်။ လောလောဆယ် ရဲဘော် ၃ ယောက်ကျတယ်။ ၈ ယောက်တော့ ဒဏ်ရရထားတယ် “ ဟု သတင်းရင်းမြစ် ရဲဘော်တစ်ဦးမှ သျှမ်းသံတော်ဆင့်ကို ပြောသည်။
အဆိုပါ ယနေ့ တိုက်ပွဲဖြစ်ပွားမှု ဖြစ်စဉ်အတွင်း အသေးစိတ်ကို သိချင်မေးမြန်းလို၍ ပအိုဝ်းအမျိုးသားကာကွယ်ရေးတပ်ဖွဲ့ (ခမ်းကောင်) PNDF-KK ကို ကြိုးစားဆက်သွယ်ခဲ့သော်လည်း ဆက်သွယ်၍ မရခဲ့ပေ။
ထို့အပြင် သျှမ်း-ကရင်နီ (ကယား) နယ်စပ်ဒေသတလျောက်တွင် စစ်ကောင်စီနှင့် ပြည်သူ့ကာကွယ်ရေး PDF တို့အကြား တိုက်ပွဲသည် ယနေ့အချိန်ထိ ပြင်းထန်နေဆဲဖြစ်သလို စစ်ကောင်စီသည် လေကြောင်းကို ပိုမိုအသုံးပြု၍ ကျေးရွာများနှင့် အရပ်သားနေအိမ်တွေကို PDF စိုးမိုးနယ်မြေဟုသတ်မှတ်ပြီး ပစ်မှတ်တိုက်ခိုက်မှု ပြုလုပ်နေကြောင်း KNDF မှ ရဲဘော်အမျိုးသမီးတစ်ဦးက ပြောသည်။
“ ဒီဖက်က သူတို့စစ်ကြောင်း ထိုးဖို့မလွယ်ဘူးလေ။ အဓိက လေယာဉ်နဲ့ လက်နက်ကြီးသုံးတယ်။ အကြောင်းရင်းကတော့ PDF စိုးမိုး နယ်မြေလို့သတ်မှတ် တိုက်ခိုက်နေတာပေါ့။ ရှေ့တန်းစစ်မြေပြင်မှာ တိုက်ခိုက်တာဆိုရင် ကျေနပ်တယ်။ အခုက ဘာမှမဆိုင်တဲ့ ပြည်သူကို နှိပ်စက်နေတာ။ သတ္တိရှိရင် မြေပြင်မှာ ရင်ဆိုင်ပါ “ ဟု ရဲဘော်အမျိုးသမီးတစ်ဦးက ပြောသည်။
စစ်တပ် အာဏာသိမ်းပြီးနောက်ပိုင်း သျှမ်း – ကရင်နီ နယ်စပ် တလျောက်ရှိ ပင်လောင်း၊ ဖယ်ခုံ နှင့် မိုးဗြဲ မြို့နယ်တွင် လက်နက်ကိုင် ခုခံမှုကို စစ်ကောင်စီတပ်ဖွဲ့မှ အပြင်းအထန် နှိမ်နင်းလာမှုကြောင့် ပြီးခဲ့သည့် ၂၆ လအတွင်း အရပ်သား ၄၅၂ ဦး သေဆုံးခဲ့ကြောင်း တိုးတက်သော ကရင်နီပြည်သူ့အင်အားစု PKPF က သတင်းထုတ်ပြန်ထားသည်။
အရပ်သားသေဆုံးမှု ဖြစ်စဉ်တွင် စစ်ကောင်စီမှ လက်နက်ကြီး နှင့် လေကြောင်းဖြင့်ပါ တိုက်ခိုက်မှုကြောင့် သေဆုံးရခြင်းဖြစ်ကြောင်း သိရသည်။
စစ်ကောင်စီ၏ လေကြောင်းတိုက်ခိုက်မှုကို PKPF ၏ စာရင်းမှတ်တမ်းအရ ၂၀၂၁ ခုနှစ်တွင် ၂ ကြိမ်၊ ၂၀၂၂ ခုနှစ်တွင် ၁၈၂ ကြိမ် နှင့် ယခု ၂၀၂၃ ခုနှစ် ပထမ (၄) လအတွင်းမှာ လေကြောင်းတိုက်ခိုက်မှု ၁၇၉ ကြိမ် မြင့်တက်လာကြောင်း သိရသည်။
