သျှမ်းပြည် တောင်ကြီးခရိုင် တောင်ကြီးမြို့တွင် အိမ်သန့်ရှင်းရေးအဖြစ် ခန့်ထားသည့် အိမ်ဖော် အမျိုးသမီးတစ်ဦးက အိမ်တွင်းရှိ ရွှေဆွဲကြိုး နှင့် စိန်လက်စွပ်ကို ခိုးယူပြီး ထွက်ပြေးသွားကြောင်း စုံစမ်းသိရှိရသည်။
ယမန်နေ့ (မေ ၁၁) ရက် နံနက်ပိုင်းတွင် တောင်ကြီးမြို့ပေါ်ရှိ အိမ်တစ်အိမ်၌ အိမ်သန့်ရှင်းရေးအဖြစ် ခန့်ထားသည့် အိမ်ဖော်အမျိုးသမီး တစ်ဦးသည် အိမ်တွင်းရှိ ရွှေဆွဲကြိုး နှင့် စိန်လက်စွပ်ကို ခိုးယူပြီး ထွက်ပြေးသွားခဲ့ကြောင်း အခိုးခံရသည့် ပိုင်ရှင်တစ်ဦးက ၎င်း၏ လူမှုကွန်ရက် စာမျက်ပေါ်တွင် ရေးသားဖော်ပြထားသည်။
“မနေ့က မနက် ဘယ်သူမှ မခိုင်းဘဲ အမေ့ခန်းထဲကို တော်ရုံမဝင်ခိုင်းပါ။ အဲ့ အခန်းထဲဝင်ပြီး ရွှေဆွဲကြိုးနဲ့ စိန်လက်စွပ်ကို ယူပြီး ဖျားတယ်ဆိုပြီး ထွက်ပြေးသွားတယ် “ ဟု ၎င်း၏ လှုမှုကွန်ရက်စာမျက်နှာပေါ်တွင် ရေးသားဖော်ပြထားသည်။
အဆိုပါ ဆွဲကြိုး နှင့် လက်စွပ်ကို ခိုးယူသွားပြီးနောက် တောင်ကြီးမြို့ရှိ ဇွဲထက်ရွှေဆိုင်တွင် ကျပ် ၁၈ သိန်းဖြင့် ပြန်လည်ရောင်းချခဲ့ကြောင်းလည်း သိရသည်။
လက်ရှိ ပစ္စည်းခိုးယူသွားသည့် အိမ်ဖော်အမျိုးသမီးကို ပြန်လည် ဖမ်းဆီးရပြီး ဖြစ်သလို ၎င်းအိမ်ဖော် အမျိုးသမီးတစ်ဦးကလည်း ပစ္စည်းတွေကို အမှန်တကယ် ခိုးယူသွားကြောင်း ဝန်ခံထားသည်ဟု သိရသည်။
“ သူခိုးတွေတော့ ဆိုးပါဗျာ။ လစ်ရင်တွယ်နေတာဘဲ။ ဖမ်းမှမဖမ်းတာ။ ရဲသွားတိုင်လည်း အလုပ်ရှုပ်ယုံဘဲ သူတို့စားကွက်ပေါ့။ ထရန်စဖော်မာကေဘလ်ကြိုးတောင် ခိုးခံရ၊ အိမ်ဝန်းတည်းက ဆိုင်ကယ်အခိုးခံရ နဲ့ ဘယ်တစ်ခုမှ မိတယ်မကြားဘူး။ သူခိုးကို ရဲက မသိဘူးဆိုတာ ဖြစ်နိုင်လား။ ရသမျှ လိုင်းကြေး ကောက်စားနေကြတာနေမှာပေါ့ “ ဟု တောင်ကြီးမြို့ခံ ဒေသခံတစ်ဦးက ထပ်လောင်းပြောသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည် တောင်ကြီးမြို့ အပါအဝင် မူဆယ်၊ နမ့်ခမ်း၊ တာချီလိတ်နှင့် ကွတ်ခိုင် စသည့် မြို့များတွင် သူခိုး၊ ဓားပြ နှင့် ဓားပြတိုက်မှု ပေါများလာနေပြီး လုံခြုံရေးကို ပြည်သူများက ကိုယ်တိုင်ဆောင်ရွက်နေရကြောင်း သိရသည်။
Leave a Comments