သျှမ်းပြည် မူဆယ်ခရိုင်၊ လားရှိုးခရိုင်တို့ အတွင်း ဒေသခံများကို ပြည်သူ့ကာကွယ်ရေး ပူးပေါင်း တပ်ဖွဲ့ PDF နာမည်ခံပြီး ခြိမ်းခြောက်ပိုက်ဆံတောင်းသည့် အဖွဲ့ သောင်းကျန်းနေကြောင်း စုံစမ်းသိရသည်။

ပြီးခဲ့သည့် ဧပြီလ နှောင်းပိုင်းမှ စတင်ကာ လားရှိုးခရိုင် သိန္နီမြို့နယ် နှင့် မူဆယ်ခရိုင် ကွတ်ခိုင်မြို့နယ်တို့၌ KNDF / PDF အမည်ခံကာ ခြိမ်းခြောက်ပိုက်ဆံတောင်းမှု ရှိခဲ့ကြောင်း ဒေသခံများထံ သိရသည်။

အဆိုပါ PDF အမည်ခံ လက်နက်ကိုင် တပ်ဖွဲ့သည် လက်နက်ပုံများ နှင့် အတူ ဒေသခံ နေအိမ်များ၊ ဈေးဆိုင်များ၊ အလုပ်ရုံများတို့၌ ခြိမ်းခြောက်ငွေတောင်းစာ နှင့် အတူ ခြိမ်းခြောက်ပြီး ငွေတောင်းခြင်းများ ကြုံတွေ့နေရကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“သူတို့က KNDF တပ်ဖွဲ့က ဖြစ်တယ်တဲ့၊ ပုန်းခိုတိုက်ခိုက်ရေးတပ်က ဖြစ်တယ်ဆိုပြီးတော့ ငွေကျပ်သိန်း ၆၀ လာတောင်းတယ်၊ မပေးရင် အမျိုးသမီးဖြစ်ဖြစ် ၊ ကလေးတွေကိုပဲ ဖြစ်ဖြစ် ဖောက်ခွဲပစ်မှာလို့ ခြိမ်းခြောက် ထားတယ်” ဟု ခြိမ်းခြောက်ခံရသည့် သိန္နီမြို့မှ မိသားစုဝင် တစ်ဦးက သျှမ်းသံတော်ဆင့်ကို ပြောသည်။

အဆိုပါ ငွေကြေးခြိမ်းခြောက်တောင်းဆိုသည့် KNDF တပ်ဖွဲ့သည် လက်နက်ဗုံး ပုံ နှင့် အတူ ခြိမ်းခြောက်စာရွက်ကို အိမ်တံခါးတွေမှာ စာရွက်လိုက်လံညှပ်ထားခြင်း၊ ဖုန်းမက်ဆေ့ နှင့် Viber တို့ကနေ တစ်ဆင့် စာပို့ခြိမ်းခြောက်ခြင်း တို့ လုပ်နေကြောင်း သိရသည်။

လက်ရှိတွင် သိန္နီမြို့နယ်အတွင်းက ခြိမ်းခြောက်ခံရသည့် နေအိမ် ၆/၇ အိမ် နီးပါး ရှိနေပြီး ပိုက်ဆံများ မပေးဆောင်ရသေးသော်လည်း ဒေသခံများက စိုးရိမ်ကြောက်လန့်နေကြကြောင်းလည်း သိရသည်။

“ကျနော်တို့ ဒေသမှာက လက်နက်ကိုင် တပ်ဖွဲ့က စုံလင်ပါတယ်၊ သူတို့ (တိုင်းရင်းသားလက်နက်ကိုင်တပ်ဖွဲ့) က တောင်းသလို ဒီလို PDF အမည်ခံပြီး လုပ်စားကြတာပေါ့၊ အဲ့လိုပဲ ထင်တယ်” ဟု အထက်ပါ အမျိုးသားက ဆက်ပြောသည်။

