Friday, June 9, 2023

မူဆယ်မြို့နယ် စစ်ကောင်စီ တပ်စခန်းအနီး TNLA ဝင်ရောက်အခွန်ကောက်

Must read

သျှမ်းပြည် မြန်မာ – တရုတ်နယ်စပ် မူဆယ်ခရိုင်၊ မူဆယ်မြို့မှ စယ်လန့် ကျေးရွာ ထိပ်နားတွင် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တပ်ဖွဲ့က လမ်းသွား လမ်းလာ ကားသမားများထံမှ အခွန်ကောက် ပိုက်ဆံတောင်းနေကြောင်း သတင်းသိရသည်။

စယ်လန့်ကျေးရွာ

အဆိုပါ TNLA တပ်ဖွဲ့မှ အခွန်ကောက် ပိုက်ဆံတောင်းနေသည့် နေရာ နှင့် မနီးမဝေးနေရာတွင် အာဏာသိမ်း စစ်ကောင်စီ တပ်စခန်းတစ်ခု ရှိနေကြောင်းလည်း ဒေသခံများက ပြောသည်။

“စယ်လန့် ရွာထိပ်မှာ ပိုက်ဆံတောင်းနေတယ်၊ အဲ့လမ်းက ဆိုင်းခေါင်ဘက်သွားတဲ့ လမ်းဖြစ်တာပေါ့၊ TNLA စစ်ဝတ်စုံ နဲ့ လက်နက်အပြည့်အစုံ နဲ့ စောင့်ပြီး တောင်းကြတာ၊ တချို့ကလည်း စစ်ဝတ်စုံ မဝတ်ပဲနဲ့ လက်နက်ကိုင် ထားကြတယ်၊ အဲ့နေရာ နဲ့ မလှမ်းမကမ်းမှာက စစ်ကောင်စီ တပ်စခန်းတစ်ခု ရှိနေတယ်” ဟု ဒေသခံများက သျှမ်းသံတော်ဆင့်ကို ပြောသည်။

အဆိုပါ လမ်းကြောင်းသည် ဆိုင်ကယ်များ၊ အိမ်စီးကားများ၊ ကုန်တင်ကားများ ဖြတ်သန်းသွားလာလေ့ရှိပြီး ဆိုင်ကယ်သမားမှ လွဲကာ ကျန်သည့် မော်တော်ယာဥ်များ ပါလာသည့် ကုန်ပစ္စည်း နှင့် ယာဥ်အမျိုးအစား အလိုက် ပိုက်ဆံတောင်း ကောက်ယူနေကြောင်း သိရသည်။

စစ်ကောင်စီမှ နိုင်ငံတော် အာဏာသိမ်းယူပြီးနောက်ပိုင်းတွင် TNLA တပ်ဖွဲ့သည် သျှမ်းပြည် မြောက်ပိုင်း တစ်လျှောက် လှုပ်ရှားမှုများ ပိုမိုများပြားလာပြီး အခွန်တိုးကောက်မှုတွေလည်း ယခင်နှစ်တွေထက် ပိုမိုများပြား လာကြောင်း ဒေသခံများက ဆက်ပြောသည်။

စယ်လန့်ရွာ

“စစ်အာဏာသိမ်းမှု ဖြစ်ပြီးကတည်းက ဒီမြောက်ပိုင်းတစ်လျှောက်က လက်နက်ကိုင် တပ်ဖွဲ့တွေအားလုံး ကိုယ်စီ လှုပ်ရှားမှုတွေ ရှိပေမဲ့ TNLA က လှုပ်ရှားမှု ခပ်စိပ်စိပ် တွေ့ရတယ်။ ဒါကို ကြည့်ချင်းအားဖြင့် တအာင်းပြည်နယ် ဖွဲ့စည်းရေးအတိုင်း နယ်မြေတွေမှာ လှုပ်ရှားမှု ပြုလုပ်နေတာလို့ သုံးသပ်မိတယ်” ဟု ထုန့်မောဝ်ဒေသမှ နိုင်ငံရေး လေ့လာသုံးသပ်သူတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ ၁၁ ရက် နှင့် ၁၂ ရက်တွင် တအာင်းပြည်နယ် ဖွဲ့စည်းပုံအခြေခံဥပဒေ တတိယ မူကြမ်းအား တအာင်း နိုင်ငံရေး အတိုင်ပင်ခံ ကော်မတီ (TPCC) က ဦးဆောင်ပြီး နိုင်ငံရေး သမားတချို့ နှင့် EAO အစုအဖွဲ့အပါ အဝင် လူဦးရေ ၁၅၀ ကျော် တက်ရောက် အတည်ပြုခဲ့ကြခြင်း ဖြစ်သည်။

PSLF/ TNLA သည် မြန်မာစစ်တပ် နှင့် တစ်နိုင်ငံလုံး အပစ်အခတ်ရပ်စဲရေး သဘောတူညီမှုစာချုပ် (NCA) တွင် ပါဝင်လက်မှတ်ရေးထိုးထားခြင်း မရှိသော်လည်း မြောက်ပိုင်းမဟာမိတ်များ နည်းတူ တရုတ်ကိုယ်စားလှယ် နှင့် ယခုနှစ်အတွင်း တွေ့ဆုံဆွေးနွေးမှု ၂ ကြိမ်ထက်မနည်း ရှိခဲ့သည်။

ယင်းကဲ့သို့ တရုတ်အထူးကိုယ်စားလှယ် နှင့် တွေ့ဆုံဆွေးနွေးမှု အပြီး စစ်ကောင်စီ နှင့် TNLA တပ်ဖွဲ့ကြား ထိတွေ့တိုက်ပွဲများလည်း နည်းလာသည်။

Leave a Comments

- Advertisement -spot_img

Latest article