သျှမ်းပြည် မူဆယ်ခရိုင် ကွတ်ခိုင်မြို့ အမှတ် (၇) ရပ်ကွက်ရှိ နေအိမ်သို့ အမည်မသိ လက်နက်ကိုင်တစ်စုက ဓားပြတိုက်ခဲ့ကြောင်း စုံစမ်းသိရသည်။

ပြီးခဲ့သည့် မေလ ၈ ရက် နံနက်ပိုင်း ၁ နာရီဝန်းကျင်တွင် ကွတ်ခိုင်မြို့ အမှတ် (၇) ရပ်ကွက်၌ နေထိုင်သည့် နေအိမ်တစ်လုံးထဲသို့ မျက်နှာဖုံးစွပ် အမျိုးသား တစ်စုက လာရောက်ဓားပြတိုက်ယူသွားကြောင်း အိမ်ရှင်နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။

“ည သန်းခေါင်အချိန်မှာ အမျိုးသား ၃ ဦးက အိမ်ထဲဝင်လာပြီးတော့ အိမ်ရှင်ကို ဓားနဲ့ထောက်ပြီး ငွေတွေ ပစ္စည်း တွေကို ထုတ်ခိုင်းတယ်။ အိမ်မှာ ခေါ်ထားတဲ့ ကားဒရိုင်ဘာကိုလည်း ရိုက်နှက်ထားတာ၊ ကျောကုန်းမှာ ဒဏ်ရာ ရသွားတယ်၊ ပိုက်ဆံ ၇ သိန်း၊ ကားတစ်စီး၊ သုံးဘီး တစ်စီး ၊ ဆိုင်ကယ် ၂ စီးကို ယူသွားတယ်” ဟု အိမ်ရှင် အမျိုးသမီး နှင့် နီးစပ်သူ တစ်ဦးက သျှမ်းသံတော်ဆင့်ကိုပြောသည်။

ဓားပြတိုက်ခံရသည့် နေအိမ်သည် ကြက်မွေးမြူရေးခြံပိုင်ရှင် တစ်ဦးဖြစ်ပြီး နေအိမ်၌ အလုပ်သမားများ နှင့် အိမ်ရှင်အမျိုးသမီး ရှိနေစဥ် ဓားပြတိုက်ခံရခြင်း ဖြစ်ကြောင်းလည်း အထက်ပါ နီးစပ်သူက ပြောသည်။

အဆိုပါ ဓါးပြတိုက်လာသည့် အဖွဲ့သည့် စုစုပေါင်း ၃ ယောက်ဖြစ်ပြီး၊ ၎င်းတို့သည် အိမ်ပေါ်တက်လာခြင်းဖြစ်ပြီး အိမ်ဝိုင်းတံခါးတွင် တစ်ယောက်နှင့် ကားပေါ်စောင့်နေသည့်သူလည်း ရှိနေကြောင်းလည်း သိရသည်။

လက်ရှိတွင် ဓားပြတိုက်ခံရမှုကြောင့် Crown အမျိုးအစား ကား တစ်စီး ၊ သုံးဘီး တစ်စီး၊ ဖုန်း ၂ လုံး၊ ဆိုင်ကယ် ၂ စီး နှင့် ပိုက်ဆံ ၇ သိန်းကျော် ဆုံးရှုံးရကြောင်း သိရသည်။

ဓားပြတိုက်ခံရမှု နှင့် ပတ်သက်ပြီး သက်ဆိုင်ရာ တာဝန်ရှိသူများထံ တိုင်ကြားထားသော်လည်း အရေးယူ ဆောင်ရွက်မှု ပြုလုပ်ပေးမည်ဟုသာ အကြောင်းပြန်ခဲ့ကြောင်း အထက်ပါ နီးစပ်သူက ဆက်ပြော သည်။
“ရဲစခန်းကိုတော့ တိုင်ထားပြီ၊ သူတို့လိုက်ပေးမယ်တဲ့၊ စုံစမ်းပေးမယ်ပြောတယ်၊ အခုချိန်ထိတော့ ဘာမှ အကြောင်းမပြန်သေးဘူး” ဟု အိမ်ရှင်နှင့် နီးစပ်သူက ဆက်ပြောသည်။

ကွတ်ခိုင်မြို့နယ်အတွင်းသည် မူးယစ်ဆေးဝါး ရောင်းဝယ် သုံးစွဲမှုများ၊ သူခိုးဓါးပြများ ပေါ်များနေပြီး သက်ဆိုင်ရာ တာဝန်ရှိသူများက နှိမ်နှင်းထိန်းသိမ်းခြင်း မရှိသည့် အကြောင်းလည်း ဒေသခံများက ပြောသည်။

ယင်းကဲ့သို့ အခြေအနေများကြောင့် လုံခြုံရေးအတွက် စိုးရိမ်ပူပန်နေကြပြီး သက်ဆိုင်ရာ တာဝန်ရှိသူများမှ ဖော်ထုတ်ဖမ်းဆီးအရေးယူပေးစေလိုကြောင်း ဒေသခံပြည်သူများက တောင်းဆိုနေကြသည်။

စစ်တပ်မှ နိုင်ငံတော် အာဏာသိမ်းယူပြီးနောက်ပိုင်း နိုင်ငံရေးအခြေအနေ မတည်ငြိမ်မှုကြောင့် မကြာခဏ လုယက်မှု၊ ခိုးမှုများလည်း ရင်ဆိုင်နေရသည့် အတွက် ပြည်သူများက စိုးရိမ်ထိတ်လန့်နေကြကြောင်းလည်း သိရသည်