သျှမ်းပြည် တာချီလိတ်ခရိုင် ကျိုင်းတုံ – တာချီလိတ် ကားလမ်းမပေါ်တွင် မြေတင်ကားတစ်စီး ဘရိတ်ပေါက်ပြီး တောင်ကိုတိုက်မိကာ ၁ ဦး သေဆုံး၍ ၃ ဦး ထိခိုက်ဒဏ်ရာ ပြင်းထန်စွာရရှိခဲ့ကြောင်း စုံစမ်း သိရှိရသည်။

ပြီးခဲ့သည် မေလ ၈ ရက် ညနေပိုင်း ၅ နာရီတွင် ကျိုင်းတုံမှ တာချီလိတ်သို့ မောင်းနှင်လာသည့် ၆ ဘီး ကားတစ်စီးသည် ကျိုင်းတုံ – တာချီလိတ် ကားလမ်းမပေါ်ရှိ လွိုင်ပန်ကွဲ (လွႆပၢင်ၵႂၢႆး) တစ်နေရာတွင် ကားဘရိတ်ပေါက်ပြီး တောင် နှင့် ဝင်တိုက်မိသဖြင့် ကားပေါ်မှ လိုက်ပါလာသူ လူ ၄ ဦးအနက် ၁ ဦးသေဆုံးကာ ၃ ဦး ဒဏ်ရာရသွားကြောင်း ကူညီသည့် ဒေသခံတစ်ဦးက ပြောသည်။

“ မြေသယ်ကား ကျိုင်းတုံဖက်ကနေ တာချီလိတ်ကိုလာတာ။ တောင်ကြားမှာ ဘလိတ်ပေါက်ပြီး တိမ်းမှောက်သွားတာ။ ၁ ဦးကတော့ ပွဲချင်းဆုံးသွားတယ်။ ကျန်တဲ့ ၃ ဦးက ထိခိုက်ဒဏ်ရာတွေ ပြင်းထန်ခဲ့တယ် “ ဟု ၎င်းက ပြောသည်။

အဆိုပါ ယာဉ်တိမ်းမှောက်မှု ဖြစ်ပွားပြီး သေဆုံးသူ နှင့် ထိခိုက်ဒဏ်ရာ ရရှိသူများကို ကျိုင်းတုံပရဟိတ လူမှုကူညီရေးအသင်းမှ သွားရောက်ကူညီခဲ့၍ ကျိုင်းတုံဆေးရုံသို့ ပို့ဆောင်ခဲ့ကြောင်း သိရသည်။

“ ဒီလွိုင်ပန်ကွဲမှာတော့ ယာဉ်တိမ်းမှောက်မှု၊ ယာဉ်တိုက်မှုတွေ ခဏခဏ ဖြစ်တယ်ဗျ။ ဒီနှစ်ထဲမှာတော့ ဒီတစ်ကြိမ်က ပထမဆုံးအကြိမ်ပဲ။ မနှစ်ကတော့ ၃ ကြိမ်လောက် မနည်းဘူးဖြစ်တာ။ လူတွေလည်း ထိခိုက်ဒဏ်ရာ ရတာ မနည်းဘူး။ များသောအားဖြင့် ကားမောင်းတာတွေက ပေါ့ဆတာရယ်၊ ပြီးတော့ ဒီက နယ်ခံမဟုတ်တော့ လမ်းကြောင်း မကျွမ်းကျင်တာရယ်ကြောင့် ဖြစ်တာ “ ဟု ၎င်းက ထပ်လောင်းပြောသည်။

ထို့အပြင် မေလ ၇ ရက် ညပိုင်း ၇ နာရီတွင် တာချီလိတ်မြို့နယ်တွင် ကားတစ်စီး နှင့် ထော်လာဂျီ တိုက်မိကြပြီး အသက် ၆၅ နှစ် အမျိုးသားတစ်ဦးလည်း သေဆုံးသွားခဲ့ကြောင်း သိရသည်။