ပြည်သူ့ကာကွယ်ရေး PDF အပါအဝင် အဖွဲ့အစည်း အမျိုးမျိုးအမည်ခံပြီး လက်နက်ကိုင် ဆန့်ကျင်လျက်ရှိသည့် အဖွဲ့အစည်းများကို လက်နက်၊ ခဲယမ်းနှင့်အတူ အလင်းပြန်ဝင်လာပါက ဆုကြေးငွေ ထောက်ပံ့ပေးသွားမည်ဟု စစ်ကောင်စီမှ မက်လုံးပေးပြီး မြူဆွယ်နေကြောင်း စုံစမ်းသိရသည်။

အာဏာသိမ်းပြီး ၂ နှစ်ကျော်ကာလအတွင်း စစ်ကောင်စီသည် မြေပြင်တွင် စစ်ရေးအင်းအား အများအပြား လျော့နည်းလာမှုနှင့် ဘဏ္ဍာရေးဆိုင်ရာ စီးပွားရေးလည်း အားနည်းလာမှုကြောင့် အဆိုပါ လက်နက်ကိုင်ပြီး ဆန့်ကျင်တော်လှန်သူများကို မက်လုံးပေးပြီး မြူဆွယ်နေကြောင်း PNDF- KK မှ တာဝန်ခံ ဗွေဟုန်းက ပြောသည်။

“ သူတို့ အခြေအနေ တော်တော်လေးကို ဆိုးနေတဲ့ အနေအထားကို တွေ့နေရတယ်။ အရင်က သူတို့တော်လှန်ရေးအင်အားစုကို ပြောခဲ့တယ်၊ သူတို့က တော်လှန်ရေး အင်အားစုတွေကို အမြစ်ပြတ်ချေဖို့ လုပ်မှာလို့ သူတို့ထုတ်ပြန်ချက်မှာလည်း ပြောခဲ့တယ်။ ဒါပေမယ့် ဒီနောက်ပိုင်းမှာ အဲ့စကားပြန်ပြောင်းလာပြီး လေသံပျော့လာရုံတင်မက သူတို့အခြေအနေက မကောင်းတော့ဘူးလို့ ကျနော်တို့က သုံးသပ်လို့ရတယ် “ ဟု ၎င်းက ပြောသည်။

စစ်ကောင်စီသည် နွေဦးတော်လှန်ရေးကာလအတွင်း ပါဝင်လာသည့် လူငယ်များ၊ တော်လှန်ရေးသမားကို စိတ်ပြောင်းလဲသွားစေရန်အတွက် လက်နက်၊ ခဲယမ်း နှင့် အတူ အလင်းပြန်ဝင်လာလျှင် ဆုကြေးငွေ ထောက်ပံ့ပေးရာ၌ မက်လုံးပေးခြင်း၊ မြူဆွယ်နေခြင်း သဘောသက်ရောက်နေသည်ဟု ၎င်းက ဆက်ပြောသည်။

အလင်းပြန်လည် ဝင်ရောက်လာသူများအနေဖြင့် လူသတ်မှု၊ မုဒိမ်းမှု၊ သူတစ်ပါး အပေါ် ထိခိုက်နစ်နာမှု စသည့် ပြစ်မှုတစ်ခုခုကျုးလွန် ထားသူဖြစ်ပါက ဉပဒေအရ တရားရုံးအတွင်း အမှုရင်ဆိုင်ဖြေရှင်းရမည်ဖြစ်ပြီး နိုင်ငံတော် အစိုးရအနေဖြင့် ထိုပြစ်မှု အတိုင်းအတာအပေါ်မူတည်ပြီး ဉပဒေအကြောင်းအရ လိုအပ်သည့် ဖြေလျှော့မှုများကို ပြုလုပ်ပေးသွားမည်ဖြစ်ကြောင်း မေလ ၉ ရက်တွင် ထုတ်ပြန်ထားသည်။

အလားတူ အလင်းပြန်ဝင်ပြီး ရိုင်ဖယ်အုပ်စုဝင်သေနတ် (၁) လက်ပါရှိပါက ကျပ် (၁၅) သိန်း၊ ပစ္စတိုအုပ်စုဝင် သေနတ် (၁) လက်ရှိပါက ကျပ် (၂၀) သိန်း၊ ပြောင်းချောသေနတ် (၁) လက်ရှိပါက ကျပ် (၃၀) သိန်း၊ စိန်ပြောင်း၊ လောင်ချာ၊ အာပီဂျီ ကဲ့သို့သော လက်နက်များ (၁) လက်ပါရှိပါက ကျပ် (၇၅) သိန်းနှင့် ဗုံးဖောက်ခွဲရေးအတွက် အသုံးပြုနိုင်သော Drone (၁) စင်းရှိပါက ကျပ် (၅၀) သိန်း စသည်ဖြင့် ဆုကြေးငွေထောက်ပံ့ပေးသွားမည်ဟု ကြေညာထားသည်။

“ တစ်ဖက်က ရန်သူကို လုံးဝချေမှုန်းနိုင်မှ၊ တိုက်ခိုက်နိုင်မှသာ အောင်မြင်မယ်။ ရန်သူတစ်ယောက်ပဲရှိရှိ၊ နှစ်ယောက်ပဲ ရှိရှိ၊ ကိုယ့်ဘက်ကလူ ၁ ထောင်ပဲရှိရှိ၊ ၂ ထောင်ပဲရှိရှိ တစ်ယောက်နှစ်ယောက်ရဲ့အားက ကျနော်တို့ အထင်သေးလို့ မရဘူး။ အဓိက အဖြေမထွက် မလာချင်းတော့ ကျနော်ကတော့ အောင်တယ်လို့ မပြောဘူး။ စစ်ကောင်စီဖက်ကနေ အရှုံးပေးသွားသော်လည်းကောင်း၊ ကျနော်တို့ တိုက်ယူလို့ အာဏာရှင်စနစ် အမြစ်ပြတ်သွားမှ တိုက်ပွဲကအောင်မြင်မယ် “ ဟု ၎င်းက ထပ်လောင်းပြောသည်။

ထို့အပြင် အလင်းပြန်လည်ဝင်ရောက်လာသူများအနေဖြင့် နီးစပ်ရာ ခရိုင်၊ မြို့နယ် စီမံအုပ်ချုပ်ရေး အဖွဲ့များ၊ တပ်စခန်းများနှင့် ရဲစခန်းများကို ဆက်သွယ်သတင်းပို့၍ ဝင်ရောက်နိုင်ပါကြောင်း စစ်ကောင်စီ၏ ကြေညာထုတ်ပြန်ချက်တွင် ရေးသားဖော်ပြထားသည်။