သျှမ်းပြည် မူဆယ်မြို့နယ် တီးမကျေးရွာအုပ်စုရှိ ရွှေမှော်အတွင်း ကချင်လွတ်မြောက်ရေးတပ်မတော် (KIO/KIA) မှ လုံခြုံရေး ယူပေးထားသောနေရာကို TNLA အခွန်လာရောက်ကောက်ယူမှုသည် စိန်ခေါ်နေသည့်ပုံစံဖြစ်သည်ဟု ပြောဆိုလိုက်သည်။

အဆိုပါ ပြောဆိုမှုသည် KIA မှ ပြောရေးဆိုခွင့်ရှိသူ ဗိုလ်မှူးကြီး နော်ဘူက သျှမ်းသံတော်ဆင့်ကို ပြောသည်။

မူဆယ်မြို့နယ် တီးမကျေးရွာအုပ်စုရှိ ရွှေတူးဖော်သည့်နေရာကို KIA မှ ဝတ်စုံအပြည့်ဖြင့် လုံခြုံရေး စောင့်ဆိုင်း ထားပြီး၊ ထိုနေရာကို တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) မှ မေ ၁၁ရက် နံနက်ပိုင်းတွင် ရွှေလုပ်ကွက်ပိုင်ရှင် တစ်ဦးကို အခွန် (ဆက်ကြေး)တောင်းရာ မပေးသဖြင့် ဖမ်းဆီးသွားခဲ့ကြောင်း သိရသည်။

“စစ်ရေး နဲ့ လက်နက်အပြည့်အစုံနဲ့ ကျနော်တို့ လုံခြုံရေး ယူထားတဲ့ နယ်မြေအတွင်းကို ဝင်လာတယ်ဆိုတော့ ကျနော်တို့ အတွက် မကောင်းဘူးပေါ့နော်၊ ဒါက စိန်ခေါ်တဲ့ သဘောမျိုး ဖြစ်သွားတာပေါ့” ဟု ဗိုလ်မှူးကြီး နော်ဘူက သျှမ်းသံတော်ဆင့်ကိုပြောသည်။

TNLA တပ်ဖွဲ့သည် တီးမကျေးရွာအုပ်စုမှ ရွှေတွင်းပိုင်ရှင် ဦးရေ စုစုပေါင်း ၅၀ နီးပါးရှိနေပြီး တစ်ဦးလျှင် သိန်း ၂၀၀ ကျပ် ပေးဆောင်ခိုင်းနေကြောင်း သိရသည်။

ထို့အပြင် ဖမ်းဆီးခံသွားရသည့် ရွှေတွင်းပိုင်ရှင် အမျိုးသားကိုလည်း TNLA တပ်ဖွဲ့မှ နေ့တွင်းချင်း ပြန်လည် လွှတ်ပေးခဲ့ကြောင်းလည်း ဗိုလ်မှူးကြီးနော်ဘူ က ဆိုပြန်သည်။

“KIA ဘက်ကနေ လုံခြုံရေးယူထားတဲ့ ရွှေမှော်ထဲမှာ TNLA ရဲဘော်တွေက ရွှေတူးနေတဲ့ ပြည်သူလူထုကို အခွန် တောင်းတယ်၊ တောင်းတာကို မပေးနိုင်ရင်တော့ လူကို ဖမ်းသွား တာတွေ ရှိတယ်၊ အဲ့ဒီနယ်မြေက ခွင့်ပြုမရှိဘဲနဲ့ TNLA တပ်ဖွဲ့က ဝင်လာတယ်လို့ သတင်းတွေ ထွက်ပေါ်နေပါတယ်၊ အဲ့ဒါကြောင့်လည်း ပြည်သူလူထုတွေက တော်တော်လေး ဒုက္ခရောက်နေတယ်” ဟု KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ဆိုသည်။

အဆိုပါ ကိစ္စဖြစ်စဥ်များ နှင့် ပတ်သက်ပြီး TNLA တပ်ဖွဲ့၏ ပြောရေးဆိုခွင့်ကို ဆက်သွယ်မေးမြန်းရာ ဖြစ်စဥ် အသေးစိတ်ကို မသိရသေးကြောင်း နှင့် TNLA လှုပ်ရှားနယ်မြေအတွင်း အခွန်ကောက်မှု ရှိနေကြောင်း တပ်ဖွဲ့ ပြောရေးဆိုခွင့် ဒုတိယ ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

“KIA နဲ့ စစ်ရေးတင်းမာတယ်ဆိုတဲ့ သတင်း ကျနော် မကြားမိပါဘူ၊ ကျနော်တို့က ကျနော်တို့ လှုပ်ရှားနယ်မြေ အတွင်းမှာ အခွန်ကောက်တာတော့ ရှိပါတယ်။ ဒီကိစ္စနဲ့ ပတ်သက်ပြီးတော့ အသေးစိတ်တော့ မသိရဘူး”ဟု TNLA တပ်ဖွဲ့ ပြောရေးဆိုခွင့် ရှိသူ ဗိုလ်မှူးကြီး တားအိုက်ကျော်က ဆိုသည်။

တီးမကျေးရွာအုပ်စုမှ ရွှေတွင်းသည် ပြီးခဲ့သည့် ၂၀၁၃ ခုနှစ်မှ စတင်တူးဖော်ခဲ့ခြင်းဖြစ်ပြီး ကချင် လွတ်မြောက်ရေး တပ်မတော် KIA မှ လုံခြုံရေး ယူပေးနေကြောင်း သတင်းသိရသည်။

တီးမကျေးရွာအုပ်စုသည် မူဆယ်မြို့ နှင့် မိုင်ပေါင်း ၃၀ နီးပါး ကွာဝေးပြီး လမ်းခရီးလည်း ကြမ်းတမ်းသည့်အတွက် မော်တော်ဆိုင်ကယ် ၊ ကားဖြင့် ၄၅ မိနစ် တစ်နာရီနီးပါး မောင်းနှင်ရသည်။

အဆိုပါ နယ်မြေအတွင်း၌ တိုင်းရင်းသား လက်နက်ကိုင် တပ်ဖွဲ့များဖြစ်ကြသည့် ရှမ်းပြည်တိုးတက်ရေးပါတီ SSPP/SSA ၊ ကချင်လွတ်မြောက်ရေး တပ်မတော် KIA နှင့် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့က သွားလာလှုပ်ရှားနေကြောင်းလည်း သိရသည်။