စစ်ကောင်စီက ဖောင်းကြွနံပါတ်ပြား မလဲရသည့် ယာဉ်များကို အရေးယူမည်ဟု ကြေညာပြီးနောက် ဖောင်းကြွနံပါတ်ပြား တစ်ချပ်ကို ကာလပေါက်စျေး ကျပ်ငွေ ၅ သောင်း ရှိနေကြောင်း စုံစမ်းသိရှိရသည်။
ပြီးခဲ့သည့် မေလ ၈ ရက်မှစ၍ ၁၅ ရက်ကာလသာအတွင်း ဖောင်းကြွနံပါတ်ပြား မလဲရသေးသည့် ယာဉ်များကို စတင် အရေးယူမည်ဟု စစ်ကောင်စီ လက်အောက်ခံ ကုန်းလမ်းပို့ဆောင်ရေး ညွှန်ကြားမှု ဦးစီးဌာန (ကညန)မှ ကြေညာခဲ့ပြီးနောက် တောင်ကြီးမြို့ရှိ ယာဉ်ထိန်းရဲ ရုံးရှေ့တွင် ယနေ့ (မေလ ၁၀ ရက်) ထိ ရဲ နှင့် ယာဉ်ထိန်းရဲများက စောင့်ဆိုင်းပြီး ယာဉ်များကို ဖမ်းဆီးအရေးယူနေကြောင်း တောင်ကြီးမြို့ဒေသခံ တစ်ဦးက သျှမ်းသံတော်ဆင့်ကို ပြောသည်။
“ ၈ ရက်နေ့က မော်တော်ပီကယ်ရုံးရှေ့မှာ စဖမ်းတယ်။ ကားတော်တော်များများပါတယ်၊ ကားအစီး ၂၀ အစိပ်လောက် ရှိတယ်။ ဒီနေ့ထိကော ဖမ်းနေသေးတယ်။ လမ်းနှစ်ဖက် အတက်မှာကော၊ အဆင်းမှာကော ဖမ်းနေတယ် “ ဟု ၎င်း ဒေသခံတစ်ဦးက ပြောသည်။
အဆိုပါ ထုတ်ပြန်ချက်အရ ဖောင်းကြွနံပါတ်ပြား မလဲရသည့် ယာဉ်များကို ဖမ်းမိပါက တစ်စီးကို ဒဏ်ငွေ ၅၀၀၀ ကျပ် ပေးဆောင်ရမည်ဖြစ်ပြီး သတ်မှတ်ထားသည့် ၁၅ ရက်အတွင်း မလဲရသေးပါက ကား၏ သက်သေခံလက်မှတ် (ဝှီးတက်) ကို သိမ်းမည်ဟု ထုတ်ဖော်ရေးသားထားသည်။
ကားလိုင်စင် သက်တမ်းသွားတိုးသည့် ဒေသခံတစ်ဦးက “ နဂိုဖောင်းကြွနံပါတ်ပြားက ဗမာဂဏန်း နေပြည်တော်မှာ အင်္ဂလိပ် ဂဏန်းပြောင်းတယ်။ တောင်ကြီးဖက်ကတော့ နံပါတ်ပြားရဲ့ အပေါ်မှာ (Shan) ဆိုတာ ပါတယ်။ အခုက အဲ့ (Shan) ရဲ့ နောက်မှာ ၁၈ ဆိုတဲ့ ဂဏာန်းတိုးတယ်။ နံပါတ်ပြားရဲ့အောက်မှာက ကားနာမည် ပါတယ်။ မနေ့က နံပါတ်ပြားကော၊ ကားလိုင်စင်သက်တမ်းတိုးတာကော ကျပ် ၁ သိန်းလောက်ကုန်တယ်။ အေးသာယာစက်မှုဇုံမှာတော့ အဲ့နံပါတ်ပြား တစ်ချပ်ကို ၅ သောင်းနဲ့ နှစ်ချပ်ကို ၁ သိန်း လုပ်ပေးနေတယ် “ ဟု ၎င်းက ပြောသည်။
လက်ရှိမှာ ဖောင်းကြွနံပါတ်ပြား ပြောင်းလဲရခြင်း နှင့် ပတ်သက်ပြီး စစ်ကောင်စီက ပြည်သူများထံ အကြောင်းပြချက် အမျိုးမျိုးယူပြီး ပိုက်ဆံ တောင်းယူမှု တစ်ရပ်သာဖြစ်ကြောင်း ဒေသခံများ၏ ပြောချက်အရ သိရသည်။
