သျှမ်းပြည် လွိုင်လင်မြို့နယ် ပင်လုံမြို့က သူနာပြုတစ်ဦး (၁၀) ရက်ကျော်ကြာ ပျောက်ဆုံးသွားပေမယ့် ယနေ့ချိန်ထိ သတင်းအချက်အလက် မရရှိသေးသဖြင့် မိသားစုဝင်များ စိုးရိမ်နေကြောင်း သိရှိရသည်။
ပင်လုံမြို့ ရပ်ကွက် (၂) တွင်းနေထိုင်သော ဆရာမ တစ်ဦးသည် ပြီးခဲ့သည့် ဧပြီ (၂၉) ရက် မနက် (၉) နာရီချိန်ခန့်တွင် မင်္ဂလာဆောင်သွားမည်ဟု ပြောဆို ထွက်သွားပြီး ယနေ့ချိန်ထိ ပျောက်ဆုံးနေကြောင်း မိသာစု နှင့် နီးစပ်သူ တစ်ဦး ကပြောသည်။
“အဲ့နေ့ မနက်က သူ မြို့သစ်ဘက်က မင်္ဂလာဆောင်သွားမယ်လို့ အိမ်ကနေ ထွက်သွားလိုက်တယ်။ အဲ့ကိုရောက်တော့ သူ အပြင်ထွက်သွားလည်မယ်လို့ သူ့ သူငယ်ချင်းကို ပြောတယ်။ တစ်ချို့ကလည်း သူ့ကို ပင်လုံ ကျောက်တိုင်က ရွှေတိဂုံ ဘုရားမှာ တွေ့လိုက်သေးတယ်လို့ ပြောတယ်။ အဲ့ကနေပြီးတော့ သူ့ကို အဆက်အသွယ် သတင်းအစအနလည်း မကြားရတော့ဘူး။ ဒီလို ပျောက်သွားတော့ ကျမတို့လည်း အရမ်းကို စိုးရိမ်နေတယ်။ သူ ဒီလို အကြာကြီး မသွားဖူးဘူး။ ကျမတို့ အဖေကလည်း နေမကောင်းဘူး ကျမမှာလည်း ကလေးတစ်ဖက် နဲ့ဆိုတော့ သူ့ကို ဘယ်မှာ သွားရှာရမယ်မှန်း မသိတော့ဘူး” ဟု ပျောက်ဆုံးသွားသူ၏ မိသားစုဝင် တစ်ဦး က သျှမ်းသံတော်ဆင့် ကိုပြောသည်။
အလားတူ လက်ရှိမှာ လွိုင်လင်မြို့မှ ရဲတပ်ဖွဲ့သည်လည်း လွိုင်လင်ရေကန်အနီးတွင် (မြကန်သာ) သေဆုံးနေသည့် ရုပ်အလောင်း တစ်ခု တွေ့ရှိထားကြောင်း ထုတ်ပြန်ထားသည့်အတွက် ပျောက်ဆုံးနေသူ အသက် (၃၃) နှစ်အရွယ် နန်းမလေး မိသားစုဝင်များကလည်း စိုးရိမ်ပူပန်နေကြောင်း သိရှိရသည်။
“လွိုင်လင်ဖက်ကလည်း ရုပ်အလောင်းတစ်လောင်းတွေ့ရှိထားတယ်လို့ သတင်းကြားထားတယ်။ အမျိုးသမီးပဲလို့ ပြောတယ်။ ဒါပေမယ့် ရုပ်အလောင်းက ပုပ်ပွနေပြီဖြစ်တဲ့အတွက် ဘယ်သူဘယ်ဝါဆိုတာကို အတည်ပြုလို့ မရသေးဘူး။ သူတို့ ကျမကို ပုံတွေ ပို့လာပေးသလောက်ကတော့ အင်္ကျီ၊ ဘောင်းဘီ၊ အိတ် တွေလည်း ကျမ ညီမ ဟာနဲ့ တူနေတယ်။ ဒါပေမယ့် ကျမတို့ဘက်ကလည်း အတည်ပြုလို့မရသေးဘူး။ ပုံထဲပဲ ဖြစ်နေတဲ့အတွက်။ အခု ကျမ အမျိုးသားလည်း လွိုင်လင်ရဲစခန်းမှာ သွားပြီး အတည်ပြုနေတုန်းပဲ။ အနံ့တွေ တအားထွက်နေပြီဖြစ်တဲ့အတွက် ရုပ်အလောင်းကိုတော့ သင်္ဂြိုဟ်လိုက်ပြီလို့ ကြားတယ်” ဟု မိသားစုဝင် ဖြစ်သူ အမျိုးသမီး တစ်ဦး ကပြောသည်။
လွိုင်လင် – နမ့်စန် ပြည်ထောင်စု လမ်းမကြီးကြားတွင် ညအချိန် သွားလာရာတွင် ဓားပြတိုက်မှု ရှိနေကြောင်း သိရှိရသည်။
ပြီးခဲ့သည့် ဧပြီလအတွင်း လွိုင်လင်ရေကန် အနီးရှိ နည်းပညာတက္ကသိုလ် အနီးနားတွင် ဓားပြတစ်စုမှ ညအချိန်၌ လေးဂွဖြင့် ပစ်ခတ်ခဲ့မှု ရှိသည့် အတွက် ကားဆရာတစ်ဦး မျက်စိ ထိမှန်သွားခဲ့သည့် ဖြစ်စဥ်လည်းရှိသည်။
