သျှမ်းပြည် လွိုင်လင်ခရိုင် လဲချားမြို့နယ်မှ စစ်ဘေးရှောင်များ အချို့သည် စိုးရိမ်စိတ်ဖြင့် နေရပ်ပြန်သွားကြောင်း သတင်းသိရသည်။
ပြီးခဲ့သည့် မေလ ၉ ရက်တွင် လဲချားမြို့ရောက် စစ်ရှောင် ၅၀၀ ကျော်တို့မှ ဟော်ခမ်းကျောင်းတိုက်၊ ကျောင်းခမ်း ကျောင်းတိုက် နှင့် ဆလိုင်းခုမ်ကျောင်းတိုက်မှ စစ်ဘေးရှောင်တို့သည် စိုးရိမ်စိတ်ဖြင့် နေရပ်သို့ ပြန်သွားကြောင်း စစ်ရှောင်ကူညီပေးနေသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“အခုဆိုရင် တိုက်ပွဲသံတွေကလည်း ငြိမ်လာပြီဆိုပေမဲ့ စိုးရိမ်စိတ်ကတော့ ရှိသေးတာပေါ့၊ ဒါပေမဲ့ မပြန်လို့လည်း လုပ်ငန်းက လုပ်ရမှာဆိုတော့ စိုးရိမ်စိတ်နဲ့ ပြန်ကြတာ၊ အခုကလည်း လုပ်ငန်းတွေ စလုပ်ရမဲ့ အချိန်ဖြစ်နေပြီလေ၊ အဲ့ကြောင့်ပြန်သွားတာ၊ ဝါဆိုကျောင်းတိုက်ကပဲ အနည်းငယ်ကျန်တယ်” ဟု စစ်ရှောင်ကို ကူညီပေးနေသူ တစ်ဉီးက သျှမ်းသံတော်ဆင့်ကို ပြောသည်။
လက်ရှိတွင် လဲချားမြို့ပေါ်ရောက် စစ်ဘေးရှောင်များ အနက်မှ စစ်ရှောင် ၅၀၀ နီးပါး ပြန်သွားပြီး ဝါဆိုကျောင်း တိုက်တွင် စစ်ဘေးရှောင် ၂၀ ကျော် ကျန်ရှိနေသေးကြောင်းလည်း သိရသည်။
နေရပ်ပြန်သွားသည့် စစ်ဘေးရှောင်များသည် လုပ်ကိုင် စားသောက်ရေးအတွက် နေရပ်ပြန် သွားရသော်လည်း စစ်ရေး အခြေအနေများကို နားစွင့်နေရသေးကြောင်းလည်း အထက်ပါ စစ်ရှောင် ကူညီပေးနေသူက သျှမ်းသံတော်ဆင့်ကို ပြောသည်။
“ဒီနှစ်မလုပ်ထားရင်လည်း နောက်နှစ် စားစရာ မရှိပဲ ဖြစ်မှာစိုးလို့ သူတို့က နေရပ်ပြန်ပြီး လုပ်ကိုင် စားသောက်ဖို့ ပြင်ဆင်ရတာပေါ့နော်၊ ဒါပေမဲ့ လယ်/ယာ သွားကြလည်း ကြောက်နေရပါတယ်၊ သေနတ်သံတွေ ထပ်ကြားရ မလား၊ မိုင်းတွ ပေါက်ကွဲမလား၊ အဲ့လိုတွေ သတိထားနေရတယ်” ဟု အထက်ပါ ပုဂ္ဂိုလ်က ဆက်ဆိုသည်။
နေရပ်မပြန်နိုင်သေးသည့် ဝါဆိုကျောင်းတိုက်မှ စစ်ဘေးရှောင် ၂၀ ကျော်သည် ကလေးအများစု ဖြစ်နေပြီး အမျိုးသမီး နှင့် သက်ကြီးရွယ်အိုများဖြစ်ကြောင်းလည်း ၎င်းက ဆက်ဆိုသည်။
“နေရပ်မပြန်နိုင်သေးတဲ့ စစ်ဘေးရှောင်တွေကတော့ ၂၀ ကျော်ရှိတယ်၊ အဲ့ထဲက ကလေးတွေက ၁၀ နှစ်ကျော်နဲ့ လူကြီးတွေဆိုလည်း အမျိုးသမီးနဲ့ သက်ကြီးပိုင်းတွေ ဖြစ်ပါတယ်။ သူတို့ မိသားစုဝင် အမျိုးသားတွေကတော့ ရွာပြန်ပြီး အခြေအနေသွားကြည့်တာ၊ ကောင်းရင်တော့ ဒီရက်ပိုင်းအတွင်း သူတို့လည်း ပြန်သွားတော့မယ်” ဟု အထက်ပါ ပုဂ္ဂိုလ်က ဆက်ဆိုသည်။
ပြီးခဲ့သည့် ဧပြီလ ၁၁ ရက်နေ့မှ စတင်ကာ လဲချားမြို့နယ်အတွင်း သျှမ်းတပ်နှစ်တပ်ဖြစ်သည့် (RCSS နှင့် SSPP) တို့ ထိတွေ့တိုက်ပွဲ ဖြစ်ပွားမှုကြောင့် ဒေသခံ ၅၀၀ ကျော်တို့သည် လဲချားမြို့ပေါ်သို့ စစ်ရှောင်ထွက်ပြေးလာရခြင်း ဖြစ်သည်။
လက်ရှိတွင် တိုက်ပွဲသံများ ငြိမ်သက်သွားသော်လည်း အဆိုပါ နယ်မြေ ဒေသအတွင်း၌ လက်နက်ကိုင် တပ်ဖွဲ့များက သွားလာ လှုပ်ရှားနေကြပြီး၊ စစ်ရေးတင်းမာနေဆဲဖြစ်ကြောင်း သိရသည်။
