Thursday, April 18, 2024

လားရှိုးမြို့နယ် အစိုးရနည်းပညာအထက်တန်းကျောင်း ရှော့တိုက်ဒုံးပစ်ခံရ

Must read

သျှမ်းပြည် လားရှိုးမြို့နယ် ဆုံကွယ်ကျေးရွာအုပ်စု စစ်မှုထမ်းဟောင်းရပ်ရှိ အစိုးရ နည်းပညာ အထက်တန်းကျောင်းတွင် ယနေ့ (မေလ ၂၂) ရက် နံနက် ၁ နာရီ အချိန် ရှော့တိုက်ဒုံးဖြင့် ပစ်ခတ်တိုက်ခိုက်မှု ဖြစ်ပွားခဲ့ကြောင်း စုံစမ်းသိရသည်။

Photo: Credit (ရှော့တိုက်ဒုံး ပစ်ခတ်ခံရသည့် ကျောင်း)

ယနေ့ (မေလ ၂၂) ရက် နံနက်အစောပိုင်း ၁ နာရီအချိန်တွင် ဆုံကွယ်ကျေးရွာအုပ်စု စစ်မှုထမ်းဟောင်းရပ်ရှိ အစိုးရနည်းပညာအထက်တန်းကျောင်းအနီးကို အမည်မသိ လက်နက်ကိုင်အုပ်စုတစ်ခုမှ ရှေ့ာတိုက်ဒုံးဖြင့် ၈ ကြိမ်ထက် မနည်း တိုက်ခိုက်ခဲ့၍ အဆောက်အဦး၏ ခေါင်မိုး၊ နံရံများ နှင့် အနီးတဝိုက်ရှိ ကျေးရွာမှ နေအိမ်အချို့ ထိခိုက်ပျက်စီးခဲ့ကြောင်း သိရသည်။

“အဲ့မှာက လားရှိုး AD တပ်ရင်း နဲ့ နီးတယ်။ ကျောင်းဆောင်ရဲ့ အရှေ့ဖက်မှာ လားရှိုး AD တပ်ရင်း ရှိတာ။ မနေ့ည ပေါက်ကွဲသံတော့ ၈ ချက်လောက်ကြားတယ်။ တချို့ကလည်း ၅ ချက်လောက်ဘဲ ကြားတယ် ပြောတယ်။ အရင်ကလည်း အဲ့လိုဘဲ ဗုံးနဲ့ လာလာပစ်တာ။ ဘယ်အဖွဲ့အစည်း လုပ်တယ်ဆိုလည်း မသိရဘူး။ ရှော့တိုက်ဒုံးနဲ့ လာပစ်သွားတယ်လို့ ပြောတယ်။ လူထိခိုက်ဒဏ်ရာ ရတာတော့ မရှိဘူး “ ဟု ဒေသခံ အမျိုးသမီးတစ်ဦးက ပြောသည်။

Photo: Credit (ရှော့တိုက်ဒုံး ပစ်ခတ်ခံရ)

အဆိုပါ ဗုံးပေါက်ကွဲမှု ဖြစ်စဉ်အတွင်း ကျောင်းဝန်းအတွင်း ဆောက်လက်စ အဆောက်အဦး တစ်လုံး အမိုးပွင့်၊ နံရံပေါက်သွားခဲ့သလို အနီးတဝိုက်ရှိ လူနေအိမ်ပေါ်၌လည်း ဗုံးကျရောက်၍ ထိခိုက်ပျက်စီးမှု ရှိခဲ့ကြောင်း သိရသည်။

စစ်တပ်က အာဏာသိမ်းပြီးနောက်ပိုင်း လားရှိုးမြို့နယ်ရှိ စစ်ကောင်စီ၏ တပ်ရင်း၊ ရဲစခန်း၊ အဆောက်အဦးသည် မကြာခဏ ဗုံးဖြင့် ပစ်ခတ်တိုက်ခိုက်ခံနေရပြီး အဆိုပါ ဗုံးဖြင့် ပစ်ခတ်တိုက်ခိုက်မှု ဖြစ်စဉ်အတွင်း ပြည်သူများသည် လုံခြုံရေးအတွက် စိုးရိမ်နေရကြောင်း သိရသည်။

Photo: Credit (ရှော့တိုက်ဒုံး ပစ်ခတ်ခံရ)

“ စိုးရိမ်တာပေါ့။ ဗုံးတွေက ဘယ်ကနေလာမှန်း မသိဘဲ ကျမတို့ ရွာ၊ အိမ်ထဲကို လာကျမှာတော့ စိုးရိမ်တာပေါ့။ သူတို့ အချင်းချင်း၊ အပြန်အလှန် ပစ်ခတ်တိုက်ခိုက်နေတာပဲ။ အဲ့မှာလည်း AD တပ်ရင်းရှိတော့ သူတို့ အဲ့ဒါကို တိုက်ခိုက်ချင်တာလားတော့ မပြောတတ်ဘူး။ အဲ့လိုဖြစ်လာရင် သွားလာလို့ အဆင်မပြေတော့ဘူး။ လူကို စစ်မယ်၊ ကားကို စစ်မယ်နဲ့ လုပ်တော့မယ်။ ညဘက် အဲ့လိုဖြစ်တော့ ပိုပြီးတောင် စိုးရိမ်နေရတယ် “ ဟု ၎င်း အမျိုးသမီးက ထပ်လောင်းပြောသည်။

လားရှိုးမြို့နယ်တွင် စစ်ကောင်စီတပ်ဖွဲ့ အပါအဝင် မန့်နားပြည်သူ့စစ်၊ ကောင်းခါးပြည်သူ့စစ် (KDA)၊ တိုင်းရင်းသားလက်နက်ကိုင်များ ဖြစ်သည့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၊ ကိုးကန့်တပ်မတော် (MNDAA)၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) စသည်ဖြင့် လက်နက်ကိုင်တပ်ဖွဲ့များ လှုပ်ရှားနေလျက်ရှိသည်။

ပြီးခဲ့သည့် ဧပြီလ ၁၃ ရက် လားရှိုးမြို့ ရန်တိုင်းအောင် ဘုရားဗဟိုမဏ္ဍပ် အနီးရှိ ကားပါကင်တွင် ထပ်ဆင့် ဗုံးပေါက်ကွဲမှု ဖြစ်ပွားပြီး သေဆုံးသူ ၄ ဦး နှင့် ထိခိုဒဏ်ရာ ရရှိသူ ၁၀ ဦး ရှိခဲ့ကြောင်း သိရသည်။

Leave a Comments

- Advertisement -spot_img

Latest article