သျှမ်းပြည် မူဆယ်မြို့တွင် ယာဉ်မောင်း ကားသမားတစ်ဦးကို အမျိုးသား ၂ ဦးက ခရီးလိုက်ပို့ပေးရန်ဟုဆိုပြီး သေနတ်အတုဖြင့် ခြိမ်းခြောက်ကာ ကားကိုဓားပြတိုက်သွားကြောင်း စုံစမ်းသိရှိရသည်။
ဖြစ်စဉ်မှာ ယနေ့ (မေလ ၁၆ ရက်) နံနက် ၇ နာရီဝန်းကျင်တွင် မူဆယ်မြို့ စွမ်စော်ရပ်ကွက်၊ ရွှေသမင်ကွက်သစ်ရှိ တရုတ်စာသင်ကျောင်းအနီး၌ အမည်မသိ အမျိုးသား ၂ ဦး သည် ပန်ခမ်းမြို့မှ ကားသမားတစ်ဦးကို ကားငှားမည်ဟု ဖုန်းဆက်ခေါ်ခဲ့သည်။
ထိုကားသမားသည် မူဆယ်မြို့ စွမ်စော်ရပ်ကွက်သို့ ရောက်ရှိလာပြီး ကားငှားရမ်းမည့် အမျိုးသား (၂) ဦးသည် ကားသမားကို သေနတ်အတုဖြင့် ခြိမ်းခြောက်ပြီး ကားကို ဓားပြတိုက်သွားခဲ့သည်။
“လမ်းခရီး လိုက်ပို့ပါဆိုပြီး ကားဆရာကို ဖုန်းခေါ်တာ။ ကားဆရာလည်း သွားကြိုတယ်။ သွားကြိုတော့ လမ်းသွယ်မှာ သူတို့စောင့်ပြီး ကားဆရာကို သေနတ်အတုနဲ့ ခြိမ်းခြောက်ပြီး ကားပေါ်က ဆင်းခိုင်းတယ်။ ပြီးတော့ ကားကိုလုယူသွားပြီး စွမ်စော်ရပ်ကွက်က ဈေးဘက်ကို ထွက်ပြေးသွားတယ်“ ဟု ၎င်း ဒေသခံတစ်ဦး ကပြောသည်။
အဆိုပါ ကားကို ဓားပြတိုက်ပြီး မောင်းထွက်သွားသည့်နောက် စွမ်စော်ရပ်ကွက်ရှိ ပြည်သူများက လိုက်လံပြီး ရှာဖွေဖမ်းဆီးခဲ့ရာ စွမ်စော်ဈေးအနီး၌ ကားကို ပြန်လည်သိမ်းယူနိုင်ခဲ့ကြောင်း သိရသည်။
“ကားကိုဘဲ ပြန်သိမ်းယူနိုင်ခဲ့တာဗျ။ ပြည်သူတွေ လိုက်ဖမ်းနေတုန်း သူတို့က ကားကိုထားခဲ့ပြီး ထွက်ပြေးသွားတာ။ ဒီလူတွေက အသက် ၂၀ ကျော်အရွယ်တွေပါ။ ဗမာတွေလို့တော့ သိရတယ် “ ဟု ၎င်းဒေသခံ တစ်ဦးက ထပ်လောင်းပြောသည်။
ဓားပြတိုက်သွားသည့် အမျိုးသား ၂ ဦးသည် အသက် ၂၀ အရွယ် လူငယ်နှစ်ဦးဖြစ်ပြီး အမည် နှင့် နေရပ်လိပ်စာကို မသိရှိသေးကြောင်း လက်ရှိမှာ ၎င်းလူငယ်နှစ်ဦးသည် ထွက်ပြေးလွတ်မြောက်နေဆဲဟု သိရသည်။
စစ်တပ်က အာဏာသိမ်းပြီးနောက်ပိုင်း မူဆယ်မြို့တွင် သေနတ်အတုဖြင့် ပြည်သူများထံ ခြိမ်းခြောက်ငွေတောင်း ယူသည့် ဓားပြတိုက်အဖွဲ့များအပြင် PDF နာမည်ခံပြီး ပြည်သူများထံ ခြိမ်းခြောက် ငွေတောင်းယူခြင်း၊ လမ်းသွားလမ်းလာ ပြည်သူကို ဓားပြတိုက်ခြင်း နှင့် အိမ်တွင်းဖောက် ခိုးယူမှု ပြုလုပ်ခြင်းများ မကြာခဏ ဖြစ်ပေါ်နေကြောင်း သိရသည်။
ထို့အပြင် မူဆယ်မြို့တွင် စစ်ကောင်စီတပ်ဖွဲ့၊ ပြည်သူ့စစ်တပ်ဖွဲ့၊ တိုင်းရင်းသားလက်နက်ကိုင်တပ်ဖွဲ့များ လှုပ်ရှားသည့် နေရာဒေသ ဖြစ်သော်လည်း ခိုးဆိုးလုယက်၊ ဓားပြတိုက်၊ သူခိုးများကို ဖမ်းဆီးအရေးယူခြင်း တစ်စုံတစ်ရာ မရှိခဲ့သလို ပြည်သူက ကိုယ်တိုင် ဖမ်းဆီးအရေးယူခြင်း၊ လုံခြုံရေးယူခြင်း ပြုလုပ်နေရကြောင်း သိရသည်။
