သျှမ်းပြည် မူဆယ်ခရိုင် မူဆယ်မြို့ ကျင်ဆန်ကျော့မှ တဆင့် တရုတ်ပြည် ဝမ်တိန်သို့ တင်ပို့သည့် ကုန်ပစ္စည်းများ ကိုက်ညီမှု မရှိဟုဆိုပြီး တရုတ်ဘက်မှ ဖမ်းဆီးကာ သိမ်းဆည်းထားကြောင်း စုံစမ်းသိရသည်။

ယခုနှစ် မေ ၁၆ ရက်တွင် မူဆယ်မြို့ ကျင်ဆန်ကျော့မှ တဆင့် တရုတ်ပြည် ဝမ်တိန်သို့ ပဲစိမ်း တင်ပို့ရာ တန်ချိန် ကိုက်ညီမှု မရှိသည့်အတွက် တရုတ်ဘက်မှ ဖမ်းဆီး သိမ်းဆည်းထားပြီး ချိတ်ပိတ်လိုက်ကြောင်း မူဆယ်ဒေသတွင်း ကုန်သည်အသိုင်းအဝန်းများက သျှမ်းသံတော်ဆင့် ကိုပြောသည်။

“ဟိုဘက် ဒီဘက် ချိန်တဲ့ ကုန်တန် အညီအမျှ မတူလို့ပဲ သိရတယ်၊ အဲ့ဒီမှာ ပိတ်မိနေတဲ့ ကုန်တွေက မြန်မာဘက်က ပို့တဲ့ ကုန်တွေရာ၊ တရုတ်က တင်သွင်းမယ့် ကုန်ပစ္စည်းတွေလည်း ပိတ်မိနေတာ။ ဘယ်အချိန် ပြန်ဖွင့်မလဲဆိုတာ တော့ မသိရသေးဘူး” ဟု မူဆယ်မြို့မှ ကုန်သည် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် မြန်မာဘက်မှ တင်ပို့ကုန်များ အဖြစ် ပဲချိန်တန် ၂ သောင်းနီးပါး နှင့် ကုန်ကျစရိတ် စုစုပေါင်း တရုတ်ယွမ်ငွေ ၁ ထောင်နီးပါး ရှိနေပြီး ဝမ်တိန်ဂိုဒေါင်တွင် ပိတ်မိနေသည့်အတွက် ကုန်သည်များ အခက်အခဲ ဖြစ်နေကြောင်း ကုန်သည်များက ပြောသည်။

ယင်းကိစ္စ နှင့် ပတ်သက်ပြီး နယ်စပ်ကုန်သည်များမှ သက်ဆိုင်ရာ တာဝန်ရှိသူများ နှင့် တွေ့ဆုံညှိနှိုင်းနေသော်လည်း အဆင်မပြေသဖြင့် နှစ်နိုင်ငံ အစိုးရ ညှိုနှိုင်းစေလိုသည့်အကြောင်း ကုန်သည်များက ဆက်ပြောသည်။

“တင်ပို့တဲ့ ပဲတွေဟာ တရုတ်ပြည်မကြီးထဲအထိ သွားတာ၊ အရင်စနစ်က ဂျူတီဆောင်ပြီး တရုတ်ထဲ တင်သွင်းခွင့် ပြုခဲ့တယ်၊ ဒီနောက်ပိုင်းတော့ ဘယ်သူမှ ဂျူတီဆောင်ပြီး မသွင်းနိုင်တော့လို့ တရုတ်အစိုးရက ဒေသကုန်အနေ နဲ့ စနစ်တခုပေးတယ်။ ဒေသကုန် က ဂျူတီ နည်းဝယ်လေ။ အခုက အဲဒီ စနစ်ကို ပြန်မပေးချင်တော့ အပြစ်လိုက် ရှာနေသလိုပဲ” ဟု အထက်ပါ ကုန်သည်အမျိုးသမီးက ဆက်ပြောသည်။

ယင်းကဲ့သို့ ကုန်ပစ္စည်းများ ချိတ်ပိတ်ခံရမှုတွင် မြန်မာ ၊ တရုတ် ကုန်သည်များပါ ဖမ်းဆီးမှု ရှိနေကြောင်းလည်း သတင်းများ ထွက်ပေါ်နေသည်။

ထို့အပြင် ကျင်ဆန်ကျော့ဂိတ်မှ တစ်ဆင့် တရုတ်နိုင်ငံမှ တရားမဝင် ကုန်ပစ္စည်းများကို မူဆယ်မြို့ အခွန်ကောက် ဦးစီးဌာနက အခွန်ကောက်ယူပြီး တင်သွင်းခွင့်ပြုနေကြောင်းလည်း စုံစမ်းသိရသည်။