အရပ်သားတစ်ဦးကို မီးမြှိုက်ပြီး အမှုစစ်ခဲ့သည့် ဗီဒီယိုဖိုင် ကိစ္စသည် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ဘက်မှ ဝန်ခံပြောဆိုလိုက်သည်။
ဗီဒီယိုဖိုင်ထဲတွင် SSPP/SSA စစ်ဝတ်စုံဖြင့် ဝတ်ဆင်ထားသည့် စစ်သား ၃ ဦးသည် အရပ်သား တစ်ဦးကို သစ်ပင်ပေါ်ကြိုးချည်ပြီး မီးမြှိုက်ထားသည်။
အဆိုပါ ဗီဒီယိုသည် ယမန်နေ့ (မေ ၉) ရက်တွင် လူမှုကွန်ရက်စာမျက်နှာပေါ်ရှိ သျှမ်းလူထုအသိုင်းအဝိုင်းတွင် ပြန့်နှံ့ခဲ့သည်။
ထိုကိစ္စနှင့် ပတ်သက်ပြီး SSPP/SSA ဘက်မှ ထုတ်ပြန်ချက်တစောင်ထွက်ပေါ်လာခဲ့ပြီး၊ SSPP/SSA မှ ပြောရေးဆိုခွင့်ရှိသူ ဗိုလ်မှူး ဖုန်းဟန်ကလည်း သျှမ်းသံတော်ဆင့်ကို ဝန်ခံပြောဆိုထားသည်။
“ ဟုတ်ပါတယ်။ အဲ့နေရာနဲ့ အချိန်ကို ကျနော်တို ပြောလို့မရသေးဘူး။ လက်ရှိမြေပြင်မှာလည်း တိုက်ပွဲတွေဖြစ်နေတုန်းပါ။ အမှုစစ်နေတုန်း မလို့ အမှုဖြစ်စဥ်ကတော့ ပြောလို့မရသေးဘူး” SSPP/SSA ပြောရေးဆိုခွင့်ရှိသူ ဗိုလ်မှူးဖုန်းဟန်က သျှမ်းသံတော်ဆင့်ကို ပြောသည်။
လက်ရှိမှာ အမှုကို စစ်ဆေးနေချိန် မပြီးသည့်အတွက် အမှု ဖြစ်စဥ်ကို မပြောဆိုနိုင်သေးကြောင်းနှင့် သျှမ်းတပ် (၂) တပ် မြေပြင် စစ်မျက်နှာဖြစ်နေချိန်ဖြစ်သဖြင့် နေရာနှင့်အချိန်ကိုလည်း မပြောဆိုနိုင်သေးကြောင်း ဗိုလ်မှူးဖုန်းဟန် က ဆိုသည်။
“မြေပြင်မှာဖြစ်နေတဲ့ဟာကို စိတ်ဆန္ဒအနေနဲ့ စစ်ကြောရေးမှာ ကျော်လွန်ပြီးတော့ လုပ်သွားတဲ့ အနေအထား ဖြစ်သွားတယ်။ အဲ့ကြောင့် ကျနော်တို့လည်း စိတ်မကောင်းပါဘူး”ဟု ဗိုလ်မှူး ဖုန်းဟန် က ဆိုသည်။
အရပ်သားကို မီးမြှိုက်ပြီး အမှုစစ်ဆေးသည့် ကိစ္စသည် လူ့အခွင့်အရေး ချိုးဖောက်သည့် ဟုလည်း သျှမ်းလူထု အသိုင်းအဝိုင်း ကြား ဝေဖန်ပြောဆိုထားသည်ကို တွေ့မြင်ရသည်။
ပြည်သူများအနေဖြင့် ပြောပိုင်ခွင့်၊ စိုးရိမ်စိတ်ပိုင်ခွင့်ရှိကြောင်း၊ ထိုဖြစ်သွားသည့်ကိစ္စနှင့်ပတ်သက်ပြီး ဝမ်းနည်းရကြောင်းလည်း ဗိုလ်မှူး ဖုန်းဟန်က ထပ်လောင်းပြောဆိုသည်။
အရပ်သားကို ကြိုးတုတ် မီးမြှိုက်ပြီး အမှုစစ်ဆေးနေသည့် လုပ်ရက်သည် လူ့အခွင့်အရေး ချိုးဖောက်ပြီး တရားမျှတမှုမရှိသည့်လုပ်ရက်ကို ဆန့်ကျင်ကြောင်း ထိုင်းနိုင်ငံ ဘန်ကောက်ရောက် သျှမ်းလူငယ်အဖွဲ့ ကပြောသည်။
ဆက်လက်ပြီး ဗိုလ်မှူး ဖုန်းဟန် က “ ဖြစ်စဥ်တွေအကုန်လုံး စိစစ်ပြီးတော့မှ ဘာတွေ ဆောင်ရွက်သင့်မလဲ ဆိုတဲ့ဟာ ကျနော်တို့ ဆောင်ရွက်ဖို့ရှိပါတယ်။ စစ်သုံ့ပန်းမှာ လုပ်တဲ့အနေအထားမှာလည်း ပြန်လွှတ်ပေးတယ်။ ကျနော်တို့ ကောင်းကောင်းမွန်မွန် ဆက်ဆံတယ်။ ဆေးဝါးကုသမှုတွေ ပြုလုပ်ပေးတယ်။ သူတို့ သွားချင်တဲ့နေရာကို ပို့ပေးတယ်” ဟု ဆိုပြန်သည်။
လက်ရှိဖြစ်စဥ်မှာ SSPP/SSA သည် စစ်ကြောရေးပေါ်လစီထက် ကျော်လွန်ပြီး လုပ်ဆောင်စစ်ဆေးသွားခြင်းသည် SSPP/SSA ဘက်ရဲ့ အားနည်းချက်ဖြစ်သွားပြီး လက်ရှိ ထိုအမျိုးသားကို ဆေးကုသမှု ပေးထားကြောင်းလည်း ယနေ့ SSPP/SSA ထုတ်ပြန်ချက် တွင် ဖော်ပြထားသည်။
SSPP/SSA ဘက်မှ စစ်သုံ့ပန်းများကို လည်းဖမ်းဆီးထားခြင်းရှိလျှင် ပြန်လွှတ်ပေးခဲ့ခြင်းလည်း ရှိခဲ့ဖူးသည်။
Leave a Comments