သျှမ်းပြည် မူဆယ်ခရိုင် လောက်ကိုင်မြို့နယ် ယနေ့( မေ ၂၇)ရက် နေ့လည် ၂ နာရီဝန်းကျင်တွင် ပစ်ခတ်မှုဖြစ်ပွားခဲ့ကြောင်း သတင်းရရှိသည်။
အဆိုပါ ပစ်ခတ်မှုသည် တရုတ်နိုင်ငံမှ ၎င်းတို့၏ လူကို လာရောက်ကယ်ဆယ်သဖြင့် ပစ်ခတ်မှုဖြစ်ပွားခဲ့ကြောင်း၊ အသေးစိတ်ကို မသိရကြောင်း လောက်ကိုင်မြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ တရုတ်နိုင်ငံဘက်က သူတို့လူကို လာကူညီတာလို့ပြောတယ်။ အဲဒါကြောင့် ပစ်ခတ်မှုဖြစ်တာတဲ့။ တစ်ယောက်တော့ ထိခိုက်သွားတယ်။ ကျမတို့လည်း အလုပ်ရောက်မှ သေနတ်ပစ်သံတွေကို ကြားရတာ” ဟု ၎င်းက ပြောသည်။
အဆိုပါ ပစ်ခတ်မှု နှင့် ပတ်သက်ပြီး အသေးစိတ်ကို မသိရှိရသေးကြောင်း၊ လောက်ကိုင်မြို့တွင် ပစ်ခတ်မှု မကြာခဏဖြစ်ကြောင်းလည်း အထက်ပါ အမျိုးသမီးက ပြောသည်။
လောက်ကိုင်မြို့သည့် တရုတ်နိုင်ငံနယ်စပ်မြို့ဖြစ်ပြီး တရားမဝင် လောင်းကစားများဖွင့်လှစ်ထားသည့်နေရာဖြစ်ကာ စစ်ကောင်စီတပ်ဖွဲ့၊ စစ်ကောင်စီလက်အောက်ခံ ပြည်သူ့စစ်များ နှင့် ကိုးကန့်တပ်မတော် MNDAA က သွားလာလှုပ်ရှားနေသည့် နယ်မြေဖြစ်သည်။
Leave a Comments