သျှမ်းပြည် တောင်ကြီးခရိုင် ဟိုပုံးမြို့နယ်တွင် မိုးသည်းထန်စွာ ရွာသွန်းမှုကြောင့် လမ်းမဘေးရှိ နေအိမ်ထိ ရေများစီးဝင်နေကြောင်း စုံစမ်းသိရှိရသည်။

ပြီးခဲ့သည့် မေလ ၉ ရက်နေ့ ဟိုပုံးမြို့နယ်တွင် မိုးသည်းထန်စွာ ရွာသွန်းမှုကြောင့် နောင်တောင်း ပရဟိတကျောင်း သွားလမ်းဘေးရှိ နေအိမ်၌ ရေနုတ်မြောင်း မရှိသဖြင့် နေအိမ်၏ အောက်ထပ်အတွင်းသို့ ရေများစီးဝင်နေကြောင်း ဟိုပုံးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ ဟုတ်တယ်။ မိုးသီးတွေပါကျတာ။ နောင်တောင်း ပရဟိတကျောင်းဖက်ကဆိုရင် အိမ်ရဲ့ အောက်ထပ်ထိတောင် ရေဝင်တာ။ ရေဝင်တာ ဘယ်နှစ်အိမ်ရှိလဲတော့ သေချာမသိဘူး။ လမ်းဘေးမှာ ရေနုတ်မြောင်းတွေ မဖောက်ပေးတော့ မိုးရွာရင် နေအိမ်အထိ ရေစီးဝင်ကုန်တာ“ ဟု ၎င်း အမျိုးသမီးတစ်ဦးက ပြောသည်။

အဆိုပါ နောင်တောင်း ပရဟိတကျောင်းသည် ဟိုပုံးမြို့ နှင့် ၂ မိုင်ခန့်ကွာဝေးပြီး သွားလမ်းတလျောက်၌ အိမ်ခြေ ၂၀၀ ခန့်ရှိကြောင်းလည်း သိရသည်။

ထို့အပြင် ဟိုပုံးမှ နောင်တောင်း ပရဟိတကျောင်းသို့ သွားရာလမ်းမကြီးဘေး တလျောက်ရှိ နေအိမ်များသည် ရေနုတ်မြောင်း မရှိသောကြောင့် မိုးများထပ်ရွာချလျှင် လမ်းမကြီးပေါ် ရေလျှံပြီး နေအိမ်အတွင်း ရေဝင်မည်ကို စိုးရိမ်နေကြောင်း ၎င်း ဒေသခံအမျိုးသမီးတစ်ဦးက ထပ်လောင်းပြောသည်။

“ လမ်းက သဲလမ်း၊ ကတ္ကရာလမ်းပါ။ အရမ်းတော့ မကျယ်ဘူး။ လမ်းဧရိယာက နည်းနည်းကျဉ်းတယ်။ လမ်းက အရမ်းကောင်းတာတော့ မဟုတ်ပါဘူး။ လမ်းဘေးမှာက ရေနုတ်မြောင်းလည်း မရှိဘူး။ မိုးထပ်ရွာရင် နေအိမ်တွေမှာ ရေတွေစီးဝင်မှာလည်း စိုးရိမ်ရတယ် “ ဟု ၎င်းက ဖြည့်စွက်ပြောသည်။

မိုးလေဝသ နှင့် ဇလဗေဒ ညွှန်ကြားမှု ဦးစီးဌာန၏ ယနေ့ မေလ ၁၁ ရက် ထုတ်ပြန်ချက်အရ မိုးရွာရက်များအနေဖြင့် သျှမ်းပြည်တွင် သီပေါမြို့၊ နမ့်စန်မြို့တွင် ၅ ရက်မှ ၆ ရက်အထိ မိုးများရွာသွန်းနိုင်ကြောင်း ထုတ်ပြန်ထားသည်။