သျှမ်းပြည် ကျောက်မဲခရိုင် ကျောက်မဲမြို့နယ်အတွင်း မိုးသည်းထန်စွာ ရွာသွန်းပြီး လေပြင်းတိုက်ခိုက်မှုကြောင့် နေရပ်ပြန်သွားသည့် စစ်ဘေးရှောင်များ၏ နေအိမ်များ ထိခိုက်ပျက်စီးသွား ခဲ့ကြောင်း သတင်းသိရသည်။
ပြီးခဲ့သည့် မေလ ၁၀ ရက် နံနက်ပိုင်း ၅ နာရီဝန်းကျင်တွင် ကျောက်မဲမြို့နယ်အတွင်း လေပြင်းတိုက်ခိုက်မှုကြောင့် လွယ်အံကျေးရွာအုပ်စု၊ ပန်မခမ်ကျေးရွာမှ ဘုန်းကြီးကျောင်း အပါအဝင် လူနေအိမ်များ ထိခိုက် ပျက်စီးရကြောင်း ဒေသခံများက သျှမ်းသံတော်ဆင့်ကိုပြောသည်။
“အိမ် ၁၆ လုံးနဲ့ ဘုန်းကြီးကျောင်းက အဆောင်တချို့ ခေါင်မိုးလှန်ကုန်ကြတယ်၊ တချို့ကလည်း သစ်တန်းတွေပါ ပြုတ်ထွက်သွားတာ၊ လမ်းဘေးက ဓါတ်မီးတွေလည်း လှဲကြတာပဲ” ဟု ဒေသအတွင်းက အမည်မဖော်လိုသူ အသက် ၄၀ ကျော်အမျိုးသား တစ်ဦးက သျှမ်းသံတော်ဆင့်ကိုပြောသည်။
ထို့အပြင် စာသင်ကျောင်း နှင့် ဆရာမတို့၏ နေအိမ်တန်းလျားများလည်း လေပြင်းကြောင့် ထိခိုက်ပျက်စီးရပြီး ခေါင်မိုးများ လွှင့်ထွက်သွားကြောင်း အထက်ပါ အမျိုးသားက ဆက်ပြောသည်။
“မိုးကလည်းရွာ၊ လေပြင်းလည်းတိုက်တယ်ဆိုတော့ အဲ့အချိန်က နှစ်ခုပေါင်းပြီး တိုက်တာ၊ ရွာသားအိမ်တွေ အပြင် စာသင်ကျောင်းနဲ့ ဆရာမတွေ နေတဲ့ တန်းလျားဆောင်ကလည်း အမိုးတွေ လှန်သွားတယ်၊ လေကြီး မိုးကြီးက ၂/၃ နာရီလောက်ကြာတယ်” ဟု ၎င်းက ဆက်ဆိုသည်။
လက်ရှိတွင် နေအိမ်အဆောက်အအုံ တချို့ကို ပြန်လည် ပြုပြင်နိုင်ခဲ့သော်လည်း နေအိမ် ၄ လုံးသည် ထိခိုက် ပျက်စီးမှု များသည့်အပြင် ပြန်လည်ပြုပြင်ရန်လည်း ငွေကြေး အခက်အခဲရှိနေကြောင်း သိရသည်။
အဆိုပါ လေပြင်းတိုက်ခိုက်မှုကြောင့် လူသူထိခိုက်မှု မရှိသော်လည်း နေအိမ်အဆောက်အအုံများ ထိခိုက် ပျက်စီးမှု များပြားသည့်အတွက် ဒေသခံများက အခက်အခဲရှိနေကြောင်းလည်း သိရသည်။
ပြီးခဲ့သည့် ဧပြီလ ၂၅ ရက်တွင်လည်း လေပြင်းတိုက်ခတ်မှုကြောင့် နမ္မတူမြို့မှ လူနေအိမ် ၅ လုံးထက် မနည်း ပျက်စီးသွားသည့်အပြင် မေလ ၃ ရက်နေ့၌ သီပေါမြို့မှ မီးတိုင်လဲကျ၊ နေအိမ်တချို့ ပျက်စီးသွားခဲ့ရသည်။
အဆိုပါ လေပြင်းတိုက်ခိုက်မှုကြောင့် နေအိမ်၏ ခေါင်မိုးနှင့် ထရံ ပျက်စီးဆုံးရှုံးသွားသည့် ဒေသခံအချို့ အသစ်တစ်ဖန်ပြန်လည်တည်ဆောက်ဖို့အတွက် ငွေရေးကြေးရေး အခက်အခဲရှိကြောင်း ဒေသခံများက ပြောဆိုနေကြသည်။
Leave a Comments