သျှမ်းပြည် လားရှိုးခရိုင် တန့်ယန်းမြို့နယ် အတွင်း ကျောက်မီးသွေး တူးဖော်မှုကြောင့် နမ့်ပန်ချောင်း ထိခိုက်မှာကို ဒေသခံများက စိုးရိမ်နေရကြောင်း စုံစမ်းသိရသည်။
တန့်ယန်းမြို့နယ် ဝမ်ပန်ကျေးရွာအုပ်စုရှိ နမ့်ပန်ချောင်း၏ ရေထွက် အရင်းအမြစ်အနီးတွင် AAA (A သုံးလုံး) ကုမ္ပဏီမှ ကျောက်မီးသွေး တူးဖော်မှုကြောင့် နမ့်ပန်ချောင်း ရေထွက်ဦး နေရာထိခိုက်မှု ရှိလာနိုင်ကြောင်း ဒေသခံများက သျှမ်းသံတော်ဆင့်ကို ပြောသည်။
“တူးနေတာကတော့ AAA ကုမ္ပဏီက ဖြစ်ပါတယ်၊ တူးလိုက် ရပ်လိုက်လုပ်ပေမဲ့ လုပ်နေတာလည်း နှစ်ပေါင်း ကြာလာပြီဆိုတော့ မြေအောက်ကနေ မြစ်ရဲ့ ရေထွက်ဦး နေရာနားကို နီးလာနေပြီ၊ အခုက ရေနှောက်တာတော့ ဖြစ်တယ်၊ ဆက်လုပ်မယ်ဆိုရင်တော့ မြစ်ကို ထိခိုက်မှာ ကြောက်ရတယ်” ဟု တန့်ယန်းမြို့ ဒေသခံများက သျှမ်းသံတော်ဆင့်ကို ပြောသည်။
အဆိုပါ AAA (A သုံးလုံး) ကုမ္ပဏီမှ တူးဖော်နေသည့် ဝမ်ပန်ကျေးရွာအုပ်စုမှ ကျောက်မီးသွေးတွင်းသည် နှစ်ပေါင်း ၁၇/၁၈ နှစ်နီးပါး ကြာခဲ့ပြီဖြစ်သည့်အတွက် လက်ရှိမှာ နမ့်ပန်ချောင်း နှင့် နီးစပ်လာကာ ရေချောင်း တိမ်ကောသွားမည်ကို ဒေသခံများက စိုးရိမ်နေကြခြင်း ဖြစ်သည်။
အလားတူ တန့်ယန်းမြို့နယ် နားဟုတ်ကျေးရွာအုပ်စုအတွင်းတွင် ငွေရည်ပုလဲမှ တူးဖော်နေသည့်အနီးတဝှိက် ကျေးရွာများ မြေအက်ကွဲမှုကြောင့် ၂၀၂၀ ခုနှစ်တွင် တန့်ယန်းမြို့နယ် တက်လျက်ကျေးရွာတွင် ပြည်သူနေအိမ် (၁၁) အိမ် မဖြစ်မနေ ပြောင်းရွှေ့ ခဲ့ရကြောင်း သိရသည်။
“မြေတွေ အက်လာတာတွေ၊ ရေတွေ နှောက်ကျိလာတာကတော့ မဖြစ်စဖူး ဖြစ်လာတာပေါ့၊ ဒီအနားနားက ကျေးရွာတွေ ပြောင်းနေရတာတွေလည်း ရှိတယ်၊ ဒီလိုသာ ဆက်ဖြစ်နေမယ်ဆိုရင် တခြားရွာကလည်း ထပ်ပြောင်းရမှာ ဖြစ်လာနိုင်တယ်၊ ချောင်းရေ၊ လယ်မြေတွေလည်း ရှားလာတာပေါ့” ဟု ၎င်းက ဆက်ဆိုသည်။
တန့်ယန်းမြို့နယ်အတွင်းတွင် ကျောက်မီးသွေးကုမ္ပဏီ၊ ရာဘာကုမ္ပဏီများမှ ရပ်ရွာ လယ်ယာမြေများအား အဓမ္မ သိမ်းပိုက် ဝယ်ယူခြင်း၊ ဒေသခံများ မွေးမြူရေး၊ စိုက်ပျိုးရေး၊ သောက်သုံးရေ အတွက် အားကိုးအားထားရသည့် ရေထွက်ဦးများ သိမ်းပိုက် ဖျက်ဆီး နေသည့် ပြသာနာများ ၁၀ စု နှစ်ချီ ရှိလာပြီ ဖြစ်ကြောင်း သိရသည်။