ယင်းကဲ့သို့ ဒေသခံများ လက်နက်ပြ ခြိမ်းခြောက်ခံရခြင်း နှင့် ပတ်သက်ပြီး အဆိုပါ ဒေသအတွင်းလှုပ်ရှားနေသည့် ကချင်လွတ်မြောက်ရေး တပ်ဖွဲ့ KIA ၏ ပြောရေးဆိုခွင့်ရှိသူ ဗိုလ်မှူးကြီး နော်ဘူကို ဆက်သွယ်မေးမြန်းရာ မဖြစ်သင့်ကြောင်း နှင့် စုံစမ်းသိရှိရန် လိုအပ်ကြောင်း သျှမ်းသံတော်ဆင့်ကို ပြောသည်။

“ဒီနယ်တစ်ကြောမှာဆိုရင် ကျနော်တို့ တပ်ဖွဲ့ရဲ့ တပ်မဟာ (၁၀)၊ (၄) နဲ့ တပ်မဟာ (၆) လက်အောက်ခံ တပ်ရင်းလည်း ရှိနေတာပေါ့နော်။ အခုလိုမျိုး လက်နက်ပြပြီး ပြည်သူလူထုကို ခြိမ်းခြောက် ငွေတောင်းတာ မဖြစ်သင့်ပါဘူး၊ ကျနော်တို့ စုံစမ်းသိရှိနိုင်အောင်တော့ ကြိုးစားမယ်” ဟု ဗိုလ်မှူးကြီး နော်ဘူက သျှမ်းသံတော်ဆင့်ကို ပြောသည်။

အဆိုပါ ဖြစ်စဥ်နှင့် ပတ်သက်ပြီး ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် (SSPP/SSA) ကို ဆက်သွယ် မေးမြန်းရာ ဖြစ်စဥ်များ သိရပါက စုံစမ်းဖော်ထုတ် အရေးယူမည် ဖြစ်ကြောင်း တပ်ဖွဲ့၏ ပြောရေးဆိုခွင့်ရှိသူ ဗိုလ်မှူးဖုန်းဟန်က သျှမ်းသံတော်ဆင့်ကို ပြောသည်။

“အခုလိုမျိုး လက်နက်ကို အကြောင်းပြပြီး ပြည်သူ့ဆီက ခြိမ်းခြောက်တာ၊ ငွေတောင်းတာမျိုးတွေကိုတော့ ကျနော်တို့ တပ်ဖွဲ့ကန့်ကွက်တယ်၊ ဆန့်ကျင်တယ်၊ ပြီးတော့ အခုလိုမျိုး တိုင်းပြည်ရှုပ်ထွေးတဲ့ အချိန်မှာ ပိုပြီးတော့ မလုပ်သင့်ဘူး၊ ကျနော်တို့က ဖြစ်စဥ် နဲ့ လုပ်တဲ့သူတွေကို စုံစမ်းဖော်ထုတ်နိုင်ခဲ့ရင်လည်း ဒါကို အရေးယူ ဆောင်ရွက်ရမှာ၊ ဒီလိုလုပ်ရပ်က တော်လှန်ရေး လုပ်နေတဲ့ အဖွဲ့အစည်းတွေရဲ့ ပုံရိပ်ကိုလည်း ထိခိုက်တယ်” ဟု ဗိုလ်မှူးဖုန်းဟန်က သျှမ်းသံတော်ဆင့်ကို ပြောသည်။

ပြီးခဲ့သည့် ဧပြီလအတွင်းမှာလည်း ဗုံးတစ်လုံး ဓါတ်ပုံ နှင့်အတူ မူဆယ်မြို့မှ ဆောက်လုပ်ရေး ပစ္စည်း ရောင်းဝယ်သည့် ဆိုင်ပိုင်ရှင် တစ်ဦးထံကို ခြိမ်းခြောက် ပိုက်ဆံတောင်းဆိုမှုလည်း ရှိခဲ့သည်။

စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် မူရင်းရှိပြီးသား တိုင်းရင်းသား လက်နက်ကိုင် တပ်ဖွဲ့များ၊ တော်လှန်ရေးအင်အားစုများဖြစ်သည့် PDF များ၏ အမည်နာမကို အသုံးပြုကာ ခြိမ်းခြောက်ငွေကြေး တောင်းဆိုမှုများသည် မကြာခဏ ဖြစ်ပေါ်လေ့ရှိပြီး တချို့က သေနတ်ကျည်ဆန်ပြကာ ခြိမ်းခြောက် တောင်းဆိုမှု ပြုလုပ်ခဲ့ကြောင်းလည်း သိရသည်။