သျှမ်းပြည် တန့်ယန်းမြို့တွင် နေထိုင်သည့် အသက်မပြည့်သေးသည့် အမျိုးသမီးငယ် ၃ ဦး လိမ်လည် ခေါ်ဆောင်ခံရပြီး ယနေ့ချိန်ထိ ပျောက်ဆုံးနေကြောင်း စုံစမ်းသိရသည်။
ဖြစ်စဉ်မှာ မေလ ၁၅ ရက်တွင် တန့်ယန်းမြို့ ရပ်ကွက် ၁ အတွင်း နေထိုင်သော အသက် ၁၃ နှစ်အရွယ် ရှိ မိန်းကလေးသည် မက်မန်းသီး သွားဝယ်မည်ဟုဆိုပြီး နေအိမ်မှ ထွက်သွားရာ ယနေ့ (မေ ၁၉) ရက်ထိ ပြန်မလာသေးကြောင်း ၎င်း၏ ဆွေမျိုးများက သျှမ်းသံတော်ဆင့် ကိုပြောသည်။
အဆိုပါ အသက် ၁၃ နှစ်အရွယ်ရှိ မိန်းကလေးနှင့်အတူ တန့်ယန်းမြို့တွင် မိန်းကလေးငယ် ၂ ဦးလည်း ပျောက်ဆုံးနေသည်။
“ အစကသွားတာ ၄ ယောက်ပေါ့။ အဲ့ဒီ ၄ ယောက်ထဲက တစ်ယောက်နဲ့ အဆက်သွယ်ရတာ။ သူပြောတာတော့ ၁ ယောက်ကတော့ မိုင်းပေါက်မှာ ရှိတယ်၊ ၂ ယောက်ကတော့ တာချီလိတ်မှာ အလုပ်လုပ်နေတယ်တဲ့။ နောက်တယောက်က ကလေးတွေကို ခေါ်သွားတာ။ ဖုန်းခေါ်ရင် သူတစ်ယောက်ထဲပဲ အမြဲတမ်း ဖုန်းကိုင်နေတယ်။အခုက ကလေးတွေကို လူကုန်ကူးသွားမှာ ကြောက်နေရတာ“ ဟု ၎င်းမှ နီးစပ်သူ အသိုင်းအဝိုင်း အမျိုးသမီးတစ်ဦးက ပြောသည်။
အဆိုပါ အသက်မပြည့်သေးသည့် ကလေးငယ် ၃ ဦးကို ခေါ်ဆောင်သွားသည့် အမျိုးသမီးတစ်ဦးဟာ အသက် ၂၀ ဝန်းကျင် အေးဝမ်း (ခ) အေးဟွမ် ဖြစ်ကြောင်း သိရသည်။
ဆက်လက်ပြီး ၎င်းက “ အကြောက်ဆုံးက အသက် ၂၀ နှစ် အနှိပ်ခန်းလုပ်ဖူးတဲ့ တစ်ယောက်ပဲ။ လူကုန်ကူးသွားမှာဘဲ ကြောက်နေရတယ်။ ခဏနေ ပန်ဆန်းမှာရှိတယ်၊ ဝိန်းကောင်မှာ ရှိတယ်၊ တာချီလိတ်မှာ ရှိတယ် ပြောနေတာ အဲ့ဒါကြောင့် သူ့စကားကို မယုံရဘူး ဖြစ်နေတယ်။ သူ့ကို ရဲတိုင်မယ်လို့ပြောတော့ သူက မကြောက်ဘူးတဲ့။ တိုင်ချင်တိုင် သူက ခေါ်လာတာ မဟုတ်ဘူး၊ ကလေးတွေက သဘောတူလို့ လိုက်လာတာလို့ ပြောနေတယ် “ ဟု ၎င်းက ဖြည့်စွက်ပြောသည်။
ပျောက်ဆုံးသွားသည့် ကလေးငယ်များဟာ အသက် (၁၃) နှစ်မှ (၁၄) နှစ် အရွယ်များ ဖြစ်ကြပြီး မှတ်ပုံတင်လည်း မရှိသည့်အတွက်ကြောင့် တာချီလိတ်၊ မိုင်းပေါက် စသည့် မြို့ပြကြီးထံသို့ သွားရောက်နိုင်ဖို့ အတွက် လမ်းခရီး၌ အခက်ခဲရှိသဖြင့် လက်ရှိ ကလေးငယ်များသည် တန့်ယန်းမြို့တွင် နေထိုင်လျက်ရှိကြောင်း ၎င်း၏ မိဘအသိုင်းအဝိုင်းမှ သုံးသပ်ထားသည်။
အလားတူ ကလေးပျောက်ဆုံးမှု အကြောင်းကို လူမှုကွန်ရက် စာမျက်နှာပေါ်မှတစ်ဆင့် ဖုန်းနံပါတ်နှင့် ကြေညာခဲ့ပြီးနောက် ယမန်နေ့ ၁၇ ရက် ညပိုင်း၌ အမည်မသိ အမျိုးသားတစ်ဦးက ပျောက်ဆုံးနေသည့် ကလေးငယ်တစ်ဦးကို ကျပ်သိန်း (၂၀၀) ဖြင့် လူပြန်ရွှေးခိုင်းရန် ဖုန်းဆက် ခြိမ်းခြောက်လာခဲ့ကြောင်းလည်း သိရသည်။
